Mo berẽnga kurii gi kpiapai re: Toma aidanga ka ndu ku sukuru yo areme te, gba a te, na berewe a te. Si atona rogo agu adiwi susi biata kusayo re, ho gako agude sukuru agbandaka kere ziree ni ti rimoko, na kini sangi arimowia kurii ko. Ti kura aregbo, gude naye ki narĩ ga Toma awaraga beko kini mangi tiru nga u naainongo aino te, watadu boro sa dagba dungu aboro yo nasiko ko, ho ko nika ngera ni kusayo ka ko ainongo da du nisiko ko ya. Gba re, apai agberẽ berewe gbe ho Toma abi gupai ni nga i naserã ko rogo Internet . . .

Ka singia mo nga Toma, ginipai ka mo mangihe?

Anga si nga ome tiro te te! Mo ima rengba ka ta borogbatapai zanga bunia. Wai?

•   KA MO KARAGANGA PAI YA. Baibiri naya: “Mumungo boro nakusa gani zinga akusa dunduko, ono boro tatamana naka na gani zinga ki zeresi he.” (Asanza 29:11) Ka mo azinganga ya, agu aboro nagbata ro na pai ima rengba ka mbu ro.

• KA MO KARAGANGA GBEGBERẼPAI YA. Baibiri naya: “Ka oni karaga nga gbegberẽpai fu boro ku ba gbegberẽpai wa sa ya.” (ARomo 12:17) Karaga gbegberẽpai nagberesa apai kina kumbatayo.

• KA MO RIMINGO KU ROGO KEREPAI YA. Baibiri naya: “Ngangarã boro nabi kere pai, ki gbu.” (Asanza 22:3) Mo asadi nyanyaki ka ne agu aboro rengbe ka rimiso ro ku rogo pai, na ki ne agu abangiriba rengbe yo ka gbata ro rogoho na pai.

• MO KARAGAPAI WENENGAI. Baibiri naya: “Zezeredi karagapai nazeresa zinga.” (Asanza 15:1) Mo rengbe arengba a ka fura ni wia. Ni kpiapai, ka boro ya foro mo kii wakina kpata bumo, mo rengbe ka idaha ki ya, “Ii, mi nabihe nga si naida mi zogora azogora tooni!”

• MO GUARI HO. Nora du garãri nga 19 aya: “Onga aonga nayugo gupai nga mo nga ngangarã boro na mo ima nyaka kisusi gu boro nafuda ro. Si nayugo gupai nga mo na zatise, nga guhe adunga ti abagbatapai ya.”—2 Timoteo 2:24.

• MO DU NA KIDO KUTI TIRO. Si taata fu abagbatapai i ini gu boro adunga na kido kuti tiní ya na arengbanga ka mangapai nyanyaki ya. Ono dunguyo rengbe arengba ka mbu gbatapai ka i bi gupai nga mo ambunga yo i kuru kuriro te.

• MO PEHE FU KURA BORO. Kuru bayugupai sa aya: “Mi anaaya fu agude wẽ, ka boro agbata yo na pai, i pehe. Si nga gu wenepai si aida boro mangihe, na si rengbe arengba ka banda boro be gu gbatapai nga ga kura aboro.”