Anuu tü alatakat nümüin Alberto: Ayoʼujaasü naaʼin wanaa sümaa niʼrüin nantüin nünainmüin piamashii nukonpayeetse. Soʼu semaanakat tüü, piantuaichi ooʼulakünüin aaʼin süpüla nükamüjüinjachin. Apünüintuaichi joo sümaa tüü.

Müshi wanee nümüin:

Niyuʼlüin wanee sikariia suluʼujee nuwotsiiase, naapaka shia nümüin Alberto sümaa nüchimirüin noʼu nümüin.

Ayoʼujaasü maʼin naaʼin Alberto süka saapünüin sikariia nümüin.

¿Kasajeʼe paainjaka sülatüle pümüin tia?

¿Natüjaa aaʼuche naya tepichikana tü naaʼinrakat? ¿Nayache aneekaka namüiwaʼa tü naaʼinrakat? Eeshiijaʼa süpüla nnojoliin nayain. Eesüjaʼa shiale nashatüin tü naaʼinrakat na waneeinnua süka aneein naya noʼuluʼu, müshiijeseʼe nooʼulaain süneekünüin napüleerua tü naaʼinrajatkat.

Piale ooʼulakünüin aaʼin, ¿paaʼinreeinche tü kasa anasükat otta püchechereeinche paaʼin?

1. KETTAAJA PIA

   «Chi wayuu kekiikai maʼin oʼunüshi suulia tü kasa mojusükat, akaisaʼa chi malakai aaʼin, oʼunüshi sünainmüin jee sülataka kasa mojusü nümüin», müsü tü Wiwüliakat (Proverbios 22:3, TNM).

   Jaʼyasü saaʼu sülatüinjatüle wanee kasa mojusü. Jamüshijaʼa waraittüle pia jee piʼrüle tepichi sünain akamüjaa, nnojoire puʼunüin yalejee, eeshijaʼa süpüla puuʼulakünüin aaʼin natuma.

2. JÜLÜJA PAAʼIN TÜ EEJEETKAT SÜNAINJEE

   Anuu tü sümakat tü Wiwüliakat: «[Jütüjaa] saaʼu tü jaaʼinrakat sünain anasüin nuʼupala Maleiwa» (1 Pedro 3:16).

   Püsakira paaʼin: «¿Jameetche taaʼin taaʼinrüle tü naaʼinrakat na takonpayeetsekana?». Eesüjaʼa süpüla talatüin naaʼin pümaa motsomüin. ¿Jameerü paaʼin mapa? ¿Wanaaweeichi pia namaa shiiʼiree talatüin naaʼin pümaa? (Éxodo 23:2).

3. PÜNEEKA TÜ PAAʼINRAJATKAT

   Anuu tü sümakat tü Wiwüliakat: «Chi wayuu kekiikai maʼin eejüsü naaʼin jee niyouktüin tü kasa mojusükat» (Proverbios 14:16, TNM).

   Waneeküinjatü waneʼewai wakua tü waaʼinrüinjatkat jee waʼatapajüinjatü tü eejeetkat sünainjee. Aashajaasü tü Wiwüliakat nachiki waneeinnua wayuu aneekakana kasa anasü maʼaka naaʼin José, Job nümaa Jesuu. Akanasaʼa eein waneeinnua aneekakana kasa mojusü maʼaka naaʼin Caín, Esaú nümaa Judas. ¿Kasajeʼe paainjaka piakai?

Saashin tü Wiwüliakat «niʼitaatüjülia paala Daniel suluʼu naaʼin nnojolinjachin nia sünainpünaain kasa mojusü» (Daniel 1:8, TNM). Pütüjaale saaʼu tü kasa eejeetkat sünainjee tü püneekakat, anasü püküjüle namüin na apüleeruaakana paaʼin tü kasa püneeküitpakat.

Nnojo shapaain paaʼin, nnojotsü wainmainjatüin pünüiki namüin, «nnojo», pümaa neʼe namüin. Eesü süpüla lotuin pünüiki namüin mayaa:

• «Nnojoleerü taaʼinrüin türa pümaa».

• «Matüjüinsai taya akamüjaa».

• «¿Nnojotsüsaʼa pütüjaain saaʼu tanoujain?».

Pusouktamaata namüin sümaa yalayalain paaʼin. Müle shia putuma, nnojoleechi nekeʼejüin aaʼin pia.

Eeshijaʼa süpüla nemeeʼerainpalain pia na pukonpayeetsekana. Eeshii süpüla namüin pümüin: «¿Jamüsükai pia? ¡Malakatche maʼin pia!». Naaʼinrüin maʼin tia na tepichi mojulaakana. ¿Kasakaʼa eein süpüla paaʼinrüin? Eesü piamasü kasa:

• Nnojo paashichijaain. (Eeshi süpüla pümüin: «Müshisaʼaya, matüjüinsai taya süpüleerua tia». Püküja motsomüin jamüin piyouktaka tia).

• Piyaawatira naya sünain mojuin tü naaʼinrakat. (Püküja jamüin nnojotka paaʼinrüin tia jee püma nümüin: «Wayuu anashiyaa pia taaʼinruʼu, pükamüjaka neʼe»).

Macheʼere naya püchiirua, puʼuna noulia. Soto paaʼin ayateerüin napüleeruain paaʼin makatüle pia namaa. Puʼunüle noulia, piiʼiyateerü piain aneeküin tü paaʼinrajatkat.

Soteesü waaʼin matüjüin choʼujawaa na tepichi mojulaakana. Suuʼulakünapa paaʼin natuma, püneeküinjatü piakai tü paaʼinrajatkat, lotuinjatü pünüiki namüin otta nnojoluinjachi pia atkaain namaa (Josué 24:15).