Yeeya bukalo ubu: Brian ndyaabona basankwa bobilo bakucikolo kabesa, moyo waswa. Nsondo ino beeleshawo kale mankanda obilo kumukakatisha ayi atalike kufweba fwaka. Apa atooba ngamankanda otatwe ono.

Musankwa wakutaanguna waamba ayi:

Waamba boobo akushantila kalinso ndyatokusha cintu munkomwe yakwe akutambika Brian.

Brian wabona fwaka mulyaansa lya musankwa uyu. Lyalo Brian waloondela limwi ano.

Nakwiinga walinga Brian, ino inga wacita buyani?

Sa babye Brian bakataanguna bayeeyawo pashintu nshebatoocita? Sa shintu nshebatoocita, bakacita kulisalila beene? Mpashi tabushi. Baanji bakayungwa abamwi. Balisunibo kusangalasha bantu, aboobo balasuminisha bamwi ayi kababasalila shakucita.

Nakwiinga walinga Brian, ino inga wacita buyani kwaamba ayi ukake kuyungwa abamwi?

1. YEEYELA LIMWI SHEENGA SHACITIKA

   Baibo ilaamba ayi: “Muntu ucenjete ulabona mapensho ali kunembo akwaayuba, sombi muluya ulaya mukulinjishamobo akupengelaamo.”—Tushimpi 22:3.

   Liinji, inga wacikonsha kushibila limwi mapensho eenga esa kunembo. Kucakubonenaako, atwaambe ayi wabona bacanike mbowiiyabo kucikolo kabali kunembo lyako alimwi kabafweba fwaka. Kwiinda mukushibila limwi mapensho eenga esa, inga walibambila nshoweelete kucita.

2. TAANGUNA KUYEEYA

   Baibo ilaamba ayi: “Amube amiyeeyo iluleme.”—1 Pita 3:16.

   Liipushe ayi, ‘Ino mukuya kwaciindi inga ndalinyumfwa buyani na ndakonkela likoto?’ Ncakwiila, kwaciindi ciniini inga waleya kusangalasha babyo. Sombi pesule inga walinyumfwa buyani? Sa ulilibambilite kucileka kukonkela shintu nshoshoma alimwi anshobikila maano mubuumi pamulandu wakusuna kusangalasha babyo bakucikolo?—Kulonga 23:2.

3. SALA CAKUCITA

   Baibo ilaamba ayi: “Musongo ulicenjete.”—Tushimpi 14:16.

   Nabi peende ciindi cilaamfu buyani, tulyeelete kulisalila alimwi akuliyumya mushintu sheenga shatucitikila pamulandu wakusala kwesu. Baibo ilatwaambila pabantu mbuli Josefu, Jobo, alimwi a Yesu, abo bakasala kabotu shakucita. Alimwi ilatulwiita pabantu mbuli Kaini, Esau, alimwi a Judasi, abo batana kusala kabotu shakucita. Ino webo ulaakucitanshi?

Baibo ilaamba ayi: “Koshomeka mumilimo yako.” (Kulumbaisha 37:3) Na wataanguna kuyeeya sheenga shakucitikila alimwi akusalila limwi cakucita, ciIaba cuubu kwaamba mbolinyumfwa pamakani ayo—kucita boobo kulaakukucafwa.

Utalisukami—toelete kubabunganya babyo boonse akutalika kubasansulwiita. Kwaambabo cankusu ayi, NSHISUNIIWO inga kwacafwa. Na mpashi kwaamba ayi bashibe ayi totosekana inga waamba cakushinisha ayi:

• “Nebo mutambikimo!”

• “Nshicitiiwo shintu shamushobo uyo!”

• “Ino caba buyani, mutoocita anga tamunshiwo!”

Ciyandikabo nkubakumbula cakutawayawaya alimwi cakushinisha. Na wacita boobo inga wakankamana kubona mbweenga bafwambaana kucileka kukupensha!

Ino na babyo batalika kukuseka? Ino na baamba ayi, “Webo ulishinshilikite alimwi ulicite boowa?” Ulyeelete kucenjela akushiba ncobasuni kucita—uku nkuyunga. Ino inga wacita buyani? Kuli shintu shobilo nsheenga wacita.

• Inga wasuminisha nshobaamba. (Inga waamba ayi: “Ncancine ndaloonda!” Lyalo mukufwiimpya inga wabalwita mulandu ncowakakila.)

• Inga wabakumbula munshila yeenga yabapa kuyeeya. Balwiite ncowakakila akubacafwa kwaamba ayi bayeyeewo. (Inga waamba ayi: “Ndalinga kuyeeya ayi mulicenjete cakwaamba ayi inga tamukonshi kufweba!”)

Na babyo beendilisha kukuseka, swaawo akubashiya! Ibaluka kwaamba ayi na ubule kuswawo batokwiindilisha kukuyunga. Na waswaawo akubashiya, ulatondesha ayi inga tosuminishi bamwi kukucinja.

Cancine ncakwaamba ayi, inga toyubi kuyungwa abamwi. Sombi inga wasala cakucita, kwaamba mpowimfwi pamakani ayo, alimwi akulyeendelesha. Kumamanino, ulyeelete kulisalila omwiine shakucita!—Joshuwa 24:15.