UIRAA 5
E nafea i mua i te haamǎtaˈuraa i te fare haapiiraa?
EAHA TA OE E RAVE?
Feruri na i teie tupuraa: I teie mahana, aita Toma e hinaaro faahou ra e haere i te haapiiraa. No te aha? E toru avaˈe i muri, ua haaparare to ˈna mau hoa haapiiraa i te parau ino mau no nia ia ˈna. E tuô ratou ia ˈna ma te mau iˈoa faaooo. I te tahi taime, e faatopa vetahi i ta Toma mau buka a parau atu ai e aita ratou i haapao. Aore ra e turaihia o ˈna na muri, aita râ o ˈna i ite na vai. E inanahi ra, mea peapea roa ˈtu â. Ua haponohia ia Toma te tahi parau haamǎtaˈu na nia i te Internet . . .
Mai te peu o oe o Toma, eaha ta oe e rave?
A PARAHI E A FERURI!
E nehenehe ta oe e aro atu ma te ore e moto! E nafea?
-
EIAHA E PAHONO ATU. Te parau ra te Bibilia: “E faahope te maamaa i to ˈna manaˈo i rapae; area te taata paari e tapeapea ïa e ia maoro iti aˈe.” (Maseli 29:11) Ia vai mǎrû noa oe, eita tera mau taata e anaanatae faahou ia oe.
-
EIAHA E FAAHOˈI ATU. Te parau ra te Bibilia: “Eiaha roa te ino e tahoohia i te ino i te taata atoa nei.” (Roma 12:17) E ino atu â te tupuraa ia tahoo oe.
-
EIAHA E HAERE I TE VAHI E FIFIHIA ˈI. Te parau ra te Bibilia: “E ite te taata haapao i te ino, e ua ape ihora.” (Maseli 22:3) Ia nehenehe, a ape i te feia e i te vahi e fifihia ˈi oe.
-
A TAMATA I TE PAHONORAA MANAˈO-ORE-HIA. Te na ô ra te Bibilia: “O te parau mǎrû ra tei faaore i te riri.” (Maseli 15:1) A tamata i te parau hoata. Ei hiˈoraa, ia faaooo-noa-hia oe e mea poria oe, e nehenehe oe e parau noa ˈtu: “E! Ua ite iho â vau e e tia ia haapararai!”
-
A HAERE. Te na ô ra Nora, 19 matahiti: “Ma te ore e pahono atu, e faaite oe e mea paari oe i roto i te feruriraa e e mea puai aˈe oe i tera taata e haamǎtaˈu maira. Oia atoa i to oe faaoromai, te tahi mea aita ta tera taata.”—Timoteo 2, 2:24.
-
A FAAITE I TE TAIÂ ORE. E ite maitai te feia haamǎtaˈu i te taata o te ore e tiaturi ia ratou iho e o te taiâ hanoa. Ia ite râ tera mau taata e eita oe e vaiiho ia ratou ia faatere ia oe, e haere atu ïa ratou.
-
A FAAITE I TE OHIPA E TUPU RA. Te na ô ra te hoê orometua tei haapii na i te tamarii: “Ia haamǎtaˈuhia oe, a paraparau. O te ohipa tano e rave ia ore atoa te reira ia tupu i nia i te tahi atu taata.”
Maoti te taiâ ore, e fanaˈo oe i te hoê puai aita ta tera taata haamǎtaˈu
E au atoa outou . . .
HOHOˈA PAPAIHIA
Ia upootia oe ma te ore e tupai!
E ite oe no te aha e hamani-ino-hia ˈi vetahi e eaha te ravea no te upootia.
A ARA MAI NA!
E nafea ia patoi i te faaheporaa a te tahi atu taurearea?
E nehenehe te taata maitai e rave i te ohipa ino i mua i te faaheporaa. Eaha te tia ia ite e e nafea ia patoi i te reira?
