Iangoa te bwai ae riki aei: Ngke a a uakaan ma Brian raona n reirei aika uoman, ao e a kaman nako nanona. Ai uoua aia tai n te wiki aei n anaa nanona bwa e na moko. Aei ngkanne ai te katentai.

E taku te teinimwaane are te moan:

E taekina “raoraom” ao e kakeea matana, ao e a kaotinakoa te bwai teuana mai buuana n angani Brian.

E nora te tikareti Brian ni bain te teinimwaane anne. Ao e a korakora riki nakon nanona.

Ngke arona bwa Brian ngkoe, tera arom iai?

A a tia tabonroron Brian aikai n iangoa raoi te baere a karaoia? A a tia ni karaoi aia motinnano? A bae n aki. Ni koauana, a iraraang irouia ake tabemwaang. A kan tangiraki, ngaia are a kariaia tabemwaang bwa a na taui aroia.

Ngkana ko kaaitara ma te aekaki anne, ko na kangaa ni karaoa te bwai ae kaokoro ao n rawa nakon aia kariri tabonrorom?

1. KAMAN ATAI BAIKA A NA RIKI

   E kangai te Baibara: “E nora te kabuanibwai ane e ataibwai ao e karabaa, ma e teimatoa ane e roo nanona ni waaki nako iai ao e rotakibuaka ni mwina.”—Taeka N Rabakau 22:3.

   N angiin te tai ko kona ni kaman nori kangaanga. N te katoto, aongkoa ko noriia raom n reirei aika teitei i mwaim, ao a moko. Ngkana ko a kaman ataa te kangaanga, ko na tauraoi ni kaitaraa.

2. IANGO

   E kangai te Baibara: “Kateimatoa raoiroini mataniwin nanomi.”—1 Betero 3:16.

   Titirakiniko ni kangai, ‘Tera au namakin imwina riki ngkana I a iraraang irouia aomata aika bati?’ E koaua ae a na tatangiriko tabonrorom i nanon tabeua te tai. Ma e na tera am namakin imwina? Ko kukurei ni kakeaa are bon anuam raoi tii ibukini kakukureiaia raom n reirei?—Te Otinako 23:2.

3. BAIREIA

   E kangai te Baibara: “E taratara raoi te aomata ae wanawana.”—Taeka N Rabakau 14:16.

   N te tai ae waekoa ke rimwi riki, ti a bon riai ni karaoi ara babaire ao n aitara ma mwia i nanoni maiura. A karakinaki n te Baibara mwaane n aron Ioteba, Iobi, ao Iesu, ake a karaoi aia motinnano aika raraoi. A karakinaki naba iai Kain, Etau, ao Iuta, ake a karaoi motinnano aika buakaka. Tera ae ko na karaoia?

E kangai te Baibara: “Bwaina te kakaonimaki.” (Taian Areru 37:3) Ngkana ko a tia n iaiangoa mwin te mwakuri teuana, ao ni karaoa am moti iai, ane ko na mimi ni bebeten taekinan am iango, ao ko na kabwaia iai.

Tai raraoma, tiaki nanona bwa ko na reireinia tabonrorom. E kona n tau te kaeka ae bebete ma ni matoatoa ae I AKI. Ke ko kona ni kaota am iango ae aki bibitaki ni kamataataa ni kangai:

• “I tiku ngai!”

• “I aki kakaraoa te aekaki anne!”

• “Kam bon ataia ae I aki kona ni karaoa anne!”

Te bwai ae kakawaki bon te kaeka ae mataata ao e nanonaki raoi. Ngkana ko karaoa anne, ane ko na mimi n aroia tabonrorom ni waekoa ni kitaniko!

Tera arom ngkana a bwainingareiko tabonrorom? Tao a kangai, “Tera te kangaanga, ko kimamaaku?” Ko riai n ataa raoi te kakaniko anne, bwa bon aia anga ni kariri tabonrorom. Tera arom ni kaeka? Aikai aanga aika uoua.

• Ko kona ni kariaia te kakaniko anne. (“E eti ane ko taku, I maaku!” Ao kabwarabwaraa bukina ni kakimototoa.)

• Kaoka te kariri nakoina. Kaota bukin rawam, ao taekina wanawanaia. (“I taku bwa ko na aki momoko bwa ko rangi ni wanawana!”)

Ngkana a teimatoa ni kakaniko, kitania! Uringnga are maanim riki n tiku, bon rikiraken naba kaririam. Ngkana ko kitania, ko kaotia ae ko aki kariaia tabemwaang bwa a na bita anuam.

Ko bon aki kona ni karabako man aia kariri tabonrorom. Ma ko kona ni bairea te bwai ae ko kani karaoia, taekina am moti, ao bon taua arom. N tokina, boni ngkoe ae ko karaoi am motinnano!—Iotua 24:15.