ʼIWAURIKA 6
¿Kenetiyurieni waɨriyarika nemɨtiʼaitɨariekatsíe?
¿ʼEKƗ KEPETIUYURIWE?
Paatsɨ́ ʼikɨtsíe neutiʼeri: Brian puyɨyɨaka meyuhuutame waxeiyatɨ ʼauriena meyeʼaxɨaximeme. Kepaitsɨ́ ʼikɨ tsemanatsíe huutakɨa rí mepitaʼini mɨtayeenákɨ. ʼIkɨ rí hairieka pɨhɨɨkɨ.
Xewitɨ pɨrehɨawe:
«¿Tawarié ʼaxaɨtá? ¿ʼIkɨ rí petiʼinɨnɨata? Kamɨ́».
Hurawa ʼauriena ʼayaka yupurutsatá tiwatikweka pɨtixeiyatsitɨa.
Brian temaikɨ mamateyatsíe yená xeiyatɨ kwinié pɨtiuyɨyɨaka.
«Waikɨ pampariutsi, me waikɨ rí nemerahɨawekai».
Xewitɨ tá temaikɨ pɨrehɨawe: «¿Pekatiʼukí kutá?».
Brian tá ʼeetsiwa hayɨyɨakatɨ pɨrehɨawe: «Hɨtɨtɨ nepɨʼukí».
Hiikɨ tá ʼewiyatɨyaka nakatana ʼakunieretɨ pɨrehɨawe: «Xeime xeikɨ́a keneutayeena».
Matɨari temaikɨ mɨtitaxaatɨa pɨrehɨawe: «Xewitɨ kwaretimaaní. Taame xeikɨ́a».
Xɨka ʼekɨ Brian pehɨɨkɨtɨnike, ¿kepetiuyuriwekai?
NEWAKEKA NEUʼATIʼERIIXƗA
¿Waʼatɨ meteʼamaaté kememɨteyurié Brian ʼiwamama peraʼeriwa? ¿Peraʼeriwa kenaame yuxaɨtá meteʼanuyewau? Xɨari hawaikɨ. Xɨari hiipame mewaʼɨketɨ yamepɨteyurié. Memɨnaakeʼeriwanikɨ mepɨtepitɨ́a hiipatɨ waheetsíe mieme memɨteʼanuyewawani.
Xɨka hepaɨna peranuyemienike, ¿ʼaumɨ́ yɨɨkɨ petiuyuriwekai waɨriyarika pepitɨarietɨ?
-
ʼAIXƗ NEUYUKUYURI
Yuútsi Niukíeya paine: «Mɨreutamaiwé pɨtitimaamate kweriwa mɨʼitɨariekatsíe ʼayumié puyutiʼawiwieta, memuʼeerie tá mepɨkawaʼuuwé ʼayumié mepɨteʼuyukaʼenitɨwa» (Proverbios 22:3).
Heiwa pɨmatsiɨkɨ xɨka haxa tiyɨmɨkɨ. Tineuʼeri kenaame, huyetá peʼumietɨ teemari pewaruxéi meyeename. Xɨka meripai petiutiʼeriwani kemɨtiuyɨwetsíe ʼaixɨ peheutiʼanetɨ pepayaaní tseepá ketiʼaneme pemɨranutaxeiyaxɨa.
-
NEUTIʼERI
Yuútsi Niukíeya paine: «Yuʼiyaaritsíe paitɨ ʼaixɨ xeketeneuʼerieka» (1 Pedro 3:16).
Tineuyuʼiwawiya: «¿Kenerakaʼerietɨyaní xɨka hiipatɨ memɨteyurié wahepaɨ netiuyurieni?». Xɨka mɨpaɨ petiuyurieni hiipatɨ memetsinaakeʼerietɨ mepakɨɨné, xeikɨ́a tá kwinié pɨkareuteré. ¿ʼAriké tá keperakaʼerietɨyaní? ¿Petiyɨwe pemɨreuyehɨaní keane pemɨhɨɨkɨ xeikɨ́a pemɨnaakeʼeriwanikɨ? (Éxodo 23:2).
-
YATINEUYURI
Yuútsi Niukíeya paine: «Mɨreutamaiwé pɨyukuʼɨɨwiya metá haxa mɨtiʼanetsíe pɨkaʼuyehake» (Proverbios 14:16).
Reumietɨ tepɨteʼanuyewauní ketemɨteyurieni metá tita temɨteʼanuyewauní mɨpaɨ ʼanemekɨ teʼuʼuwaatɨ tepakɨɨné tatuukaaritsíe. Yuútsi Niukíeya hiipame pɨwaraxaxaata ʼaixɨ memɨtekakɨ́, José, Job metá Ketsuútsi tsiere tá pɨwaraxaxaata keane ʼaixɨ memɨkatekakɨ́, tatsɨrí Caín, Esaú metá Judas. ¿ʼEkɨ tá kepetiyurieni?
Yuútsi Niukíeya paine kenaame «tekateʼuyukuʼeʼeiriwani» (Salmo 37:3). Xɨka peranuyewauní metá xɨka petiutiʼeriixɨani kepemɨtiyurieni, riixɨ́a rí pepɨyɨwekaxɨani hiipame kepemɨtiwaʼeiya. Xɨka mɨpaɨ petiuyurieni, ʼaixɨ pepɨrakaʼerietɨyaní.
Peukayuʼiyaaritɨaka kepemɨtiwatahɨawekɨ, pɨkaheuyewetsé waɨkawa pemɨtiwataxaatɨani. Pekamaatɨ WAIKƗ keneutayɨkí. Tsiere pepɨtiwarutahɨawiwe kenaame ʼaniuki pekawapá pehaitɨ:
-
«¡Xehaamatɨa neukamié!»
-
«¡Ne mɨpaɨ neukatiumié!»
-
«¡Pepɨramaate rí kenaame mɨpaɨ nekatiumié!»
Kenaame ʼaniuki pekawapá ketiniwarutahɨawi. Xɨka mɨpaɨ petiuyurieni hiipatɨ waɨriyarika rí meukametsipitɨani.
¿KENEYƗNÍ XƗKA NEʼATSIERIEKA?
Xɨka pewapitɨaka waɨriyarika memɨʼatsinɨʼaka, robot hepaɨ penɨʼarietɨ pepayaaní.
Xɨka hiipatɨ memetsiʼatseni hiipame wahɨxie, mehaitɨkaitɨ́: «¿Pekatiyuwaɨriya? ¿Pereumá?». Mɨpaɨ hiipatɨ waɨká mepɨteʼanuyekɨká. Xɨka mɨpaɨ peranuyemieni, ¿ʼekɨ kepetiuyuriwe? Tihuutame pepɨranuyewauwé.
-
Keniwaruʼeni xeikɨ́a. ʼAriké tá keneutayɨkí: «Yuri pepaine, nepeumá» ʼariké tineutaxaata títakɨ yapemɨraine.
-
Taʼaurié kenahɨwiri niukíeya. Petitahɨaweme títakɨ ʼekɨ mɨpaɨ pemɨtikamié neutayɨkí: «ʼAhepaɨ memɨteheutamaiwawe, meukayena»
Xɨka hura meʼatsitikekaní keneuyutaʼuuna. Kenetaʼeriwani, xɨka pekaheyaní peukahayewarieni waɨriyarika peʼaitɨarietɨ. Xɨka peʼuyutaʼuná peutikuhekɨkɨata kenaame ʼaxaɨtá peranuyewawa.
Teukatehatɨtɨmaiyani: Teuteri meukatehayewa waɨriyarika metatsipitɨatɨ haxa temɨtekuyuruwanikɨ. Riixɨ́a ʼekɨ xeikɨ́a pepɨyɨwe kepemɨtiyurieni, kepemɨtiyukuhɨawe metá yapepɨtikayaaní tita pemɨranayewau. Xeikɨ́a pɨtiʼaheetsíe kepemɨtiyurieni (Josué 24:15).
