Мындый учуралды сананып кӧр: Брайанга эки уул базып келедири. Оныҥ јӱреги сертилдеп баштайт — бу неделеде олор оны таҥкыладарга эки катап албадаган. Эмди ӱчинчи катап.

Баштапкызы айдат:

«Бир неме» деген сӧстӧрди ол ӱниле аҥылап айдат. Ол карманына колын сунуп, нени чыгарып келерин сен билериҥ. Таҥкыны. Брайанныҥ јӱреги оноҥ тыҥ согулып јат.

— Јок. Мен айттым не слерге...

База бирӱзи таҥкыны Брайанныҥ оозына јууктадып, сӱмелӱ кӱлӱмзиренет:

— Бис кемге де айтпазыс. Кем де билбес.

Сен Брайанныҥ ордына болгон болзоҥ, нени эдер эдиҥ?

Бу эки уул бойлоры нениҥ учун танкылайт? Олор бойыныҥ кӱӱниле эдет пе? Јок, болбой. Олорго ӧскӧ јииттердиҥ салтары једет. Јииттердеҥ башка болбоско, олордыҥ кӧрӱм-шӱӱлтезиле јӱредилер.

Бого тӱҥей учуралга туштазаҥ, јииттердиҥ салтарыла јӱрбей, карын бойыҥныҥ кӧрӱмиҥле јӱрерге сеге не болужар?

1. ОЗОДОҤ БИЛИП ТУР

   Агару Бичикте айдылат: «Сескир кижи тӱбекти кӧрӱп јажынат, је ченемел јоктор ичкери баргылап, кату каруузына тургулайт» (Укаа сӧстӧр 22:3).

   Кӧп сабада тӱбекти озодоҥ кӧрӱп ийерге јараар. Темдектезе, барып јаткан јолыҥда кожо ӱренип турган балдар ончозы таҥкылап турат. Айалганы озодоҥ кӧрӱп, сен тӱбектеҥ кыйар аргалу.

2. ШӰӰП САНАН

   Агару Бичикте айдылат: «Ару уйатту болугар» (Петрдыҥ 1-кы самаразы 3:16, ЈТ).

   «Мен јииттердиҥ кӧбизи чилеп этсем, кийнинде не болор?» — деп, бойыҥнаҥ сура. Јажыт балдар сеге канча да кире ӧйдиҥ туркунына тийбей барар болор, је кийнинде сеге кандый сезимдер келер? Олорго јараарга, сен бойыҥныҥ бӱдӱмјиҥле јӱрбеске белен бе? (Чыгыш 23:2).

3. НЕНИ ЭДЕРИН ШӰӰП АЛ

   Агару Бичикте айдылат: «Кижи нени ӱрендеер, оны јууп алар» (Галаттарга 6:7).

   Сеге тӱҥей ле бир-бирӱзин талдаар керек, кийнинде талдаганыҥныҥ каруузына турарыҥ. Агару Бичикте чын талдаш эткен Иосиф, Иов, Иисус Христос керегинде бичилген. Анайда ок ойгор эмес талдаш эткен Каин, Исав ла Иуда Искариот деген улус керегинде бичилген. Сен нени талдаарыҥ?

Агару Бичикте айдылат: «Јакшыдаҥ тудуныгар» (Римдегилерге 12:9). Керектериҥ неге экелерин шӱӱп сананып алала, кандый бир шӱӱлтеге келген болзоҥ, сеге бойыҥныҥ кӧрӱмиҥди айдарга јеҥил болор. Мынаҥ улам јаан сӱӱнчи аларыҥ.

Јажыт балдарды билеркеп ӱретпес керек. Кӧп сабада јӱк ле «јок» деп айдып салары једет. Эмезе оноҥ бӱдӱмјилӱ айдарга турган болзоҥ, мынайып айдарга јараар:

• «Оны мен јокко эдер!»

• «Бу керегинде куучындашпазым да!»

• «Слер мениҥ кӧрӱмимди билерер!»

Эҥ ле учурлузы — каруу берерге ӧйди чӧйбӧс керек ле бӱдӱмјилӱ айдар керек. Олордыҥ сеге тийбей баргандарын кӧрӱп, кайкаар болорыҥ!

Јажыт балдар сеге каткырыжып турза, нени эдер керек? Темдектезе, олор: «Не, коркый бергеҥ бе?» — дежет. Ундыба: каткырыш — ол балдардыҥ базынар аргаларыныҥ бирӱзи. Канайып удура турар? Сенде ас ла салза эки арга бар:

• Каткырышка јӧпсинер. («Эйе, мен коркып јадым! Мен... кӱӱним јок».)

• Удурлажар. Мойноп турганыҥныҥ шылтагын јартап бер, оноҥ олордыҥ сагыжын кийдире айт. («Слер санаалу улус, је тенексӱ керектер эдип јадыгар!»)

Јажыт балдар оноҥ ло ары каткырыжып турза, јӱре бер! Канча ла кире узак артсаҥ, ончо ло кире тыҥ базынгылаар. Јӱре бергениҥле, сени ӧскӧ улус башкарзын деп кӱӱнзебей турганыҥды кӧргӱзериҥ.

Јажыт балдар салтарын чек јетирбезин деп, кыйып болбозыҥ. Је сен бойыҥныҥ бӱдӱмјилериҥнеҥ тудунып, олорды чыгара айдып, айалганы колго тудуп турар аргалу. Нени талдаарын бойыҥ кӧрӧриҥ! (Иисус Навин 24:15).