Hen sha kwagh ne: Thomas nder nyian pepe yô, a soo u zan makeranta ga. Alaghga kper kpa una soo ga. Shin una kera soo makeranta ga kuaa. Ityôkyaa yô, mbayevmakeranta mbagen ken makeranta na samber a gwa u bo sha iyol na. Zayol ne hii iwer kar itiar, maa ve gema yilan un ati a iyongo. Shighe gen or ka nan za gbidye ityakerada na i osough un sha ave i haa inya, inja er nan er sha apera ga nahan. Shi kwa gen ka ve za va un ken ijime mbee mbee, maa mô ve nan daa un ken ijime, una geman yô, a fa or u nan er kwagh shon jighilii ga. Nyen la, i hii Thomas ayongo sha gbenda u hemban vihin cii. I tindi un a loho u tan un mciem iyol sha Intanet.

A lu we nahan, u er nena?

De nengen wer kwagh hemba u kareghaa ga! Jighilii yô, u fatyô u hemban or u nan hiin we la a u eren ayôôso a nan shio. U er kwagh ne nena?

•   DE BUGHUN ZWA GA. Bibilo kaa ér: “Ibumeor ka nan pase ishimanyoon i nan cii, kpa orfankwagh yô, ka nan kighir i, i mem.” (Anzaakaa 29:11) Aluer u ungwa mba ve lu hiin we la ato ving yô, alaghga a va kera za ve zwa ga.

• DE ORON IYEV GA. Bibilo kaa ér: “De oron iyev i ifer sha ifer ga.” (Mbaromanu 12:17) Aluer u ker u oron iyev yô, zayol la una za a za hemen.

• PALEGH ZAYOL. Bibilo kaa ér: “Orfankwagh ka nan nenge a kwaghbo, nan yer.” (Anzaakaa 22:3) Nôngo sha afatyô wou cii palegh ior mba vea fatyô u van we a zayol la, shi palegh ajiir a u nenge wer a va za hii u her la.

• ER KWAGH SHA GBENDA U A SAA VE DANG YÔ. Bibilo kaa ér: “Imo i legh legh ngi bundu ishima i nyoon.” (Anzaakaa 15:1) U fatyô u tan asenge sha mi je kpaa. U tesen ikyav yô, aluer or ngu hiin wer ér u kehe er apon-shôhô yô, u fatyô u timin akende kaan a nan wer, “Me soo kpa me pande undu, ne fa gaa?”

• KAR KERA VING. Gumkwase ugen u lun anyom 19 mba yer un ér Nora. A kaa ér, “Ka wea ungwa ato sha kwagh yô, i tese ér u kav kwagh shi u hemba or u nan hiin we la. Kwagh la ka a tese ér u ngu a ieren i kôron iyol tsaha, kpa or u hiin we la nan ngu a mi ga.” —2 Timoteu 2:24.

• DE CIAN KWAGH GA. Mbahiin ior kpishi ka vea nenge a or u cian kwagh, shin or u vea hii nan kpa nana er ve kwagh ga je ve fa. Kpa mbahiin ior mbagenev kpishi ka vea nenge ér u cian kwagh ga yô, ve de u zan we iyol.

• ÔR ORGEN. Kwase ugen u yange lu tica yô, kaa ér: “M ngu kaan a hanma gumor cii mer, aluer or ngu hiin nan yô, nana ôr. Ka kwagh u u er ve a wase u je la, shi kwagh la una na nana kera hii orgen iyongo ga.”