Yiyaŋndɔ a taamaseliiyo hoo. Mɛɛ Musa chaaŋaa nduaa sukuuwa a ŋiɔɔŋ sɔɔŋguu ndu dɔɔ ikɛi, mi pulei kial ndu bueeŋ. A kindiŋ niŋ lediiŋ o lɔɔ hoo bɛŋgu le ndu sikɛɛtiiyo kioo mbo kol. Yaa ndɔɔ cho niŋ hoo ni.

Poombɔ tasoo dimi aa,

Mbo kindila diomndo hoo “chaŋyɛi” a mamɔɔ muɛɛŋ, mbo soliŋ nyɛ ndu o yifɔ mbo yulul Musa.

Mi Musa cha sikɛɛtiiyo poombɔɔ o sooŋ tɛɛŋ. Mi pulei chɔɔlu ndu kiolɔɔ.

Te ndoo wa pɛ aa num cho Musa ni, yɛɛ ŋ wa yɛ tosa?

Baa mi chaaŋaa Musa wa ndaa yiyaŋ pa a nyɛ nda wa tosaa wo? Mi ndaa tosa pa kɛɛsiaalaŋ a ba nda? Pɛ pɛ bɛɛ. O kpeekpei niŋ, ma tosa nyɛ chaaŋaa ndaa yeema nda ma tosa wo? Ndaa yeema mi chaaŋaa ndaa kɛɛ nda le, lelaŋ ma chɛl le tosaa nyɛ chaaŋaa ndaa dimul nda le tosaa wo.

Te suɛi waa naa komal num pɛ, vɛɛ ŋ tiu yɛ ba ma tosa kɛɛsiaa le ma kɛɛ nyɛ chaaŋaa numnda dimul num le tosaa wo?

1. NƆ O KƆL MAA I CHO NUM KOMAL

   Baabuiyo dimi aa, “Wana kɔl kaloo, mbo nɔla mbo che kpundɔɔ ndu lachi, mbo kpɛkpɛla ndu. Kɛ diɔmndo ndu ndu, o lo kɔlaŋ mbo kɔ del o kpundɔɔ niŋ.”—Pulɔwaa 22:​3.

   Teleŋnda bɔɔbɔɔ, kpundɔɔ lo landaŋ ma che ndu. Le taamaseliiyo, te o yɔŋ yɛ ma che chaaŋaa num aa sukuu wa kundaa num lachi, nduyɛ a cho sikɛɛtiiyo kolɔɔ? Te a che pɛ maa kpundɔɔ cho koŋ num hunɔɔ lachi ni, a cho bɛɛndiaŋ le ndu chɔulabaa.

2. YIYAŊ

   Baabuiyo dimi aa, “Kɔlta nyalaŋ la wa nyɛ kɛndɛ walaŋ.”​—Pitɛ Tasoo 3:​16.

   Nyunaŋndɔ aa, ‘Vɛɛ ya cho yɛ yiyaŋ te I tol pɛ faŋga bɛndoo kɔɔli?’ A tonya, naapum le teleŋ biŋgi, a cho kɛɛ chaaŋaa numnda kɔllo tɛɛmbuu wo. Kɛ vɛɛ ŋ cho yɛ yiyaŋ okoŋ kɔɔli? A cho pa numpila sala soliŋ le mɛɛ ŋ yeema ma nɛŋi chaaŋaa numaa sukuuwa kɔllɛ?—Ɛsɔdɔɔ 23:​2.

3. KƐƐSIAA

   Baabuiyo dimi aa, “Wana kɔl kaloo mbo chaa hɛli hɛliŋndo”—Pulɔwaa 14:​16.

   Hau ɔɔ siɔdii, naa kpou cho kɛɛsiaa tosa nduyɛ miŋ sɔla fulamakɔɔlioo. Baabuiyo soo a waŋpiaanduaa okɔɔ mɛɛ Choosɛ cho naa yɛ, Choobu, a Chiisu. Mi nda kpou tosa kɛɛsiaala kɛndɛlaŋ. Baabuiyo soo vɛlɛ a Keŋ okɔɔ, Iisɔ, a Chuda. Mi nda bɛɛ tosa chuaŋ chua wɔɔŋndo. Yɛɛ ŋ cho yɛ tosa?

Baabuiyo dimi aa, “La bii o cho o kɛndɔɔ wo nyɛ kɛndɛ kpiŋ.” (Luomaŋnda 12:​9) Te a chii pɛ yiyaŋ a fulamakɔɔlilaŋ okoŋ ma tosa kɛɛsiaa, o wa tɛtɛlɛ le tosaa nyɛ ŋ tuu wo, nduyɛ tɔnɔɔ cho wa.

Buulaŋ te, a nɔ ma soo tau le chaaŋaa numnda dimullo nyɛ ŋ tuu le tosaa wo le. A dimi naa Ɛ Ɛ mbo wa letuu. Te koŋ te, le ma lo o diom numndo choo, a dimi naa aa:

• “I cho tosa le!”

• “I tosa suɛi waa lende le!”

• “I cho o kaa waa naa niŋ te!”

Nyɛ bɛnda wo keleŋaa muli o foofo nduyɛ ma lo o lediom. Te a tosa lende pɛ, kɔndɔfillo cho num biyɔɔ le sinaa maa chaaŋaa numnda cho num kiolɔŋ kɔɔli chɔ chɔ!

Te o yɔŋ yɛ mi chaaŋaa numnda wa num mamɔɔ? Te o yɔŋ yɛ ma dimi aa, “Yɛɛ yɔŋnuŋ yɛ, baa wana isiooŋndo ŋ cho ni?” Sina maa o cho nyɛ cheleŋ te cho hoo le, mamɔɔ kɛsɛ o cho ni. Yɛɛ ŋ cho yɛ tosa? A nɔ chuaŋ chua laŋ latiɔɔŋ.

• A nɔla ma biuŋ mamɔɔ koŋ. Ma dimi aa, (“Tonya nya dimi ni, siooŋnde cho ya!” Okoŋ a chɔm nda sabu siooŋnde cho numndo chobe.)

• A tiuba mi num bɛɛ miŋgul nda mamɔɔ koŋ. A chɔm le sabu ŋ cho kiɔɔ wo, okoŋ ma chɔm kaa chaaŋaa numaa kaŋ. Dimi aa, (“La cho bɔɔ wanaa lebɛɛ le kumnde sɔsaa!”)

Te chaaŋaa numaa kaŋ hiou pɛ lachi a num mamɔɔ, faŋaŋ loŋ! Loonuŋ maa mɛɛ ŋ viau isisi loŋ fau, lende koni suɛi chɔɔlu kui ni. Te a faŋaŋ loŋ pɛ, mɛɛ a chɔm maa a chɛl mi acheleŋnda siŋga wana suu ŋ cho wo le.

O kpeekpei niŋ, a tiuba ma veŋnuŋ nyɛ chaaŋaa numnda yeema num le tosaa wo. Kɛ a kɛɛsiaa nyɛ ŋ tuu le tosaa wo, chɔm wana suu ŋ cho wo, okoŋ ma bii kɔllo. O mɛɛlulaŋ, numpila nɔ chuaŋ chuaa o ba ni!—Chɔɔsuaa 24:​15.