SUNGKUNSUNGKUN 6
Songon dia Manundalhon Elaela ni Dongan?
AHA DO ULAHONONMUNA?
Rimangi ma situasi on: Lam taroktokan ma si Brian ala ro dua donganna tu lambungna. Saminggu on, nunga dua hali nasida mangelaela si Brian asa marisap. On ma na patoluhalihon.
Donganna na parjolo mandok:
”Holan sahalakmu ate. Adong na laho hupatandahon tu ho.”
Huhut didokkon ibana hata ”dongan”, adong ma na dibuat sian sangku ni bajuna jala dilehon ma i tu si Brian.
Diida si Brian ma sigaret ditiop donganna i. Lam taroktokan ma ibana.
Dialusi si Brian ma, ”Santabi ma. Kan nga hudok tu hamu molo ahu . . . ”
Ro ma donganna na paduahon mandok, ”Unang pola mabiar ho!”
Dialusi si Brian ma muse, ”Ndang alani i!”
Dihaol donganna na paduahon i ma ibana, jala lambok ma hatana mandok, ”Buat ma, ndang pola boha i!”
Lam dipajonok donganna na parjolo i ma sigaret i tu bohi ni si Brian, jala dihusiphon ma, ”Ndang adong na mamboto on. Tenang ma ho!”
Molo hamu gabe si Brian, songon dia do bahenonmu mangadopi i?
PINGKIRI MA!
Diboto dongan ni si Brian do aha na diulahon nasida? Nasida sandiri do na mamillit i? Daong. Diulahon nasida pe i, ala hea do halak na asing mambahen sisongon i tu nasida. Dipaloas do halak na asing mangatur nasida, holan asa dihalomohon.
Molo diadopi hamu situasi na sarupa, songon dia do caramuna mangadopi jala manjua elaela i?
-
PINGKIRI HIAN MA
Bibel paboahon, ”Diida halak na bisuk do jea i ro, gabe laho martabuni, alai anggo halak na oto marsalasala pitpit gabe marsingkor.”—Poda 22:3.
Jotjot do taboto masalah na laho taadopi. Umpamana, diida hamu ma angka donganmu marisap di jolo ni singkola. Molo dipingkiri hamu hian aha na laho ulahononmu, gabe mura ma hamu manundalhon elaela.
-
RIMANGI MA
Bibel paboahon, ”Ulahon hamu ma . . . dohot panggora ni roha na ias.”—1 Petrus 3:16, Bibel siganup ari.
Rimangi ma, ”Songon dia do pangkilalaanku molo huihuthon nasida? Ra, gabe lomo ma roha ni angka donganmu tu hamu. Alai, songon dia do annon pangkilalaanmu? Lomo do rohamu gabe sega paralealeonmu tu Debata holan alani mangihuthon dongan?—2 Musa 23:2.
-
PILLIT MA
Bibel paboahon, ”Manat do halak na bisuk.—Poda 14:16, Bibel siganup ari.
Di tingkina, hita sude ingkon mamillit siulahononta jala mangkorhon do i tu ngolunta. Dipaboa do di Bibel taringot angka halak na mamillit na denggan, songon si Josep, si Job, dohot Jesus. Dipaboa do muse taringot angka halak na mamillit na sala, songon si Kain, si Esau, dohot si Judas. Molo hamu songon dia?
Bibel paboahon, ”Ulahon ma na denggan.” (Psalmen 37:3, Bibel siganup ari) Molo nunga dipingkiri hamu hian pangkorhonna jala nunga dibahen hamu haputusan, mura ma hamu paboahon pendirianmuna. On parohon laba tu hamu.
Unang pola marsak hamu. Ndang ingkon marjamita hamu tu donganmuna. Boi do hamu holan mandok ”daong”. Manang, asa diboto nasida hamu ndang olo, dokkon ma:
-
”Ndang olo ahu!”
-
”Ndang olo ahu mangulahon i!”
-
”Kan diboto ho do, ndang na laho olo ahu!”
Alani i, ingkon tangkas do hamu paboahon hatamuna. Molo diulahon hamu songon i, ndang olo be angka donganmuna i mangelaela hamu!
MANGADOPI INSAHINSAK
Molo dioloi hamu elaela ni dongan, gabe songon robot na diatur ma hamu
Boha do molo diinsahi hamu? Boha do molo didok nasida, ”Boasa? Na mabiar do ho?” Boto ma, diinsahi pe hamu, holan asa olo do hamu tarelaela. Boha do cara mangadopi i? Adong dua sipilliton.
-
Unang hansit roham. (”Toho do i. Mabiar ahu!” Dung i, paboa ma aha sidohononmu.)
-
Denggan ma alusi hatana. Paboa jala patorang ma boasa ndang olo hamu. (”Ulaon na loahon do i!”)
Molo sai dielaela, tadingkon ma nasida! Ingot ma, lam leleng hamu disi, lam maol ma manundalhon elaela i. Molo ditadingkon hamu nasida, on patuduhon ndang dipaloas hamu nasida mangelaela.
Sasintongna, ndang boi hamu martabuni sian elaela. Hamu do na mamillit siulahononmu, aha pendirianmuna, jala cara mangorom diri. Ingkon hamu do na manontuhon!—Josua 24:15.
