HENANADAI 6
Egu Turana Ena Doria Herevana be Edena Bamona Lau Dadaraia Diba?
DAHAKA DO OI KARAIA?
Haheitalai ta laloa: Brian ia gari badina sikuli ai memero rua be ia dekenai idia raka mai. Inai wiki lalonai, inai memero be nega rua vadaeni Brian idia doria, kuku ia ania totona. Hari be nega ihatoina idia ese Brian do idia tohoa.
Mero A ia gwau:
“Oi sibona oi gadara lou, a? Oi dekenai turana ta do lau henia.”
Ia be inai hereva “turana” ia gwauraia neganai, ena matana kahana ta ia wink, bona gau ta be ena poketi amo ia abia raka-lasi bena Brian dekenai ia henia.
Brian ia itaia unai mero be kuku ia dogoatao. Madi, Brian ia gari bada herea.
Brian ia gwau, “Sori! To lau hereva vadaeni, lau be . . . ”
Mero B ese Brian ena hereva ia utua bena ia gwau: “Oi gari lasi!”
Brian be mai lalogoada ida ia hereva. Ia gwau: “Lau gari lasi.”
Mero B ese ena imana be Brian ena pagana ia dogoatao. Ia hereva maragi, ia gwau: “Oi abia sibona.”
Mero A ese kuku be Brian ena uduna kahirakahira ia atoa bona ia whisper, ia gwau: “Ta dekenai do ai stori lasi. Bona ta do ia diba lasi.”
Bema oi be Brian, dahaka do oi karaia?
STOPU BONA LALOA!
Oi laloa Mero A bona B be Brian dekenai idia karaia gaudia idia laloa, a? Oi laloa idia be sibona edia disisen idia karaia, a? Reana lasi. Idia be haida idia tohotohoa. Idia ura haida idia hamoalea dainai, edia mauri be haida ese idia control o biagua.
Bema unai bamona hahetoho oi davaria, edena dala idauna oi abia hidi diba bona edena dala ai emu turana ena doria herevana oi dadaraia diba?
-
LALONA HEGAEGAELAIA
Baibel ia gwau: “Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.”—Aonega Herevadia 22:3.
Nega momo oi itaia diba, dika be do ia vara. Haheitalai: Oi itaia, sikuli memero haida be dala atai ai idia gini bona kuku idia ania. Namona be emu lalona oi hegaegaelaia, badina hekwakwanai ia vara neganai, oi hanaia diba.
-
LALOA NAMONAMO
Baibel ia gwau: “Namona be lalomamina namona umui dogoatao noho.” —1 Petero 3:16.
Oi sibona oi nanadaia: “Bema hutuma edia ura lau badinaia o karaia, gabeai egu lalomamina be edena bamona?” Momokani, reana nega sisina lalonai emu turana do ia moale o do oi tura henia. To gabeai, emu lalomamina be edena bamona? Oi ura emu klas turana oi hamoalea dainai, emu ladana namona oi hadikaia, a?—Esodo 23:2, NWT.
-
ABIA HIDI O DISISEN KARAIA
Baibel ia gwau: “Aonega tauna be ia naria namonamo” —Aonega Herevadia 14:16, NWT.
Nega haida ai, namona be ita sibona ita karaia abia hidi o disisen amo idia vara gaudia ita abia dae. Baibel ia sivarailaia taudia haida hegeregere Iosepa, Iobu bona Iesu be disisen maorodia idia karaia. Danu, ia sivarailaia taudia ma haida hegeregere Kaino, Esau bona Iuda be disisen kereredia idia karaia. Oi be dahaka do oi karaia?
Baibel ia gwau: “Gau maragina ia karaia maoro tauna ese gau badadia do ia karaia maoro.” (Luka 16:10) Bema do ia vara gauna oi diba bona disisen oi karaia, vadaeni unai disisen do oi gwauraia be auka lasi bona namo do oi davaria.
Oi lalohekwarahi lasi—emu turadia dekenai gau ibounai oi herevalaia goevagoeva be anina lasi. To inai hereva tamona sibona, “LASI,” oi gwauraia be ia hegeregere! Eiava inai bamona oi gwau diba:
-
“Lau ura lasi!”
-
“Unai bamona gaudia lau karaia diba lasi.”
-
“Umui diba vadaeni, lau be unai bamona kara lau karaia lasi!”
Gau badana be oi hereva hedinarai haraga, oi daradara lasi. Unai bamona oi hereva neganai, reana do oi hoa badina emu turana be ena uduna ia koua!
HEVASEHA HEREVADIA HANAIA DALANA
Bema emu turana ena ura oi abia dae, anina be oi be robot bamona, badina emu mauri ia control o biagua diba
Emu turana be oi ia hevasehalaia, a? Hegeregere, bema idia gwau, “Edena bamona—oi gari, a?” Laloatao, emu turana ia ura ia oi badinaia. Edena dala ai oi haere diba? Dala rua be inai:
-
Reana oi gwau diba,“Oibe, lau gari!” Bena emu haere ena badina oi gwauraia.
-
Reana oi gwau diba,“Lau gari lasi!” Bena emu haere ena badina oi gwauraia murinai, emu turana ena lalona oi tohoa diba, hegeregere oi gwau, “Lau laloa oi danu be kuku oi ania lasi”
Bema emu turana be oi ia hevasehalaia noho, vadaeni raka siri! Laloatao, bema oi gini noho, ia be do ia hereva noho. Oi raka siri neganai, oi hahedinaraia oi ura lasi emu kara namona be ma ta ese do ia haidaua o hadikaia.
Nega momo, turadia be oi do idia tohoa loulou. To oi ura karaia gauna oi abia hidi, emu ura gauna oi herevalaia hedinarai namonamo, bona emu mauri o kara oi control o biagua. Herevana dahaka ia vara, oi sibona ese abia hidi do oi karaia!—Iosua 24:15.
