Kwarapan fawar ine: Brian bati ḇyesu ro rumfarkor sufanam i, ḇyaḇir sneri iduf. Ro minggu ine kali risuru kwar, bati ḇyesuine sudif i fa isyor tabaku. Ma inema kali ḇekyor imbe sufrur roi ine.

Bati oserya doḇe:

Rofyor dap wos ”bati” ine, ifnak mkamor ḇyesuya ramnai dun roi oso ro sak ḇyeja ma isu brasi ḇe Brian i.

Brian myam bati ḇyedine duf tabaku. Ine nafrur fa ḇyaḇir sneri naduf syadiwer.

Au iso Brian ido, rosai nari wafur ya?

Brian bati ḇyesuine sufawi rosai sufrur ine ke? Suyun snemuk ro mankunsu ke? Oroḇa. Kaku ya, snonkaku ḇesesya sawyae bati ḇyesuine kwar kako. Snar sumarisen snonkaku sya smanen su inja, sumam monda snonkaku ḇesesya sawyae su.

Rofyor Au isya ro fafisu ḇemnis rarirya ido, rariso kwinfir nyan ḇeḇese ḇaido wapampum dafdifer ro bati ḇesya?

1. FASOS ḆEPON

   Refoya doḇe, ”Snonkaku ḇefawinanem ḇemam roi ḇeyun marmar iyokef mankundi, ḇape snonkaku ḇena fawawi syadi ḇa imbran pdef ma nari ismai samamyai.”—Amsal 22:3.

   Fyorno ido, bisa fa mam parkara ro ḇarpon. Imnis raris, imbude mam ḇepon kwar bati ḇesya sisyor tabaku. Kuker wafasos ḇepon, nari wafawi rosai fandun wafrurya.

2. KWARA

   Refoya doḇe, ”Kuker sneuser ḇesren kaku.”—1 Petrus 3:16.

   Wawasenpan, ’Rofyor yaḇebati kuker si ido, na rariso sneḇaḇir ayedi ro ras-ras ḇerama ya?’ Kakuḇae, ro swaf ḇeḇeso imbude na bati ḇesya simanen Au. Ḇape rariso sneḇaḇir Bedi ro fafisu ḇerama ya? Inja wamarisen fasnai kenem Bedi insama bati ḇesya simarisen faro Au ke?—Keluaran 23:2.

3. SNEMUK BEDI

   Refoya doḇe, ”Snonkaku ḇefawinanem sya sisasor si.”—Amsal 14:16.

   Fasaw ke roḇa, fandun fa kofrur kankinfir ma kokenem imnis kuker rosai kokinfir na. Refoya ikofenḇair snon imnis raris Yusuf, Ayub, ma Yesus, sikam skinfir roi ḇenapes. Refoya ikofen kako kuker Kain, Esau, ma Yudas, skinfir roi ḇepyum ḇa. Rosai nari wafrur ya?

Refoya doḇe, ”Fasnai soasuser.” (Mazmur 37:3) Rofyor kwara bon rosai nari wasmaina ma wafrur snemuk ido, nari napyan ḇe Au fa wakofenḇair snemuk Bedi faro snonkaku ḇesesya. Ma nari wasmai barakas kako.

Ḇeḇirḇar awer. Wawos nabor awer ḇe bati ḇesya. Rofyor wakofen OROBA ima imnis kwar. Ḇaido wawos ḇeri, raris wakofen:

• ”Yamewer yaso mko wer!”

• ”Yafrur roi ḇeradirya ḇa!”

• ”Ayama yamewer yamam roi ḇeradirya!”

Nyan ya iso wawos ḇeri kuker kakyar. Rofyor wafrurna, nari kwandor snar bati ḇesya sifarfnak Au werḇa!

Rofyor bati ḇesya skoryae Au ido na rariso? Imnis soḇe, ”Rosai ḇefnai au ya, auma ḇemakakak ra?” Wos koryae inema moḇ bati ḇesya sifrur fa sḇuk idif Au. Inja rosai nari wafrur ya? Kankinfir risuru nasya.

• Rofyor skoryae Au ido bisa fa waso monda. (”Imbo, yamkak ḇae!” Ramnai wakofenḇadir roi ḇefnai ya.)

• Bisa fa wawos kaḇer radirya. Wakofenḇair rosai ḇefnai fa pampum na, ma wafnoḇek si fa skara. (”Yakara mboi mko kako mkofawi kwar snar anan tabaku ima roi ḇeḇyeḇa!”)

Rofyor bati ḇesya skoryae Au ker ido, wambranbur si ḇeri! Waswarepen, rofyor wores rodia pdef ido, nari skoryae syadi Au wer. Kuker wambran wabur ro moḇ ya, nama nfasnaḇair wapampumna fa wamewer snonkaku ḇesesya sifadwer Au imnis marisen sena.

Kaku ya, wapok fa wayokefbur dafdifer ro bati ḇesya ḇa. Ḇape nari bisa wun snemuk faro rosai wamarisen wafrurna, ramnai fasnaḇair snemuk Bedi insape bisa ḇefara mankundaw. Inja Auso ḇekinfir ya!—Yosua 24:15.