Mo susu si fɔfɔɛ nɛ ɔ he nɛ o hyɛ: Benɛ Brian na e sukuu bi enyɔ nɛ a ma a, e mi mi sã lɛ. Otsi nɛ ɔ mi pɛ ɔ, a ka si enyɔ sɔuu kaa a ma ha nɛ e nu sigaleti. A ma lɛ kami nɔ́ nɛ ji si etɛne.

Kekle nyumuyo ɔ de ke:

“Huɛ” ɔ nɛ e ngɛ tsɔɔe ɔ ngɛ e kotoku mi. E kɛ e nine wo e kotoku ɔ mi nɛ e je nɔ́ ko kɛ ngɛ Brian hae.

Brian na sigaleti ngɛ nyumuyo ɔ nguɛ kpɛ. Brian mi mi sã lɛ wawɛɛ nitsɛ.

Ke mo ji Brian ɔ, mɛni o maa pee?

Anɛ Brian huɛmɛ ɔmɛ susu nɔ́ nɛ a ngɛ pee ɔ he saminya lo? Anɛ mɛ nitsɛmɛ nɛ a ma a juɛmi nya si kaa a maa pee jã lo? Dɛbi. Behi fuu ɔ, nihi lɛ a nyɛɔ a nɔ nɛ a peeɔ jã. A suɔ kaa a maa sa nihi a hɛ mi, enɛ ɔ he ɔ, a haa nɛ nihi tsɔɔ mɛ nɔ́ nɛ a pee.

Ke o juami bi ngɛ o nɔ nyɛe kaa o pee nɔ́ ko kaa jã a, mɛni blɔ nɔ o maa gu kɛ da nya?

1. MOO HYƐ BLƆ

   Baiblo ɔ de ke: “Nɔmlɔ nɛ le nɔ́ ɔ, ke e na haomi nɛ ma a, e tuu nya fo, nɛ e ya laa e he. Nɔ nɛ be juɛmi ɔ, lɛɛ e kɛ e he ya woɔ haomi mi, nɛ e naa nɔ́.”​—Abɛ 22:3.

   Behi fuu ɔ, ke haomi ko ma a, o ma nyɛ maa na. Kaa nɔ hyɛmi nɔ́ ɔ, ngɔɔ lɛ kaa o na sukuu bi komɛ nɛ a bua a he nya nɛ a ngɛ sigaleti nue. Ke o hyɛ nyagba nɛ maa ba a blɔ ɔ, lɔ ɔ ma ha nɛ o maa le bɔ nɛ o ma tsu he ní ha.

2. MO SUSU HE

   Baiblo ɔ de ke: “Nyɛ he nile ko bu nyɛ fɔ.”​—1 Petro 3:16.

   Mo bi o he ke: ‘Ke i ya piɛɛ sukuu bi nɛ ɔmɛ a he ɔ, anɛ i be ye he piae pee se lo?’ Ngɛ anɔkuale mi ɔ, lɔ ɔ ma ha nɛ o maa sa o juami bi ɔmɛ a hɛ mi be kpiti ko mohu lɛɛ, se anɛ o be o he piae pee se lo? Anɛ o suɔ kaa o je mi bami nɛ puɛ konɛ o sa o sukuu bi ɔmɛ a hɛ mi lo?​—2 Mose 23:2.

3. MOO MA O JUƐMI NYA SI

   Baiblo ɔ de ke: “Ní lelɔ yeɔ sane gbeye; e hyɛɛ e he nɔ saminya.”​—Abɛ 14:16.

   Kokooko ɔ, e ma bi nɛ waa ma wa juɛmi nya si ngɛ nɔ́ ko he, nɛ ke nɔ́ ko je mi kɛ ba hu ɔ, e sa nɛ waa pɛtɛ he. Baiblo ɔ tu nyumuhi kaa Yosef, Hiob, kɛ Yesu a he munyu. Mɛ tsuo a pee juɛmi nɛ da. E tu Kain, Esau, kɛ Yuda hu a he munyu. Mɛɛ lɛɛ a pee juɛmi nɛ dɛ. Mɛni moo o maa pee?

Baiblo ɔ de ke: “Moo ye anɔkuale.” (La 37:3, NW) Ke o kɛ haomi ko yaa kpe nɛ o sɛ hlami susu níhi nɛ ma nyɛ maa je mi kɛ ba a he nɛ o pee juɛmi ngɛ he ɔ, e be yee ha mo kaa o maa da nya, nɛ o ma ná he se wawɛɛ.

Koo ye tsui, e he hia we nɛ o tsɔɔ o juami bi ɔmɛ níhi a nya fuu. Eko ɔ, nɔ́ kɛkɛ nɛ e he maa hia kaa o pee ji, o kɛ kã ma de ke DƐBI. Aloo ke o sume kaa a ya nɔ nɛ a hao mo ɔ, o ma nyɛ ma de mɛ ke:

• “Nyɛ ko bu mi kɛ piɛɛ nyɛ he!”

• “Imi lɛɛ i pee we jamɛ a ní ɔmɛ!”

• “Tse nyɛ le mi momo kaa i pee we jã!”

Nɔ́ nɛ e he hia ji kaa o kɛ kã ma ha mɛ heto mla. Ke o pee jã a, e maa pee mo nyakpɛ kaa o juami bi ɔmɛ maa je o kasa mi amlɔ nɔuu!

Ke o juami bi yeɔ o he fɛu hu nɛɛ? Ke a bi mo ke, “Mɛni sane, sawaletsɛ ji mo lo?” Naa he fɛu yemi nɛ ɔ kaa e ji juami bi a nɔ nyɛmi. Kɛ o ma nyɛ maa pee o ní ha kɛɛ? Ke e hí kulaa a, o ma nyɛ maa pee ní enyɔ komɛ.

• O ma nyɛ maa kplɛɛ nɔ ha mɛ kaa sawaletsɛ ji mo. (“Ee, sawaletsɛ ji mi!” Lɔ ɔ se ɔ, moo tsɔɔ mɛ nɔ́ he je nɛ o ngɛ gbeye yee ɔ nya kpiti.)

• O ma nyɛ ma de nɔ́ ko kɛ gbe mɛ zo. Tsɔɔ mɛ nɔ́ he je nɛ o kua nɔ́ nɛ a ke o pee ɔ. Lɔ ɔ se ɔ, ha nɛ a susu a yi mi. (“I le kaa nyɛ hɛ mi tɛ saminya, lɔ ɔ he ɔ, i hyɛ we blɔ kaa nyɛ maa nu sigaleti!”)

Ke loloolo ɔ, o juami bi ɔmɛ ngɛ o he fɛu yee ɔ, jee a he! Mo kai kaa ke o se kɛ ngɛ a ngɔ ɔ, a ma nyɛ maa nyɛ o nɔ nɛ o pee nɔ́ nɛ a ngɛ mo dee ke o pee ɔ. Ke o je lejɛ ɔ, lɔ ɔ tsɔɔ kaa o sume nɛ nihi nɛ a tsake o je mi bami.

Ngɛ anɔkuale mi ɔ, o be nyɛɛe maa laa o juami bi ɔmɛ. Se o ma nyɛ maa ma o juɛmi nya si ngɛ nɔ́ nɛ o suɔ kaa o maa pee ɔ he, nɛ o ma nyɛ ma de mɛ o juɛmi, konɛ o fia o pɛɛ si kaa o maa pee jã. Nyagbenyagbe ɔ, nɔ ko be nyɛe maa nyɛ o nɔ!​—Yoshua 24:15.