တၢ်သံကွၢ်နီၣ်ဂံၢ် ၆
ယတြီဆၢယသကိးတဖၣ် အတၢ်ဆီၣ်သနံးကသ့ဒ်လဲၣ်
မ့မ့ၢ်နၤန့ၣ် နကမၤဒ်လဲၣ်
ဆိကမိၣ်ကွၢ် တၢ်ဂ့ၢ်အံၤတက့ၢ်– ဖဲဘြါယၢၤထံၣ်စိဝဲအသကိးခံဂၤ ဟဲလၢအအိၣ်အခါ အသးကနိးထီၣ်ဝဲဒိၣ်မးလီၤ. ဖဲတနွံအံၤအတီၢ်ပူၤန့ၣ် အသကိးမၢအအီမိာ်ခံဘျီလံ. ဒီးခဲအံၤကဟဲမၢကဒီးအီၤလၢအသီတဘျီလီၤ.
အသကိးအဆိကတၢၢ်တဂၤတဲဝဲလၢ–
“နအိၣ်တဂၤ တၢ်တကၢၣ်နသးဧီၤ, ဟဲအီကွၢ်သၢၣ်.”
ဖဲအဝဲတဲဝဲဒ်န့ၣ်အခါ အဝဲထုးထီၣ်ဝဲမိာ်ထူလၢ အဆ့ကၤထၢၣ်ပူၤဝံၤဒီး ဂုာ်ကျဲးစၢးဟ့ၣ်လီၤဝဲဘြါယၢၤလီၤ.
ဘြါယၢၤထံၣ်ဝဲလၢ မိာ်ထူအိၣ်ဝဲလၢအသကိးစုပူၤအဃိ အသးကနိးဒိၣ်ထီၣ်တစဲးလီၤ.
ဘြါယၢၤ တဲအီၤလၢ “ဝံသးစူၤလီၤ ယတဲသုဝံၤလံဒၢး ယတမၤဘၣ် . . .”
ဒီးအသကိးလၢအဂၤတဂၤန့ၣ် ဟဲနုာ်လီၤတဲဝဲလၢ “ဘၣ်မနုၤအဃိ နပျံၤတၢ်လဲၣ်, နတကဲပိာ်ခွါဧီၤ.”
ဘြါယၢၤ တဲဆၢက့ၤအဝဲသ့ၣ်လၢ “ကဲဝဲသၢၣ်.”
ဒီးအသကိးလၢအဂၤတဂၤ ဟဲပာ်ထီၣ်အစုလၢ ဘြါယၢၤအဖံဘၣ်ခိၣ် ဒီးတဲဝဲလၢ အကလုၢ်ကသွံဒံဖိလၢ “ဟံးန့ၢ်သၢၣ်.”
ဒီးအသကိးလၢအဆိကတၢၢ်တဂၤန့ၣ် ပာ်ဝဲမိာ်ထူဘူးဒီး ဘြါယၢၤအမဲာ်သၣ် ဒီးတဲကသွံကဒီးဝဲလၢ “အီမီၤ ပတတဲပှၤနီတဂၤဘၣ်. နမ့ၢ်အီနာ်က့ ပှၤတသ့ၣ်ညါနီတဂၤဘၣ်.”
နမ့ၢ်အိၣ်ဘၣ်လၢ ဘြါယၢၤအလီၢ်န့ၣ် နကမၤဒ်လဲၣ်.
ဟံးန့ၢ်တၢ်ဆၢကတီၢ်ဒီး ဆိကမိၣ်ထံတၢ်တက့ၢ်
ဘြါယၢၤ အသကိးတဖၣ်မၤဝဲဒ်အံၤန့ၣ် မ့ၢ်အဝဲသ့ၣ်ဆိကမိၣ်ထံဝဲစ့ၢ်ကီးဧါ. မ့ၢ်အဝဲသ့ၣ်ဆၢတဲာ်တၢ်လၢ အနီၢ်ကစၢ်ဒၣ်ဝဲဧါ. ဘၣ်သ့ၣ်သ့ၣ် အဝဲသ့ၣ်စ့ၢ်ကီး ဘၣ်တၢ်ဆီၣ်သနံးအီၤလီၤ. ဒီးအဝဲသ့ၣ်အဲၣ်ဒိးဝဲလၢ ပှၤဂၤကဘၣ်သူၣ်ဘၣ်သးအီၤဒီး တူၢ်လိာ်အဝဲသ့ၣ်အဃိ မၤဝဲဒ်န့ၣ်လီၤ.
နမ့ၢ်ဘၣ်သဂၢၢ်ဒီးတၢ်အိၣ်သးဒ်အံၤန့ၣ် နတြီဆၢနသကိးတဖၣ် အတၢ်ဆီၣ်သနံးကသ့လၢကျဲဒ်လဲၣ်.
-
ထံၣ်ဆိတၢ်လၢ ကမၤအသးတဖၣ်
လံာ်စီဆှံတဲဝဲလၢ– “ပှၤကူၣ်တၢ်ဘၣ်န့ၣ်, ထံၣ်ဘၣ်တၢ်အၢ, ဒီးပာ်တဒၢအသးလီၤ. မ့မ့ၢ်ပှၤအတမၤလိဘၣ်တၢ်ဘၣ်န့ၣ်လဲၤဒၣ်တၢ်, ဒီးဘၣ်တၢ်နးတၢ်ဖှီၣ်လီၤ.”—ကတိၤဒိ ၂၂:၃.
ညီနုၢ်တချုးလၢ တၢ်ဘၣ်ယိၣ်ဟဲကဲထီၣ်အသးဒံးဘၣ်န့ၣ် ပထံၣ်ဆိတၢ်လၢ အကဟဲကဲထီၣ်အသးသ့ဝဲလီၤ. အဒိ လၢနမဲာ်ညါန့ၣ် နထံၣ်စိနသကိးတဖၣ်လၢကၠိဒီး အဝဲသ့ၣ်အီဝဲမိာ်လီၤ. ခီဖျိနသ့ၣ်ညါဆိလၢ အဝဲသ့ၣ်ကမၢဆူၣ်နၤလၢနကအီမိာ်အဃိ နကအိၣ်ကတဲာ်ကတီၤနသးလၢ နကတြီဆၢအီၤအဂီၢ်လီၤ.
-
ဆိကမိၣ်ထံတၢ်တက့ၢ်
လံာ်စီဆှံတဲဝဲလၢ– “အိၣ်ဒီးသုသးလၢ အသ့ၣ်ညါဒၣ်တၢ်အဂ့ၤ” တက့ၢ်.—၁ ပ့းတရူး ၃:၁၆.
သံကွၢ်လီၤနသးလၢ ‘ယမ့ၢ်မၤပိာ်အဝဲသ့ၣ်အခံန့ၣ် လၢခံယကတူၢ်ဘၣ်ဒ်လဲၣ်.’ နမ့ၢ်မၤပိာ်အဝဲသ့ၣ်အခံန့ၣ် အဝဲသ့ၣ်ကအဲၣ်နၤလီၤ. ဘၣ်ဆၣ် လၢခံန့ၣ်နကတူၢ်ဘၣ်ဒ်လဲၣ်. မ့ၢ်နအဲၣ်ဒိးဆီတလဲကွံာ် နလုၢ်လၢ်သကဲာ်ပဝးဒီး နတၢ်ပာ်သူၣ်ပာ်သးလၢအဂ့ၤ ဒ်သိးနသကိးတဖၣ် ကဘၣ်သူၣ်ဘၣ်သးနၤအဂီၢ်ဧါ.—၂ မိၤၡ့ ၂၃:၂.
-
ဆၢတဲာ်လီၤနသးဂၢၢ်ဂၢၢ်ကျၢၤကျၢၤ
လံာ်စီဆှံတဲဝဲလၢ– “ကယဲၢ်တၢ်လၢပှၤကညီဖှံဝဲတမံၤမံၤန့ၣ်, ကကူးအဝဲန့ၣ်စ့ၢ်ကီးလီၤ.”—ကလၤတံ ၆:၇.
ပဝဲတဂၤစုာ်စုာ် ပကဘၣ်ဆၢတဲာ်တၢ်လၢပနီၢ်ကစၢ်လီၤ. ဒီးဒ်ပဖှံလီၤအသိးန့ၣ် ပကကူးဘၣ်က့ၤအီၤလီၤ. လံာ်စီဆှံပာ်ဖျါထီၣ်ဝဲ စီၤယိၤသး, စီၤယိၤဘးဒီး ယ့ၣ်ၡူးန့ၣ် မၤဝဲတၢ်ဆၢတဲာ်လၢအဘၣ်လီၤ. မ့မ့ၢ် စီၤကၤယံၣ်, စီၤဧ့ၡီၤ ဒီးစီၤယူဒၤအံၣ်စကၤရံၤအိာ်န့ၣ် လံာ်စီဆှံပာ်ဖျါထီၣ်ဝဲလၢ အဝဲသ့ၣ်ဆၢတဲာ်တၢ်လၢအကမၣ်လီၤ. နၤမီၤနကမၤဒ်လဲၣ်.
လံာ်စီဆှံတဲဝဲလၢ– “အိၣ်စဲဘူးဒီးတၢ်ဂ့ၤတက့ၢ်.” (ရိမ့ၤ ၁၂:၉) နမ့ၢ်ဆိကမိၣ်ဆိတၢ်လၢ အကဟဲကဲထီၣ်အသးလၢခါဆူညါ ဒီးနမ့ၢ်အိၣ်ကတဲာ်ကတီၤပာ်စၢၤနသးန့ၣ် ကမၤစၢၤနၤဒ်သိး နပာ်ဖျါထီၣ်နတၢ်ထံၣ် ကဘူၣ်ဝဲအဂီၢ်လီၤ. တကးဒံးဘၣ် နကဒိးန့ၢ်ဘၣ်တၢ်သူၣ်မံသးမုာ်စ့ၢ်ကီးလီၤ.
တဘၣ်ကိၢ်တဂ့ၤ, တလိၣ်လၢ နသိၣ်နသကိးတဖၣ်ဘၣ်. နတဲအဝဲသ့ၣ်ဒူဒူလၢ ယတမၤဘၣ်. မ့တမ့ၢ် ဒ်သိးအဝဲသ့ၣ်ကနၢ်ပၢၢ်လၢ နဆၢတဲာ်လီၤနသးဂၢၢ်ဂၢၢ်ကျၢၤကျၢၤဝံၤဝဲအဂီၢ် နတဲအဝဲသ့ၣ်ဒ်အံၤသ့ဝဲလီၤ–
-
“ယတမၤဒ်န့ၣ်ဘၣ်”
-
“ယတမၤဘၣ်ထွဲယသးဒီး တၢ်သ့ၣ်တဖၣ်အံၤဘၣ်”
-
“နသ့ၣ်ညါလံ, ယတမၤဘၣ်ဒၢး”
တၢ်လၢအရ့ဒိၣ်ကတၢၢ်န့ၣ် နကဘၣ်တဲဆၢအဝဲသ့ၣ် ဒူဒူတဘျီဃီလီၤ. နမ့ၢ်မၤဒ်န့ၣ်န့ၣ် ဘၣ်သ့ၣ်သ့ၣ် နကထံၣ်ဘၣ်လၢ နသကိးသ့ၣ်တဖၣ်ဟဲလ့ပစီနၤတဘူၣ်လၢၤဘၣ်.
ဖဲနသကိးတဖၣ် တဲဆါနၤအခါ
နမ့ၢ်မၤဒ် နတံၤသကိးမၢဆူၣ်နၤအသိးန့ၣ် နကလီၤဂာ်ဒ်တၢ်ဂီၤဖိလၢ အိၣ်လၢအဝဲသ့ၣ်အစုပူၤန့ၣ်လီၤ
နသကိးတဖၣ် မ့ၢ်တဲဆဲးအဲးနၤန့ၣ်နကမၤဒ်လဲၣ်. ဘၣ်သ့ၣ်သ့ၣ် အဝဲသ့ၣ်ကတဲနၤလၢ ဘၣ်မနုၤအဃိ နပျံၤတၢ်လဲၣ်, နတကဲပိာ်ခွါဧီၤ. နမ့ၢ်ဘၣ်သဂၢၢ်တၢ်ကတိၤဒ်အံၤန့ၣ် သ့ၣ်ညါလၢ တမ့ၢ်ထဲနၤတဂၤဘၣ် ပှၤအဂၤစ့ၢ်ကီး ဘၣ်သဂၢၢ်ဝဲဒီး တၢ်မၤကွၢ်တဖၣ်အံၤလီၤ. ဘၣ်ဆၣ် နကမၤဆၢကဒါက့ၤဒ်လဲၣ်. ကျဲလၢနမၤနၢၤကွံာ်တၢ်ဆီၣ်သနံးအံၤသ့န့ၣ် အိၣ်ဝဲခံဘိလီၤ.
-
အဝဲသ့ၣ်မ့ၢ်တဲဆါနၤဒ်န့ၣ်န့ၣ် နက့ၤတဲဆၢက့ၤအီၤဒ်အံၤသ့ဝဲလီၤ. (“မ့ၢ်ယကဲပိာ်ခွါနာ်က့ ယအီမိာ်တဘူၣ်ဘၣ်” ဒီးတဲနၢ်ပၢၢ်အဝဲသ့ၣ်လၢ ဘၣ်မနုၤအဃိ နအီမိာ်တဘူၣ်ဘၣ်လဲၣ်န့ၣ်တက့ၢ်.)
-
မ့တမ့ၢ် နက့ၤတဲဆၢအီၤဒ်အံၤသ့ဝဲလီၤ. တဲဘၣ်အီၤလၢ ဘၣ်မနုၤအဃိ နတအီမိာ်လဲၣ် ဒီးတဲအီၤလၢ (“ယတဆိကမိၣ်လၢ ပှၤဖၠဲးဒ်သိးဒီးနၤကအီမိာ်နီတဘျီဘၣ်.”)
အဝဲသ့ၣ်မ့ၢ်ဆဲး တဲဆါနၤန့ၣ် ဟးထီၣ်ကွံာ် ဖဲန့ၣ်တက့ၢ်. နမ့ၢ်အိၣ်တ့ၢ်ဖဲန့ၣ်န့ၣ် တၢ်ဆီၣ်သနံးနၤ ဒံးယံာ်ဒံးဆူၣ်ထီၣ်ဝဲလီၤ. ခီဖျိလၢနဟးထီၣ်ဖဲန့ၣ်အဃိ အဝဲသ့ၣ်မၢဆူၣ်နၤတန့ၢ်လၢၤဘၣ်.
နဟးဆှဲး နသကိးအတၢ်ဆီၣ်သနံး တသ့ထီဘိဘၣ်. ဘၣ်ဆၣ် နကတဲာ်ကတီၤဆိနသး, နတဲဖျါထီၣ်နတၢ်ထံၣ်ဒူဒူ, ဒီးနဆၢတဲာ်နသးဂၢၢ်ဂၢၢ်ကျၢၤကျၢၤသ့ဝဲလီၤ. ဒီးသ့ၣ်နီၣ်ထီၣ်က့ၤလၢ တၢ်ဆၢတဲာ်ခဲလၢာ်န့ၣ် အိၣ်လၢနစုပူၤလီၤ.—ယိၤၡူ ၂၄:၁၅.