Uji gambarka: Dua iku nembiak lelaki ke sama sekula mansang semak, Brian berasai takut. Dalam minggu tu, udah dua kali seduai iya nguji mai Brian nginsap. Tu ketiga kali seduai iya mai iya.

Nembiak lelaki keterubah bejaku:

Iya ngicheka mata lebuh iya nyebut “kawan” seraya iya mansutka utai ari kuchik iya, lalu ngunjurka jari iya ngagai Brian.

Brian meda insap segerit ba jari nembiak nya. Brian balat agi takut.

Enti sema nuan nya Brian, nama deka digaga nuan?

Kati bala kawan Brian nemu utai ti dikereja sida? Kati sida ngaga pemutus nya kediri empu? Engka enda. Kesuah agi, sida udah alah dibai orang bukai. Sida deka diterima orang bukai, nya alai sida ngelakka orang bukai ngatur utai ti dikereja sida.

Enti nuan napi penanggul ti sama, baka ni nuan ulih nyeliahka diri ari ditekan bala serambau?

1. NGADANG

   Bup Kudus madahka: “Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah nya, lalu merinsa ketegal nya.”—Jaku Dalam 22:3.

   Selalu iya, nuan ulih ngadang enggau penanggul ti deka nyadi. Ngambika chunto, nuan meda seraban nembiak ke sama sekula enggau nuan benung nginsap. Enti nuan ngadang, nuan deka nyeliahka penanggul nya.

2. BERUNDING

   Bup Kudus madahka: “Intu ati kita beresi.”—1 Peter 3:16.

   Tanya diri empu, ‘Baka ni asai ati aku enti aku nitihka pengawa sida?’ Amat, nuan engka diterima bala serambau. Tang baka ni asai ati nuan udah nya? Kati nuan sanggup muai pengidup ti tuchi di mua Petara ketegal deka ngerinduka ati orang ke sama kelas enggau nuan?—Pemansut 23:2.

3. PEMUTUS

   Bup Kudus madahka: “Orang ke mereti endang bejimat.”—Jaku Dalam 14:16.

   Pengujung iya, kitai patut ngaga pemutus, lalu napi utai ke deka nyadi. Bup Kudus madah pasal Josep, Jop, enggau Jesus, ke ngaga pemutus ti betul sereta pasal Kain, Esau, enggau Judas, ke ngaga pemutus ti salah. Nama deka digaga nuan?

Bup Kudus madahka: “Barang sapa tau dikarapka ngemataka utai ti mimit, tau mega dikarapka ngemataka mayuh utai.” (Luke 16:10) Enti nuan udah berundingka utai ke deka nyadi sereta nemu utai ke patut digaga, nuan enda tusah madahka penetap ati diri lalu nuan deka bulih asil ti manah.

Anang irau—nuan tau enda ibuh ngajar sida. Semina nyebut ENGGAI enggau berani udah chukup. Tauka kena nunjukka nuan amat enggai, nuan ulih nyebut:

• “Enda ibuh mai aku!”

• “Enda aku enggau utai baka nya!”

• “Enggai aku ngereja nya!”

Chara iya, nyaut enggau jampat sereta berani. Enti nuan ngereja tu, nuan ulih meda sida deka ninggalka nuan!

Baka ni enti bala serambau ngeleseka nuan? Baka ni enti sida nyebut, “Nama deh—nuan takut?” Tu chara ke suah dikena bala serambau nekan nuan. Nama deka digaga nuan? Nuan bisi dua iti chara.

• Nuan ulih nerima aja jaku kelese nya. (“Amat ku nuan, aku takut!” Udah nya, padahka kebuah iya.)

• Nuan ulih nyaut jaku kelese sida. Padahka kebuah nuan enggai lalu udah nya nulung sida berunding. (“Ba runding aku, pengawa kita ulih ngerusak pengerai!”)

Enti bala serambau majak ngeleseka nuan, mupuk aja! Kingatka, lama agi nuan enggau sida, bendar agi sida deka nekan nuan. Enggau mupuk ari endur nya, nuan nunjukka diri enggai ngelakka orang bukai ngubah pengidup nuan.

Endang amat, nuan enda ulih nyeliahka diri ari ditekan bala serambau. Tang nuan ulih mutuska utai ti deka dikereja nuan, madahka penetap ati diri sereta enda ngelakka orang bukai ngatur pengidup nuan. Tang, pemutus nya bepanggai ba nuan empu!—Josua 24:15.