ASTEQSI WIS 6
Amek ara qableɣ lḥerṣ n yemdukkal-iw?
ACU I TZEMREḌ AŢ-ŢXEDMEḌ?
Meyyez ɣef liḥala-yagi: Mi gwala Kamal sin yemdukkal-is la d-ţqerriben ɣur-es, yebda iḥebbek wul-is. Smana-yagi kan, snat n tikkal i εerḍen a t-demmren ad ikeyyef dduxxan. Atnan daɣen uɣalen-d almi d ɣur-es.
Amezwaru deg-sen yenna-yas:
“Mazal-ik weḥd-ek? A k-d-ssekneɣ yiwen wemdakkel.”
Mi d-inna “amdakkel”, iɣmez-as, yessufeɣ-ed si lǧib-is yiwet n lḥaǧa yefka-ţ i Kamal.
Kamal iwala ageṛṛu ger iḍudan n werfiq-is. Dɣa ul-is yerna iḥebbek akteṛ.
Yenna-yas: “Xaṭi. Yak nniɣ-ak-d belli ur...
Aqcic-nni wis sin igzem-as awal, yenna-yas: “Ur ţţagad!”
Kamal yerra-yas: “Ur ugadeɣ ara!”
Aqcic-nni yeṭṭef-ed Kamal si tayeţ, yenna-yas s leεqel: “Aha kan tura, ṭṭef-it.”
Arfiq-nni-ines amezwaru yessaweḍ ageṛṛu-nni s udem n Kamal, yenna-yas s leεqel: “Ur neqqar i ḥedd. Yiwen ur iẓerr.”
Lukan i telliḍ deg wemkan n Kamal, acu ara txedmeḍ?
XEMMEM CWIYYA!
Xemmen yerfiqen n Kamal ɣer wayen i la xeddmen? D nutni i gextaṛen ad xedmen ayagi? Di ccekk. Ad yili nutni s yiman-nsen ǧǧan wiyaḍ ad ṛayin fell-asen. Bɣan a ten-sεun d imdukkal, daymi i ten-ǧǧan ad ṭṭfen leqrar deg wemkan-nsen.
Lukan a d-tafeḍ iman-ik di liḥala am tagi, acu ara txedmeḍ? Amek ara tqableḍ lḥerṣ i d-itekken seg yemdukkal?
-
HEGGI IMAN-IK
Adlis Iqedsen yenna-d: “Uḥṛic iţfiq i lhemm, ibeεεed fell-as; ungufen hemmlen kan, ţţaɣen-tent.”—Lemtul 22:3.
Deg waṭas n liḥalat, yezmer walbeεḍ ad ifiq i wuguren qbel a d-awḍen. Γef lemtel, la tleḥḥuḍ ɣer yerfiqen-ik, twalaḍ-ten la ţkeyyifen. Ma theggaḍ iman-ik i wugur-agi, aţ-ţeẓreḍ d acu ara txedmeḍ.
-
XEMMEM
Adlis Iqedsen yenna-d: “[Sεut] lxaṭer yetheddnen.”—1 Buṭrus 3:16.
Steqsi iman-ik: “Lukan ad xedmeɣ akken i xeddmen wiyaḍ, amek ara ḥusseɣ iman-iw?” Bla ccekk, a k-qadren yerfiqen-ik kra n lweqt. Meεna, amek ara tḥusseḍ iman-ik mbeεd? Tqebleḍ aţ-ţsebbleḍ ccexṣiyya-inek bac kan aţ-ţεeǧbeḍ i yerfiqen-ik?—Tuffɣa 23:2.
-
ṬṬEF LEQRAR
Adlis Iqedsen yenna-d: “Ukyis iţţagwad [...] cceṛ.”—Lemtul 14:16.
Ilaq a neṭṭef kra n leqrarat, ass-a neɣ azekka, yerna a nqabel ayen ara d-awin. Adlis Iqedsen ihdeṛ-ed ɣef kra n yergazen i geṭṭfen leqrarat yelhan am Yusef, Yub d Σisa. Ihdeṛ-ed daɣen ɣef Kayin, Σisu akk-d Yahuda i geṭṭfen leqrarat n diri. I kečč, acu n leqrar ara teṭṭfeḍ?
Adlis Iqedsen yenna-d: “Unṣiḥ, ad εument fell-as lbaṛakat.” (Lemtul 28:20) Ma txemmeḍ ɣer wayen ara k-d-yawi leqrar-ik yerna tεewwleḍ aţ-ţeṭṭfeḍ deg-s, ahat aţ-ţwehmeḍ m’ara d-terreḍ s lexbaṛ acḥal i geshel wayagi yerna i tella deg-s lfayda.
Ur tqelliq ara: ur teḥwaǧeḍ ara aţ-ţxedmeḍ lxeṭba i yerfiqen-ik. Ahat ḥwaǧen kan a sen-tiniḍ: “ALA.” Neɣ, bac a sen-d-tesbeggneḍ belli ur teţţuɣaleḍ ara deg wawal-ik, tzemreḍ a d-tiniḍ:
-
“Γas ur ţruẓu ara aqerru-k!”
-
“Nekk ur xeddmeɣ ara tigi!”
-
“Yak teẓriḍ belli ur xeddmeɣ ara ayagi!”
Ilaq a d-tǧawbeḍ din din i yemdukkal-ik yerna aţ-ţiliḍ teţţuqennεeḍ s leǧwab-ik. Teẓriḍ, aţ-ţwehmeḍ amek ara k-ttixxṛen bihfih!
AMEK ARA TQABLEḌ AMESXEṚ
Ma teǧǧiḍ lḥerṣ n yemdukkal-ik a k-yessefcel, aţ-ţuɣaleḍ am uṛubut, d nutni ara k-isseddayen
I ma yella ţmesxiṛen fell-ak? Ma nnan-ak-d: “Acu i k-yuɣen? Tugadeḍ?” Fhem imeslayen-agi akken i llan: d lḥerṣ sɣur yemdukkal, d aya kan. Acu ara txedmeḍ? Tesεiḍ alukan snat leḥwayeǧ:
-
Tzemreḍ aţ-ţṣebreḍ i wetmesxeṛ-nni. (A sen-tiniḍ: “D ṣṣeḥ, ugadeɣ!” Mbeεd a sen-tessefhmeḍ s kra kan n imeslayen ayɣer.)
-
Tzemreḍ a sen-terreḍ ameslay. A sen-tiniḍ acuɣer i tugiḍ w’a ten-tdemmreḍ ad xemmen. (A ten-testeqsiḍ: “Eεni kenwi teţkeyyifem? Γileɣ-ken tḥeṛcem akteṛ!”)
Ma yella imdukkal-ik mazal ţmesxiṛen fell-ak, beddel amkan! Ur teţţu ara belli ma teqqimeḍ akteṛ yid-sen, lḥerṣ-nni ad izid. Ma tettaxxṛeḍ syenna, a d-tbeggneḍ belli ur teţţaǧǧaḍ yiwen a k-isseddu akken i gebɣa.
D ṣṣeḥ, ur tezmireḍ ara aţ-ţmenεeḍ i lḥerṣ n yemdukkal. Meεna, tzemreḍ aţ-ţextiṛeḍ d acu ara txedmeḍ. Mbeεd a d-tiniḍ εinani ayen i textaṛeḍ w’aţ-ţxedmeḍ ayen i k-yehwan i kečč. Di tin n ṣṣeḥ, d kečč kan ara yeṭṭfen leqrar!—Yacuεa 24:15.