KIHSEN SIYUCK 6
Fuhkah Nga Kuh In Lain Mwe Ahkkuluk luhn Tuhlihk ke Matwuck?
MEAC KOM KUH IN ORUH?
Nuhnkuh ke mwe luhmahlah se inge: Ke pacl se ma luo sin tuhlihk lutlut ke class lal Bryan fahsr apkuhranyang nuh yohrohl, el arlacna tuhfalwack. Ke wik se inge, eltahl srihke pacl luo tari elan sismohki. Na pacl se ahktolu pa eltahl ac srihke inge.
Tuhlihk mukul se meet ah fahk:
“Kom sulpac muhkwena? Lwelah nga in tuhkahkihnkomyang nuh sin kawuck se luhk inge.”
El fahk na kahs se inge “kawuck” ke pacl se el koto muhtahl nuh sel ac ke pacl sacn, el eislah ma se ke pakiht lal ah ac kohlwacng nuh sel Brian.
Brian el liye paip soko ma tuhlihk mukul se inge el sruokyac ke pahol, pwacnacng el tuhfalwack liki na meet ah.
Brian el fahk: “Sislah kuluk, nga fahk tari nuh sum lah nga tiac kuh . . . ”
Tuhlihk mukul se sahyac ah fahk pac muh: “Kom sahngwengtoht!”
Brian el puhlaik in fahk: “Nga tiac na!”
Na, tuhlihk mukul se sahyac ah fihliyac pahol finpihsacl Brian ac mahmah nuh sel ac fahk: “Sruokyac.”
Tuhlihk mukul se meet ah kohlwacng paip soko ah nuhke muhtahl Brian ac mahmah fahk: “Kuht ac tiac fahk nuh sin kuhtwena mwet. Wacngihn mwet ac etuh.”
Fin kom pa Brian, meac kom ac oruh?
TUI AC NUHNKUH MEET!
Yac tuhlihk mukul weluhl Brian inge etuh na pwacye ke ma eltahl oruh uh? Yac eltahl sifacna sulaclah in sismohk? Sahp, moh. Ke inkaiyen pacl uh, eltahl lwelah na tuhlihk sahyac uh in kihfasaltahllah. Ke srihpen eltahl luhngse in akihlenyuck eltahl, pwacnacng eltahl lwelah tuhlihk sahyac ingacn in fahk ma eltahl in oruh.
Kom fin sun kain in ohiyac se inge, yac oasr inkacnek se sahyac ma kom ac kuh in orekmakihn in sang lain ma upac ma orek sin tuhlihk ke matwom ingacn?
-
NUHNKWACLAH MEET KE MA AC KUH IN SIKYAK
Bible uh fahk: “Ke pacl se mwe lokoalok tuhkuh, mwet etuh elos ac fahsr liki; a sie mwet wacngihn nuhnak la ac fahsryang nuh kac, na tohkoh el auli.”—Soakas 22:3.
Ke inkaiyen pacl uh, kom kuh in sa na etuh ke ma upac ma ac kuh in sikyak uh. Ke sie mwe puhpuhlyuck, ke kom fahsr ac liye un tuhlihk lutlut wiyom suc tu meet kuhtuh, ac eltahl tu sismohk. Ke kom nuhnkuh meet ke ma upac ma ac kuh in sikyak uh, kom ac ahkolah nuh kac.
-
NUHNKUH MEET
Bible uh fahk: “Karihngihn nuhnak luhn insiowos in nwacsnwacs na.”—Sie Peter 3:16.
Siyuck sum sifacna, ‘Meac ac sikyak nuh sihk tohkoh, fin nga wi ukwe u se inge?’ Pwacye lah sahp, eltahl ac wo nuh sum ke kihtin pacl na. Na tok kuhtuh, ac fuhkah puhlakihn lom an? Yac kom sruhnga in etweyuck lah suc na pwacye kom an in muh kuh in ahkenganye tuhlihk lutlut wiyom ingacn?—Exodus 23:2.
-
ORUH SULACLAH
Bible uh fahk: “Mwet etwacack elos karuhnguhnwacng in tiac sun mwe lokoalok.”—Soakas 14:16.
Oasr pacl ma kuht ac enenuh in oruh sulaclah lasr ac moul fal nuhke ma sikyak ke sulaclah lasr uh. Bible uh sramsramkihn ke kuhtuh pac mwet suc oacna Joseph, Job ac Jesus, ac eltahl nuhkewa oraclah sulaclah wowo. Ma inge oacyacpac sruhmuhnuhl Cain, Esau, ac Judas suc oraclah sulaclah kuluk. Fin pa kom, meac kom ac oruh?
Bible uh fahk: “Kuhtwena mwet suc oaru in ma srihk, ac fah oaru pac ke ma yohk.” (Luke 16:10) Kom fin nuhnkaclah ke ma ac kuh in sikyak an ac oraclah tari sulaclah lom, sahp kom ac lut kac lah arlac fihsracsr in ahkkahlwemye sulaclah lom an ac ke sahflahiyac an, kom engan kac.
Nikmet elyah, kom tiac enenuh in ahkuhtweyac nuh seltahl ke ma nuhkewa. Sahp, fal tari kom fin fahk muh MOH. Kuh, in ahkkahlwemye lah sulaclah lom an tiac kuh in eklac, na kom kuh in fahk:
-
“Ngac ac tiac wi komtacl kac!”
-
“Nga tiac oruh kain in orekma ngacn!”
-
“Komtacl etuh na pwacye lah nga mwet fuhkah se!”
Ma yohk srihpac an pa kom in sa na in ahkkahlwemye lah kom tu na kuh ke sulaclah lom an. Kom fin oruh ohingacn, kom ac lut ke eltahl ac sa na in som liki kom ac tiac sifwilpac ahkkulukye kom!
OHIYAC MA FAL IN AHKKAHLWEMYEYUCK NUH SIN MWET AHKSRUHKSRUHK
Kom fin lwelah na mwe ahkkuluk inge in orek nuh sum sin tuhlihk ke matwom ingacn, kom ac eklac oacna sie robot ma oan ye karihngihnyuck laltahl uh
Fuhkah fin tuhlihk ke matwom ingacn ahksruhksruhkye kom? Fuhkah eltahl fin fahk, “Efuh kuh kom sahngwengtoht?” Esam lah eltahl luhngse na in ahksruhksruhkye kom. Meac kom ac oruh? Pa inge luo sin ma kom kuh in oruh.
-
Kom kuh in fahk. (“Pwacye sum, nga sahngweng!” Na tukun ma inge, fahk srihpac lom an ke kahs fototo.)
-
Kom kuh in fohlohkihn kahs in ahkkuluk laltahl ingacn. Fahk nuh seltahl srihpac lom an lah efuh kom sruhnga, ac tukun ma inge orekmakihn kahs ma eltahl ac kuh in nuhnkuh kac. (“Nga nuhnkuh muh komtacl etuh lah sismohk uh kuluk nuhke mahno!”)
Fin tuhlihk ke matwom ingacn tahfwelah na in ahksruhksruhkye kom, som luhkeltahl! Esam lah kom fin muhta paht yohrohltahl, mwe ahkkuluk ingacn ac upaclah liki na meet ah. Kom fin som luhkeltahl, kom ahkkahlwemye lah kom tiac lwelah tuhlihk ke matwom ingacn in ekuhllah ohiyom.
Pwacye lah, kom tiac kuh in kahingkuhnlah ma upac ma orek sin tuhlihk ke matwom ingacn. Tuhsruhktuh, kom kuh in sulaclah lah meac kom luhngse in oruh, tiac lwelah mwet sahyac in fahk nuh sum ma kom kuh in oruh ac tu na kuh ke sulaclah lom an. Kom pa ac oruh sulaclah lom an!—Joshua 24:15.
