Vwẹ ẹro roro udje nana: Thomas guọnọ kpo isikuru nonẹna-a. Yẹrẹ odẹ rọ chana-a. Ọ tobọ guọnọ ra ọfa-a. Ọnana tonphiyọ emeranvwe erha re wanre, ọke rẹ emọ rẹ isikuru rọyen vwo gun oborẹ o ruru-u nene asan eje. Ọtiọyena, kẹ ayen se odẹ sansan. Ọkiọvo, ohwo ọvo me teyen ẹbe rẹ Thomas she nẹ obọ rọyen kerẹ asan a da mrẹ nẹ ọ chọrobọ, yẹrẹ ohwo ọvo vwẹ usun rẹ ihwo re yan vwẹ obuko rọyen mi geren, Thomas de kuomarhẹriẹ, o se vughe ohwo ro ruro-o. Odẹ rọ wanre na, oshenyẹ na da ganphiyọ ọke ra vwọ vwẹ ovuẹ rẹ uguegue vwo rhe womarẹ intanẹti . . .

Ọ da dia owẹ yen Thomas, die wo che ru?

O vwo obo wo se ru! Vwọrẹ uyota, wọ sa vwẹ aghwanre vwo phi oshenyẹ kparobọ. Idjerhe vọ?

•   WỌ KPAHEN OTA-A. Baibol na da ta: “Ẹkpa ri di muẹ van gudu gudu, ẹkẹvuọvo ọvwaghwanre jomaotọ rhivwẹ ophu rọye rọ.” (Isẹ 29:11) Wọ rha kpahen ota-a, ihwo ri shenyẹ wẹ na cha kpairoro vrẹ wẹ.

• WO RU ORUKERI-I. Baibol na da ta: “Wọ vwẹ umwemwu hwa osa rẹ umwemwu-u.” (Rom 12:17) Orukeri cha nẹrhẹ oshenyẹ na ganphiyọ.

• KẸNOMA KẸ OKPETU. Baibol na da ta: “Ọvwiroro da mrẹ ukpokpogho rọ cha ko sioma rọye reyọ.” (Isẹ 22:3) Davwẹngba vwọ kẹnoma kẹ ihwo re sa so okpetu, je kẹnoma kẹ ẹdia re sa nẹrhẹ e shenyẹ wẹ.

• VWẸ ẸKPAHỌNPHIYỌ RA RHẸRO RỌYE-EN VWỌPHIA. Baibol na da ta: “Ota vwiọrọ vwiọrọ fue ophu.” (Isẹ 15:1) Wọ sa davwen wọ hwẹ. Kerẹ udje, ohwo ro shenyẹ wẹ na da vuẹ wẹ nẹ wọ rhuoma nọ, wọ sa vuẹ, “Mi rorori nẹ mi se siame emerha!”

• VRẸN NẸ ASAN NA. “Wọ da fọ ọyen odjephia nẹ wo tedje, wọ je gan nọ ohwo ro shenyẹ wẹ na,” ọtiọyen Nora rọhẹ ẹgbukpe 19 tare. “Ọyen odjephia rẹ omaẹriẹnsuon, rọ dia emu ọvo rẹ ohwo ro shenyẹ wẹ na vwori-i.”—2 Timoti 2:24.

• FIUDUGBERI. Ihwo ri shenyẹ ohwo fobọ riẹn ohwo ro ni oma rọyen fiemu-u, rọ je cha sa họnre-e. Vwọ fẹnẹ ọyena, buebun rẹ ihwo ri shenyẹ ohwo che sioma reyọ siẹrẹ ayen da riẹn nẹ wọ djoshọ raye-en.

• VUẸ OHWO KPAHỌN. Oyono rẹ isikuru ọvo rọ dobọ rẹ uyono ji re da ta: “Mi che jiro kẹ kohwo kohwo re shenyẹ nẹ ọ vuẹ ohwo ọfa. Ọyen obo ri me yovwin, o ji se sivwin ohwo ọfa nẹ obọ rẹ ihwo ri shenyẹ ohwo.”