Yindula nona eki: O Bruno oyantikidi zakama vava kamwene akundi andi a sikola befinamanga vana kena. Mu lumingu lwalu, se nkumbu miole kala bavavidi kunkomekena kimana kanua e diamba. Owau i nkumbu watatu bazolele kumvukumuna.

E toko diantete ovovele vo:

Osimbidi Bruno vana vembo ekolo kebakanga e diamba muna nkutu andi.

Bruno omwene nkundi andi okwikanga e diamba. Bruno oyantikidi zakama.

Kele vo ngeye i Bruno, adieyi wadi vanga?

Nga akundi a Bruno bateka yindula vitila bayantika nua diamba? Nga yau kibeni babaka e nzengo zazi? Nanga ke yau kibeni ko. Vukumunwa bavukumwinu kw’akaka. Bazolele vo batondakana. Muna kuma kiaki, bayambula vo e zingu kiau kiafilwa kwa wantu ankaka.

Avo diambu dia mpila yayi onwananga diau, aweyi olenda bakila nzengo zambote yo lembi vukumunwa kwa akundi?

1. TEKA KUBAMA

   Nkand’a Nzambi uvovanga vo: “O nlungaladi omwene mbi, oswekamene; Atunga, lutakana, badilu o nkanu.”—Ngana 22:3.

   Olenda mona e vonza vitila kiabwila. Kasikil’owu, yindula vo omwene buka kia akundi aku a sikola benuanga e mfomo. Avo otekele yindula dina dilenda vangama, wakubama okala mu zizidila e ntonta.

2. YINDULA E MFWILU

   Nkand’a Nzambi uvovanga vo: “Nukalanga ye ntona zambote.” —1 Petelo 3:16.

   Ukiyuvula: Kuna kulanda, aweyi imona avo nkotele mu buka kiaki?’ Dialudi vo olenda venga siwa kitantu kwa akundi aku mu fikolo avo ubatanginini. Kansi, aweyi omona kuna kulanda? Nga ozolele fwasa kiwuntu kiaku mu vava yangidika akundi aku a sikola?—Luvaiku 23:2.

3. BAKA E NZENGO

   Nkand’a Nzambi uvovanga vo: ‘Nkwa ngangu ovenga muna mbi.’ —Ngana 14:16.

   Twazola yovo lembi zola, vekala ye ntangwa divava vo twabaka e nzengo yo mona e nluta yovo mfwilu mia nzengo zeto. Nkand’a Nzambi uvovelanga wantu babaka nzengo zambote, nze Yosefe, Yobi yo Yesu. Uvovelanga mpe Kaini, Esau yo Yuda ana babaka nzengo zambi. Adieyi tuvova mu kuma kiaku?

Nkand’a Nzambi uvovanga vo: ‘sikila muna ziku.’ (Nkunga 37:3) Avo otekele yindula e mfwilu dilenda kutwasila yo baka e nzengo, ke dikala mpasi ko mu zizidila e ntonta. Ediadi kiese dikutwasila.

Kutokani ko. Ke divava ko vo wasasila mambu mayingi kwa akundi aku. O vova VE ye sikididi kiawonso dilenda kala dialusadisu. Yovo muna songa vo kusoba nzengo zaku ko, olenda vova vo:

• “Ke nunkotesa mu mambu meno ko!”

• “Kivanganga mambu ma mpila yayi ko!”

• “Nuzeye wo vo mono kikuyisianga mu mambu mama ko!”

Diambote mu vana e mvutu zasikila vana vau. Avo ovangidi wo, akundi aku beyambula kukomekena mu vanga dina kuzolele ko!

Adieyi olenda vanga avo akundi aku bavezele? Yovo bavovese vo: “Nkia mbi ina vo? Nga wonga una wau?” Sungamena vo wau umpukumuni wa akundi. Adieyi olenda vanga? Mambu mole olenda vanga.

• Olenda tambulwila luvezo. Olenda vova vo: (“Olungidi kwaku, wonga ngina wau!” I bosi, muna lukufi yika e kuma.)

• Olenda vilula luvezo. Unzayisa e kuma kuzolele ko. I bosi, vova diambu dilenda yindulwisa akundi aku. Olenda vova vo: (“Kiayindulanga wo ko vo nkwa ngangu nze ngeye olenda nua fomo!”)

Avo akundi aku bakwamanene kuveza, katuka vo kwaku. Sungamena vo avo okwamanene vana bena, besakisa kuveza. Avo okatukidi vo kwaku, osonga vo kuyambulanga ko vo akaka bafila e zingu kiaku.

Edi ofwete zaya vo kulendi venga mvimba ko luvezo lwa akundi. Kansi, olenda baka e nzengo za dina ozolele vanga. Songa ngindu zaku kadi ngeye kibeni ofwete sola e mpil’a zingu ozolele.—Yosua 24:15.