Tingim dispela: Thomas i no laik go long skul tude. Na em i no laik go tumora tu. Em i no gat laik tru long go long skul. As bilong dispela em samting i bin kamap 3-pela mun i go pinis taim ol wanskul bilong em i mekim ol tok i bagarapim tru nem bilong em. Na ol i kolim em kain kain nem. Sampela taim, wanpela bai sakim ol teks buk bilong Thomas i go pundaun na priten olsem em i bin popaia na mekim, o sampela taim sampela mangi i kam baksait long em na wanpela bai pusim em, na taim Thomas i tanim, em i no inap luksave husat i mekim. Asde ol samting i go nogut moa taim Thomas i kisim wanpela mesis long sosel netwok i gat tok long sampela samting nogut ol bai mekim long em . . .

Sapos yu Thomas, bai yu mekim wanem?

Yu gat strong long mekim samting! Yu inap sakim ol lain i save buli na yu no ken pait. Hau bai yu mekim?

•   NO KEN BELHAT HARIAP. Baibel i tok: “Man i no gat gutpela tingting i save larim belhat bilong en i kamap ples klia. Tasol man i gat gutpela tingting i save pasim belhat bilong em yet.” (Sindaun 29:11) Sapos yu bosim bel na stap isi, dispela lain i buli long yu, ol bai les na lusim yu.

• NO KEN BEKIM RONG. Baibel i tok: “No ken bekim pasin nogut long man i mekim pasin nogut long yupela.” (Rom 12:17) Pasin bilong bekim rong bai mekim hevi i go bikpela.

• ABRUSIM OL LAIN I SAVE BULI. Baibel i tok: “Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.” (Sindaun 22:3) Sapos yu inap, abrusim ol lain i save mekim trabol na ol samting we inap mekim ol narapela i buli long yu.

• BEKIM TOK ISI. Baibel i tok: “Sapos man i belhat long yu, orait bekim tok isi long em, na bai belhat bilong en i dai.” (Sindaun 15:1) Yu ken traim mekim pani liklik. Olsem, sapos wanpela mangi i tokim yu olsem yu pat tumas, yu ken lap na tok, “Ating mi ken lus weit liklik!”

• LUSIM NA GO. Nora i gat 19 krismas i tok: “Taim yu pasim maus tasol na yu no bekim tok, dispela i soim olsem yu gat strong moa winim husat i buli long yu. Dispela i soim olsem yu inap bosim gut yu yet—lain bilong buli i no gat dispela pasin.”​—2 Timoti 2:24.

• BILIP STRONG LONG YU YET. Ol lain bilong buli inap luksave long husat i gat tupela tingting long ol yet na husat i no inap bekim pait long ol. Tasol planti lain bilong buli bai lusim yu sapos ol i lukim olsem yu no larim ol i kontrolim yu.

• TOKIM WANPELA. Wanpela tisa i tok: “Mi bai kirapim ol pikinini long tokaut sapos wanpela i buli long ol. Em rait samting long mekim, na dispela inap pasim ol long buli long ol narapela pikinini.”