PENJI MI 6
Acopo cerara nenedi ikum cwal m’aradu wada gibecwala ko nitimo lembe marac?
ICOPO TIMO ANG’O?
Kepar lembe mae: Kinde ma Brian uneno awiya ma gisomo kugi gibebino, cwinye ukwong’o nipido. Ikind yenga maeni kende ci gidiye wang’ ario nia emadh taba. Eni ubecidoko wang’ mir adege.
Jalawobi mi kwong’o uyero ire kumae:
“Tin de ibedo kendi? Wek anyuth iri jarimo moko.”
Kinde m’ebeyero wec “jarimo”, epadu gok Brian, e ing’eye ewodho piny moko kud i jeba man ebemio ire.
Brian uneno ediyo taba i the cinge, e cwinye ucaku nipido dong’ magwei.
Brian uyero kumae. “Aparu nia adaru yero iwu nia amadhu ngo . . .”
Jalawobi mir ario ung’olo dhoge: “Aaaah, ilwor dit!”
“Alwor ungo!” Brian unwang’u tegocwiny mi weco kugi.
Jalawobi mir ario uketho cinge i gok Brian man eyero ire nya yoo yoo, “Gam gin no do!”
Jalawobi mi kwong’o unyutho taba iwang’ Brian man emung’ i the ithe kumae: “Wabiyero ngo ni ng’atu moko. Ng’atu ma bing’eyo de mbe.”
Ka nwang’u itie Brian, nwang’u icopo timo ang’o?
KEPAR!
Nyo andha juwadi Brian ging’eyo gin ma gibetimo? Nyo eno utie yub ma gimaku gin gigi? Ve nia ungo. Wang’ mapol, aradu mange re ma becwayu wang’ juwagi kara gicidh gisend jumange. Gimito nia dhanu ufoygi, pieno re m’uketho gitimo i abinga, lembe ma dhanu mange de ubetimo.
Ka nwang’u inweng’iri iwang’ lembe ma calu pa Brian, nwang’u icopo timo ng’iong’ic makani m’ukoc ku migi, man icopo ceriri nenedi ikum cwal ma gibecweli ko nitimo lembe marac?
-
LAR INEN BOR
Biblia uwacu kumae: “Ng’atu ma won pidoic neno dubo, man epondo; Ento ju ma cobo kadhu, man gisendri pire.”
—Lembrieko 22:3. Icopo lar neno lembe marac ma fodi etundo ngo. Ku lapor, ineno awiya wedu mi somo gicoko dhogi gibemadhu taba. Kan ilar ineno lembe ma biwok, ibing’eyo lembe m’icopo timo kara peko kud unweng’i.
-
PAR LEMBE
Biblia uwacu kumae: ‘Wubed ku pidocwiny ma ber.’
—1 Petro 3:16. Kepenjiri kumae: ‘Kan atimo lembe m’udul ubetimo, abiwinjara nenedi i ng’eye?’ I andha, gicopo meri pi nindo moko. Kan ing’eye ke? Nyo imito inyoth gin m’unyutho nia itie Jakristu, pi ninyayu mutoro i awiya wedu mi somo?
—Ai 23:2. -
MAK YUB
Biblia uwacu kumae: “Ng’atu ma riek [bedo ku wang’e].”
—Lembrieko 14:16. Kadok awene, wabitimo ng’iong’ic moko kokoro ma wabinwang’u adwogine. Biblia ukoro nia Yosefu, Yob, man Yesu gitimo ng’iong’ic maber. Ewacu bende nia Kain, Esau, man Yuda, gitimo ng’iong’ic marac. In ke ibitimo nenedi?
Biblia uwacu kumae: “Ng’atu ma en e mandha i gin ma nyathigi en e mandha bende i gin ma dit.” (Luka 16:10) Kan idaru niparu pi matoke ma copo wok, man imaku yub m’ukwayere, ebibedo yot iri nikoro pi cungo peri, man ibinwang’u matoke maber.
Lworo kud unegi, icikiri ngo nithebo the wec kugi. Icopo yero igi terere m’umbe niloko paru peri nia AKWERO. Kunoke, pi ninyutho nia ibeloko ngo pidoic peri, icopo yero kumae:
-
“Kud wuroya i lembe mwune!”
-
“Atimo ngo kit timo ma kumeno!”
-
“Aneno ve nia fodi wung’eya ngo!”
Ukwayu niculogi wang’ acel ke ku tegocwiny. Kan itimo kumeno, aradu wedu gibiweko ndhundhu nicweli nitimo lembe marac!
LEMBE M’IROMO TIMO KA JUBENYWERI
Kan iyio cwal ma jumange gibecweli ko, nwang’u idoko ve macin ma gibetio ko
Iromo timo ang’o kan aradu wedu gibenyweri? Ka gibeyero kumae: “Ang’o m’ubetimi, ilwor dit!” Ng’ei ndhu nia eno tie kit wec ma gibecweli ko nitimo lembe marac. Icopo dwoko wang’ wec maeno nenedi? Itie ku lembe ario kumeni m’icopo timo.
-
Icopo yio wec maeno (“Wuyero ber, alwor andha!” Ing’eye kor i adundo thelembe m’uketho ilwor.)
-
Icopo ng’olo mac ku mac. Cak ku nikoro igi nia pirang’o ibekwero man ing’eye kor igi lembe i kite ma biketho ginyang’ nia lembe ma gibetimo tie rac. (“Wun de kara wumadhu taba! Ageno nia wuriek lee!”)
Kan aradu wedu gibemedo niweco, ai cen ku keca! Ng’ei nia kan itie asu keca, gibimediri ninyweri magwei. Ento kan iai kud i vutgi, nwang’u ikwero nia jumange kud unyoth gin m’unyutho nia itie Jakristu.
I andha, icopo ngo niringo cwal m’aradu wedu gibecweli ko. Ento icopo ning’io gin m’ukwayu itim, nikoro ni jumange pi cungo peri, man ning’eyo nitelo wii giri. Ng’ei nia in re m’icikiri nitimo ng’iong’ic!
