EPURO 6
Ngapi nani nyokera po mazedo govakaume?
YISINKE NO RUGANA?
Tu tante asi Brian ana tukuka ngomu vana kumuwizira vakwawo vavali wokosure. Mosivike esi yikando yivali vana mu sininike asi ngano a koke makanya. Esi tasi kara sikando sautatu.
Mumati gokuhova tanta asi:
“Nyovelike hena ono kugenda sa? Nina kugwanene ko kaume.”
Apa ana kutumbura nkango “kaume” age ta mu fenya neho ngomu ana kugusa sininke melimba nokusimutambeka.
Brian ta mono ogo mumati kuna kwaterere ekanya. Ta kara nowoma unene.
Brian ta tanta asi: “Amesi kani ku tanterere nare asi ame kapi ani . . . ”
Mumati gwauvali ta mu donganesa pokutanta asi: “Kapisi kugovara ngoso mumati!”
Brian ta tanta: “Ame kapisi egova!”
Mumati gwauvali ta mu kwata posipepe nokumutantera asi: “Ove gusa tupu.”
Mumati gokuhova ta henyesa ekanya komurungu gwaBrian nokuuyunga nezwi lyokuwowota asi: “Kapi natu ka yi tantera vantu. Kwato ogu ngayi diva.”
Ngano nyove Brian, yisinke ngano no rugana?
GAZADARA KO!
Vakwawo wokosure vaBrian vana diva eyi vana kurugana ndi? Vene va tokora kukoka makanya ndi? Hawe. Nawo vakwawo va va zedagwilire. Awo kukoka makanya mokuhafesa vakwawo.
Eyi vana kurugana Brian yiyo nawo ya va horokera, ngano nyove, etokoro musinke no tura po mokunyokera po mazedo govakweni?
-
LIWAPAIKIRA
Bibeli kutanta asi: “Vantu wonondunge kumona udigu tau wiza, makura tava u henduka, nye ava va hana kugazara kuvyukilira mo, makura konyima ntani vana kulivera.”—Yisewe 22:3.
Pamwe kuvhura o dimburure udigu komeho zosiruwo. Pasihonena, tu tante asi ove kuna kugenda makura to mono vanasure vakweni komeho awo kuna kukoka makanya. Pokudimburura udigu owo, ove ngo diva omu ngo u henduka.
-
GAZARA
Bibeli kutanta asi: “Kareni nezwi lyewa lyomomutjima.”—1 Peturusa 3:16.
Lipura asi: ‘Ngapi ngani lizuvha nsene ni honena nkenye eyi tupu vana kurugana vakwetu?’ Kuvhura ngo hafese vakaume woge. Nye ngapi ngo ka lizuvha mwaza siruwo? Ove ono hara kusiga nkareso zoge zongwa yipo o hafese vakweni ndi?—Exodus 23:2.
-
TOKORA
Bibeli kutanta asi: “Vantu wounongo kudimburura udona.”—Yisewe 14:16.
Twa hepa kutambura yitundwamo yomatokoro getu. Bibeli kututantera kuhamena vagara ngwendi Josefa naJoba ntani Jesus ava va tulire po matokoro gouhunga. Azo kututantera hena kuhamena Kaini naEsau ntani Judasa ava va tulire po matokoro gepuko. Ove ngapi?
Bibeli kutanta asi: “O rugane uwa.” (Episarome 37:3) Nsene asi wa gazadara ko nare koyitundwamo ntani wa tura po etokoro lyokupama, ayo ngayi ku rerupira kunyokera po mazedo govakaume.
Kapisi hepero o uyunge yoyinzi mokufwatwilira vakaume woge. Va tantera tupu asi: “Nina NYOKA” ndi kuvhura o uyunge asi:
-
“Mwa ha tura nge ko”
-
“Kapi ani lihameke mo yininke yangoso!”
-
“Mwa diva nge asi ame muntu musinke”
Mokukutompoka, limburura poopo nomukumo. Nsene o yi rugana kapi ngava kusininika hena.
NSENE KUNA KUKUSINDAGURA
Nsene o rugana nkenye eyi vana ku harere vakweni, ove ngo kara ngwendi ehina lyokurugana nkenye eyi vana li harere
Ngapi nsene vakweni tava kusindagura? Ngapi nsene va tanta asi: “Udigu musinke ono kara nawo, ove woma ndi?” Wa hepa kudimburura asi eli kuna kara ezedo. Yisinke no rugana? Kuvhura o rugane yininke yivali.
-
Kuvhura o yi tambure pokutanta asi: (“Yosili ame woma.” Makura gava konda.)
-
Kuvhura o mu tantere nkonda zeyi ono kunyokera. Ntani nokumunkisa a gazadare ko pokumutantera asi: (“Ame kugazara asi ove muntu gonondunge kapi to vhuru kukoka makanya.”)
Nsene asi vakweni tava twikire kukusindagura, tunda po! Diworoka asi moomu ono kukara po siruwo yimo hena nava twikira kukusindagura. Pokutunda po tayi likida asi ove kapi ono kupulisira va rundurure nkareso zoge.
Kapi to vhuru kuhenduka mazedo govakaume. Nye wa hepa kutokora eyi ono hara kurugana nokukwaterera ketokoro lyoge. Kwato gokuvhura kukutokwera po.—Josuwa 24:15.
