Luku a tori disi: Tide Giovanni no wani go na skoro. Tamara a no wani go tu. A feni taki a no o go na skoro noiti moro. Fu san ede? Sowan dri mun kaba, den pikin na skoro e taki wan lo sani fu en. Den bigin gi en dreiginen srefi. Son leisi den pikin e naki den skorobuku fu Giovanni puru na en anu, dan den e du neleki a no fu espresi. Tra leisi baka den e pusu en, dan te a drai luku, a no e si suma du en. Ma esde, sani kon moro ogri srefi di Giovanni si taki den pikin skrifi tapu Internet taki den o fon en.

Efu yu ben de Giovanni, san yu ben o du?

Yu man du wan sani! Yu no musu feti nanga pikin di e suku trobi nanga yu, noso di e dreigi yu. Ma dan san yu kan du?

•   NO PIKI DEN BAKA. Bijbel e taki: „Wan donman no man hori ensrefi, ma a sma di koni no e bruya” (Odo 29:11). Te yu e meki muiti fu no kisi atibron èn yu no e piki den pikin baka, dan kande den o stop fu dreigi yu.

• NO DU DEN OGRI BAKA. Bijbel e taki: „Te wan sma du unu wan ogri, un no musu du a sma dati ogri baka” (Romesma 12:17). Efu yu ben o teki wraak, dan sani kan kon moro ogri.

• KOTI PASI GI PROBLEEM. Bijbel e taki: „A koniwan si taki ogri o miti en èn a go kibri” (Odo 22:3). Efu a man, dan pruberi fu koti pasi gi pikin di kan dreigi yu èn no go na presi pe den o suku trobi nanga yu.

• TAKI WAN SANI DI DEN NO BEN O DENKI. Bijbel e taki: „Wan safri piki e kowru bigi atibron” (Odo 15:1). Yu kan du wan sani fu meki den lafu. Kon meki wi taki dati den e dreigi yu taki yu fatu tumusi. Kande yu kan hari yu skowru èn taigi den: „Dan mi musu feti a fatu pikinso, noh?”

• WAKA GOWE. Nora di abi 19 yari e taki: „Te yu no e taki noti èn yu e waka gowe, dan yu e sori taki yu koni èn taki yu no de leki a sma di e dreigi yu. Yu e sori taki yu man hori yusrefi. A pikin di e dreigi yu no man du dati.”—2 Timoteyus 2:24.

• SORI TAKI YU DE SEIKER FU YUSREFI. Pikin di gwenti dreigi trawan man si suma na den swaki pikin di no de seiker fu densrefi. Ma nofo tron te den si taki yu no e frede èn taki yu de seiker fu yusrefi, den no o dreigi yu moro.

• TAIGI WAN SMA. Wan sma di ben de jufrow fosi, e taki: „Mi wani taigi ala pikin di trawan e dreigi, taki den musu fruteri wan sma. A bun fu du dati. A kan meki taki den no e dreigi tra pikin tu.”