Mafaufau ki te tulaga tenei: E se fia fanatu a Tomasi ki te akoga i te aso nei. Io me taeao. Io me se toe fia fano eiloa. Ne kamata mai eiloa i te tolu masina ko ‵teka i te taimi ne fakasalalau atu ei ne tamaliki i tena akoga a tala fakamasei e uiga ki a ia. Fakamuli ifo, ko ka‵laga mai i igoa fakaitaita. I nisi taimi, e ‵pa ne se tino ana tusi mai i ana lima kae fai pelā me se mea tupu fakafuasei, io me se tino i se potukau e ‵tule atu ne ia tou tagata mai i ana tua, kae i te taimi e kilo atu ei a Tomasi ki ana tua, ko se mafai o iloa ne ia a te tino ne ‵tule ne ia a ia. I te aso anafi, ne momea aka te ma‵sei o amioga fakasaua i te taimi ne maua ei ne Tomasi a pati fakamatakutaku i te itaneti . . .

Moi fai koe ko Tomasi, ne a au mea ka fai?

E se fakauiga i ei me ko seai eiloa sou malosi! A te ‵tonuga loa, e mafai eiloa ne koe o fakatakavale se tamaliki amio fakasaua e aunoa mo te fakaaogaga o ou lima. E pefea la?

•   SA SAGA KI EI. E fai mai te Tusi Tapu: “A tino va‵lea e vave fakaasi olotou kaitaua, ka ko tino ata‵mai e kufaki ne latou olotou ita.” (Faataoto 29:11) Kafai e se saga atu koe ki ei—e auala i foliga i tua—e mafai eiloa o se toe fia ‵saga atu a tino kolā e amio fakasaua atu.

• SA TOE TAUI ATU. E fai mai te Tusi Tapu: “Sa taui atu te masei ki te masei.” (Loma 12:17) A te taumafai o taui atu ka fai fua ke momea aka te masei o te tulaga tenā.

• FAKA‵MAO MAI FAKALAVELAVE. E fai mai te Tusi Tapu: “A tino ‵poto e lavea ‵mao ne latou a fakalavelave, tela la, e faka‵mao keatea mai i ei.” (Faataoto 22:3) Ke taumafai malosi eiloa o ‵kalo keatea mai tino kolā e mafai o faka‵tupu fakalavelave mo tulaga kolā e mafai ei o fakasaua atu.

• TOFOTOFO KI SE TALI FAKAOFOOFOGIA. E fai mai te Tusi Tapu: “A te tali i te leo filemu e galo ei te kaitaua.” (Faataoto 15:1) E mafai foki eiloa o fai fa‵kata atu koe. E pelā mo te mea tenei, kafai e fai atu a te tamaliki amio fakasaua me i a koe ko tō ‵fula, e mafai o fakagasue‵sue atu ou tuauma kae fai atu, “Kāti la e mafai ne au o ‵kati ifo ki lalo ne nai pauna!”

• FANO KEATEA. “E fakaasi atu i te nofo filemu me i a koe ko matua ‵lei kae e malosi atu koe i lō te tino telā e fakaitaita atu ki a koe,” ko muna a Fola, telā ko 19 ana tausaga. “E fakaasi atu ei a te loto pulea—se mea telā e se maua ne se tamaliki amio fakasaua.” —2 Timoteo 2:24.

• GALUE MALOSI KE MOMEA AKA TOU LOTO TALITONU. E mafai o iloa ne tino amio fakasaua a tino kolā e manatu mā‵ma faeloa ki a latou eiloa kae e se mafai o taua atu ki a latou. E ‵kese mai i ei, ka se toe ‵saga atu a tino amio fakasaua māfai e iloa ne latou me e se mataku koe i a latou.

• FAI ATU KI SE TINO. E fai mai se faiakoga mua: “E fakamalosi atu au ki so se tino telā ne fakasauagina, ke fakailoa mai. Ko te mea tonu eiloa e ‵tau o fai, kae e puipui ei se tino mai i amioga fakasaua.”