Ripurira kongaro ndji: Brian wa uruma tjinene, orondu ma munu ovanatje mbu ve hita pamwe oskole amave ya ku ye. Povikando 2 nai motjivike hi, owo mave kondjo okumuṋiṋikiza kutja ma pepe omakaya. Ihi matji rire otjikando 3.

Omuzandona omutenga wa tja:

Eye we mu sikira eho indu tja tamuna embo ndi “epanga” ngunda ama nana otjiṋa mondjaṱu ye yomburukweva na yandja ku Brian.

Brian tja muna ekaya ndi ri pokati kominwe vyomuzandona ngo, wa urumina ko.

Andakuzu oove Brian, otjo tjita vi?

Hapo ovazandona mba ve ripura nawa ohunga noviṋa mbi mave tjiti? Owo hapo va tjita ozondando zawo oveni? Mape ya kave tjitire oveni. Owo wina va ṋiṋikiziwa i ovanatje varwe. Owo ve vanga okuyakurwa, okutja ve yandjera kutja varwe ve ve tyere po.

Ove andakuzu u ri mongaro otjingeyo, otjo toora omukambo uṋe kutja u pirukire oṋiṋikizire?

1. RIPURIRA KO RUKURU

   Ombeibela mai tja: “Omunazondunge u muna oumba tji mau ya na ṱara; nu ingwi ngu hina ondjiviro u hita mu wo na kamunina po otjipo.”—Omiano 22:3.

   Potuingi, ove mo yenene okumuna oumba tji mau ya. Okutara kotjihorera, ngatu tje wa munu otjimbumba tjovakweṋu mbu mu hita pamwe oskole amatji ya nu mave pepe omakaya. Mokumuna oumba komurungu woruveze mo yenene okurirongera okuuyepa.

2. RIPURA

   Ombeibela mai tja: “Kareye nomeritjiviro omawa womomutima.”—1 Petrus 3:16.

   Ripura omuini kutja, ‘Korusenina me kasana pi indu tji mba tjiti imbi mbi tjitwa i ovandu avehe?’ Otjiperi kutja okaruveze okasupi mo tjiti kutja ovakweṋu ve ku yakure. Posi yokutja, mo kakara mongaro iṋe kombunda? Mo riyandjere okuisa ongurameno yoye kutja u yorokise ovakweṋu uriri?—Eksodus 23:2.

3. TYA RUKURU

   Ombeibela mai tja: “Omundu onongo u tira ouvi ne u penge.”—Omiano 14:16.

   Atuhe tu hepa okutjita ozondando nokuyakura oviṋa mbi mavi kongorere ko. Ombeibela i hungira ohunga novarumendu tjimuna ooJosef, Job na Jesus owo mba tjita ozondando ozosemba. Oyo wina i hungira ohunga na Kain, Esau na Judas mba tjita ozondando ozombi. Ove mo tjiti ozondando zeṋe?

Ombeibela mai tja: “Ngamwa ngu ri omuṱakame moviṋa oviṱiṱi, ma rire omuṱakame movinene wina.” (Lukas 16:10) Ove tji we ripurire koviṋa mbi mavi kongorere komikambo vyoye nu otoora omukambo omusemba, okutja kaku nokurira ouzeu okupanḓera pongurameno yoye nu mo serwa ondaya.

O rikende, ove konokuhepa okuyandja ehungi ere kovakweṋu. O KAKO uriri ya yenene. Poo tji mo vanga okuzuvisa ovakweṋu ohunga nongurameno yoye, ove mo yenene okutja:

• “Hi nokuvanga okukara norupa!”

• “Ami hi tjiti oviṋa mbyo!”

• “Ami hi nokutjita oviṋa mbyo!”

Otjiṋa tji matji ku vatere, okuzira tjimanga nokuhina okuripura tuvari. Indu tji wa tjiti nao, ovakweṋu mave ku esa tjimanga!

Indu ovakweṋu tji mave ku tjiti ouhahu mo tjiti vi? Indu tji mave tja: “Ongwaye tji u ri otjimumandu nao?” Omundu tji me ku tjiti ouhahu momuano mbwi, tjiwa kutja ma vanga okukuṋiṋikiza okutjita oviṋa mbi ma vanga. Ove mo yenene okumuzira vi? Ove mo yenene okumuzira momiano vivari mbi:

• Ove mo yenene okuyakura kutja mbi ma hungire ouatjiri. (“Omambo me tira!” Okuzambo omuraere epu ndi mo tirire.)

• Ove mo yenene okutjita aayo mo nyanda. Raisa kutja ongwaye tji u hina okuvanga okutjita otjiṋa omukweṋu tji ma vanga okuzambo u nyande nouruvi we. (“Ami ee nangarasi u nozondunge, konoo pepe omakaya!”)

Ovakweṋu tji mave kayenda komurungu okukutjita ouhahu, kayende u ze po! Tjiwa kutja tji wa puratene orure kovandu otja imbo, maku tjiti kutja ve harere ko omasa wokukuṋiṋikiza okutjita otjiṋa otjivi. Tji wa kayenda ozu po pu wo, mo raisa kutja kaove omundu ngu yandjera kutja ovakweṋu ve rundurure ongaro yoye.

Ouatjiri owombwi wokutja ove konoo yenene okuyepa omaṋiṋikiziro okuza kovakweṋu. Posi yokutja ove mo yenene okutya kutja mo tjiti vi okuraisa ongurameno yoye nu o ha yandjere kutja varwe ve ku tyere po. Komaandero weyuva, matji zu kove omuini!—Josua 24:15.