Hi poristhiti polloi: Brian-achea sangata xikpi dog bhurge tachea lagim ietat. Hem polloun taka xello gam sutt’tta. Heach sumanant don pavtti, tannim cigarette voddunk tacher dobhav ghatla. Oxem atam tisre pavtt ghoddttolem.

Poilo bhurgo ieun mhunntta,

“Sangat” mhunnttana to dollo marta ani aplea bollsantli ek cigarette kaddun Brian-ak dakhoita.

Ti cigarette polloun Brian-ak anikui gam sutt’tta.

Tum Brian-achea zagear aslear kitem korta aslo?

Brian-achea sangateamnim, apunn kitem kortat tea vixim chintlam kai? He nirnnoi tannim apnnench zaun ghetleat kai? Zaunk xokona. Dusre kortat tem polloun, te apunn-ui toxem kortat. Tankam heranchi ixttagot zai, taka lagon te tanchem aikotat.

Oslea poristhitint tum aslo zalear, sangateanchea dobhavant poddona zaunk ani aplo nirnnoi gheunk tujean kitem korunk zata?

1. 1 POILINCH TOIAR ZAV

   Bible sangta: “Xittuk monis sonkoxtt polleun asro gheta, Punn, pisatt fuddem vetat ani trasant poddtat.”—Mhonn’nneo 22:3.

   Khubxea pavtt, sonkoxtt polinch dison ieta. Udharonnak, tujea iskolantle bhurge fuddem ube ravon cigarette voddttat tem tum polloita. Thoim gelear kitem zaunk xokta tem chintun, poilinch toiar zalear, tea poristhiticho fuddo korunk tuka modot zatoli.

2. 2 CHINT

   Bible sangta: “Tumchem ontoskornn guneanva-mekllem astolem.”—1 Pedru 3:16.

   Tumkanch vicharun polloiat, ‘Dusre kortat mhunn hanvem-i toxem kelem zalear, fuddarak mhaka koxem bhogtolem?’ Tunvem tanchem aikolem zalear te khuxal zatole tem khorem punn toxem kel’lean, magir tuka koxem distolem? Tujea klasintlea bhurgeank khuxal korunk, tum jem manta tachea add voitolo kai?—Suttka 23:2.

3. 3 NIRNNOI GHE

   Bible sangta: “Xittuk monis apunn koso cholta tacher nodor dovorta.”—Mhonn’nneo 14:15.

   Aiz na tor faleam amkam nirnnoi gheunchoch poddttolo ani tacho porinnam-ui bhogunk poddttolo. Bible-ant amkam bore nirnnoi ghetlolea munxam vixim sanglam, zoxe, Juze, Job, ani Jezu. Toxench, Bible vaitt nirnnoi ghetlolea munxam vixim-i sangta, zoxe, Kain, Esau, ani Judas. Tum koslo nirnnoi ghetolo?

Bible sangta: “Vaittacho dves dhorun, borem tench korit ravat.” (Rom. 12:9) Porinnam kitem zatolo tem chintun tunvem borem korunk tharailam zalear, tujea nirnnoi-a vixim dusreank sangunk tuka sompem ani faideachem-i zatolem.

Bhienaka, tuka tujea sangateank bhaxonn diunchi goroz na. Tunvem thiraien, NA mhunn sanglear puro. Khoinchea-i poristhitint, tum tuzo nirnnoi bodolcho na hem dakhounk, tujean oxem mhunnonk zata:

• “Hanv na tumchea modem!”

• “Toslim kamam hanv korina!”

• “Tumi tor zannant hanv hem korchona mhunn.”

Tankam rokddoch ani khatren zobab divop gorjechem. Oxem kelear, tujer dobhav ghalpi, kitlea begin tuji fatt soddttat tem polloun tum ojap zatolo!

Tujea sangata xikpi tujeo moskoreo kortat, tednam kitem? Te tuka, “samko bhivkuro ma re tum!” oxem mhunnttat tednam kitem? Tea vellar ugddas dovor, tujer dobhav ghalunk tanchi hi ek chal. Tunvem koso zobab diunk zata? Don vatto asat.

• Manun gheunchem. (“Hoi sarkem, hanv bhietam!” Uprant karonn sang.)

• Tujer ail’lo dobhav tancher porot ghalunk zata. Tum cigar kiteak voddna tem karonn sang ani tankam chintunk lai. (“Mhaka dislem cigar voddlear kitem zata tem tumi bore zannant mhunn!”)

Torui astana te tujer dobhav ghalcho proitn korit asat zalear, thoinchean voch! Ugddas dovor, tum thoim chodd vell ravlear, te tujer dobhav ghalit ravtole. Thoinchean vochon, dusreank lagon tum bodolna mhunn dakhoun ditolo.

Sangateanchea dobhava thaun ami liponk xokona. Punn, oso dobhav ietana, tunvem kitem korunk zata tem tharai. Hea vixim sangateank sang. Ani tunvem ghetlolea nirnnoi-acher thir rav. Xevottak, soglem tujea hatant asa!—Joshua 24:15.