Fwanyikizha bino: Brian byo amona balunda babiji mo bafunjila babena kwiya ko aji waumvwa ne munda kuu. Uno mulungu, bano balunda nanji baeseka kumukanjikizha kupepa fwanka bimye bibiji. Lelo jisakwikala ja busatu.

Mulunda nanji mutanshi waamba’mba:

Pa kwamba’mba “mulunda,” wafyeteka ne jiso ne kukula mu pokochi ne kutolamo fwanka ne kupa Brian.

Brian byo amona mukwabo watola fwanka, waumvwa ne munda mwakola.

Umvwe yobe wajinga Brian, inge waubile byepi?

Nanchi balunda nanji Brian bayuka kintu kyo babena kuba nyi? Nanchi bene befuukwijiletu kutendeka kupeepa fwanka nyi? Ine. Mambo balondelatu byuba bakwabo pa kuba’mba bakwabo bebatemwe.

Umvwe yobe wapichile mu luno lukatazho, inge waubile byepi?

1. YUKA BYAKONSHA KUFUMAMO

   Baibolo waamba’mba: “Muntu wajimuka umona bileta malwa kabiji ufyama, pakuba muntu wabula maana uyatu kabiji umona bya malwa.”—Byambo bya Maana 22:3.

   Bimye bimo wakonsha kumwena jimo lukatazho. Twambe’mba wamona kiombe kya bakwenu mo mufunjila kulutwe saka babena kupepa fwanka. Kumwena jimo lukatazho kukakukwasha kuyuka bya kuba.

2. LANGULUKAPO

   Baibolo waamba’mba: “Ikalai na jiwi ja mu muchima jawama.”—1 Petelo 3:16.

   Ishikishe’mba, ‘Nkamwenamo ka inge kengubetu bibena kuba bakwetu?’ Kimye kyo bakwambila kuba byo babena kukeba, wakonsha kukeba kutokesha bakwenu ku muchima. Pano ukomvwa byepi ku muchima inge papita moba? Nanchi ubena kukebatu kutokesha ku muchima bakwenu mo mufunjila nyi?—Kulupuka 23:2.

3. FUUKULAPO

   Baibolo waamba’mba: “Muntu wa maana wajimuka.”—Byambo bya Maana 14:16.

   Atweba bonse twafwainwa kwifuukwila byo tukeba kuba, pano bino inge bintu byatama bitumwekela kafwako ye tukajijila ne. Baibolo waamba pa banabalume nabiji Yosefwa, Yoba ne Yesu, bafuukwilepo kuba bintu byawama. Kabiji Baibolo witubuula pe Kaina, Isao ne Yudasa basajilepo kuba bintu byatama. Nga obewa ukoba byepi?

Baibolo waamba’mba: ‘Ubila bintu mu bukishinka.’ (Salamo 37:3) Inge walangulukila jimo pa bikafumamo mu bikeba bakwenu amba ube, kabiji wafuukwila jimo byo usakuba, kikapela bingi kukumbula bakwenu, kabiji ukamwenamo bintu byawama.

Kino kechi kibena kulumbulula’mba wafwainwa kutendeka kubuula bakwenu nobe ubena kwibafunjisha ne. Wafwainwatu kwamba’mba NAKANA. Nangwa wakonsha kwibabula kwa kubula kupita mu mbaji amba:

• “Kechi nkeba ne!”

• “Amiwa kechi nguba bintu bya uno mutundu ne!”

• “Mwayukishatu bulongo amba amiwa kechi nguba byobyo ne!”

Kyanema ke kukumbula ponkapotu saka washiinwa. Inge wauba bino, ukakumya bingi bakwenu byo bakaleka kukukanjikizha kuba byatama.

Wakonsha kuba byepi inge bakwenu babena kukwendeleka? Umvwe bakwambila’mba: “Ki ka kyakatazha? Mambo ka o waubila moyo bibye?” Wafwainwa kuyuka’mba ino ñambilo ya myendeleko ke jishinda jikwabo bakwenu mo bakonsha kukukanjikizha kuba byatama. Pano wakonsha kwibakumbula byepi? Kuji mashinda abiji o wakonsha kusalapo.

• Wakonsha kuswa byambo byabo bya myendeleko. (“Waamba kine, amiwa nchina!” Kabiji lumbulula ne ene mambo.)

• Bakonsha kuleka kukwendeleka. Babule ene mambo o wakaina ne kwibambila’mba: (“Amiwa namonanga nobe muji bingi na maana. Nanchi ne anweba muba bintu bya uno mutundu?”)

Inge bakwenu batwajijila kukwendeleka, wafwainwa kufumapo. Vuluka kuba’mba inge watwajijila kwikala ponka, bakwenu bakakizhamo kukwendeleka. Bino inge wafumapo ukebamwesha’mba kechi ukeba bakubuulenga bya kuba ne.

Kishinka ke kya kuba’mba ukamonañananga na bakwenu bakukanjikizha kuba byatama. Pano bino, kiji ko uji kufuukula bya kuba, kwibabuula’mba wakana, ne kwimenatu pa kyo wafuukulapo. Wafwainwa kusalapo byo ukeba kuba obe mwine.—Yoshua 24:15.