Rakiduamnge tüfachi rupan dungu: David weda duami ñi pefiel epu weche ñi fülkülepan. Epu rupa dewma feypingey ñi pütremtual. Ka fewla ka kiñe rupa feypingeay ñi pütremtual.

Kiñe feypieyew:

Bolsillo mew nentuy ñi pütrem, ñikefkünuleleyew, ka feypieyew ñi nentuñmual kiñe pütrem.

David pey ti pütrem tati weche ñi kuwü mew, fey doy pellkeluwi.

Eymi rupafulmi David reke, ¿chumafuymi?

¿Chem pimi kay? David tañi pu kompañ, ¿rüf kimingün ñi chummeken? ¿Kidutu dullikeyngün ñi femal? Femkelayngün chi. Inayentukefingün ñi femkeel kakelu pu weche. Ayüleyngün ñi llowaetew, feymu eluñmakefi kakelu pu che ñi feypiaetew ñi chem chumal.

Feychi dungu mu rupafulmi, ¿chumngechi küme femafuymi tami newentuleal ngüchaltukungen mu?

1. PEPIKAWNGE

   Tati Biblia feypiley: “Feychi che kimün nielu ngüneduamkey ti kuñiwün dungu, fey ellkawkey, welu tati nienolu kimün fey mu rupakey ka kutrankawkey” (Proverbios 22:3).

   Eymi peafuymi ñi küpalen kiñe weda dungu. Rakiduamnge tami trekalen, fey müley kiñeke wechekeche pütremtumekelu. Pepikawülmi, kimaymi chumngechi chaftuafiel feychi weda dungu.

2. RAKIDUAMNGE

   Tati Biblia feypiley: “Femaymün kümeke dungu femngechi nieaymün tüngkülechi rakiduam” (1 Pedro 3:16).

   Ramtuwnge: “Inayentufili ñi femmeken kakelu pu weche, ¿chum duamnagafun?”. Pichiñma mu müten weniyeafeymu tami pu kompañ. Welu, ¿chum duamnagaymi? ¿Elkünuafuymi tami chem chengen, femngechi tami llowaetew tami pu kompañ? (Éxodo 23:2.)

3. DULLINGE

   Tati Biblia feypiley: “Tati kimche kuñiwtukuwkey ka kiñe püle künuwkey ti wedake dungu mu” (Proverbios 14:16).

   Puway ti antü taiñ dullial chem tañi femal, fey rupachi antü mu kontuafeiñmu taiñ dullielchi dungu mu. Tati Biblia feypiley kiñeke wentru ñi küme dulliel engün, kiñeke tüfa: Jose, Job ka Jesus, welu ka nütramkakey kiñeke wentru weda dullilu, tüfa engün ta Kain, Esaw, Juda ka kakelu llemay. Eymi kay, ¿chumafuymi?

Tati Biblia feypiley: “Inayafimün ti kümeke dungu” (Romanu 12:9). Rakiduamülmi chem wedake dungu tami kontupayafetew ka dullikünulmi tami chumal, fey küdawngelayay tami feypial chem tami küpa femal, femngechi ayüwküleaymi.

Welu weda duamkilnge, duamfalngelay ñi afelafiel tami pu kompañ tami wiñoldungufiel. Newenkülen mu, feypiaymi: “Femlayan”. Kafey feypiafuymi tami eluwkülenon tami welurakiduamelnoaetew, femngechi femnge:

• “Koneltukenoeli”.

• “Iñche femkelan feychi dungu”.

• “Kimnieymi tañi rakiduamken”.

Tami küme tripayal, müley tami pürüm wiñoldungual newen mu. Femngechi femülmi, afmatuleweaymi tami pu kompañ tami ngüchaltukuwenoetew.

¿Ayentukeeymu tami pu kompañ? Feypikeeymu chi: “¿Chumimi am? ¡Llükanchengeymi!”. Rumel feypikeyngün tüfa tati pu ngüchaltukuchekelu. Feymu, ¿chumafuymi? Epu dungu femafuymi:

• Allküfaluwafuymi. Feypiafuymi: “Feyngey, llükalen”. Fey pichi feypiafuymi chumngelu tami femkenon.

• Welukünuafuymi chi dungu. Feypinge chumngelu tami femkenon, fey feypiafuymi: “Kimchengefulmi, pütremtulayafuymi”.

Welu amulele tami ayentuniengeel, lefmawnge. Longkontukunge: mülekalmi, doy ngüchaltukungeafuymi. Lefmawülmi, pengelaymi tami eluwkülen tami ngünenienoaetew.

Küme rakiduamaiñ: rumel müleayngün tati pu ngüchaltukuchekelu. Welu eymi dulliafuymi tami chem chumal, inanieaymi tami rakiduamken ka ngünenieafuymi chem ñi rupameken. Feymu llemay, eymi dulliafuymi tami chaftuafiel ti dungu (Josué 24:15).