ຄຳຖາມທີ 6
ຂ້ອຍຈະຕ້ານທານຄວາມກົດດັນຈາກໝູ່ໄດ້ແນວໃດ?
ເຈົ້າ ຈະເຮັດແນວໃດ?
ໃຫ້ນຶກພາບເຫດການນີ້: ເມື່ອໝູ່ສອງຄົນຍ່າງມາຫາ ໄບຣອັນກໍຮູ້ສຶກຈຸກທ້ອງ ຍ້ອນວ່າອາທິດນີ້ເຂົາເຈົ້າພະຍາຍາມຊວນລາວໃຫ້ສູບຢາສອງເທື່ອແລ້ວ ແລະເທື່ອນີ້ກໍເປັນເທື່ອທີສາມ.
ຊາຍໜຸ່ມຄົນທຳອິດເວົ້າວ່າ:
“ຢູ່ຄົນດຽວອີກແລ້ວບໍ? ຂ້ອຍຈະແນະນຳໝູ່ໃຫ້.”
ລາວເນັ້ນຄຳວ່າ “ໝູ່” ພ້ອມທັງຍິກຕາ ແລ້ວກໍຈົກເອົາບາງສິ່ງໃນຖົງໂສ້ງແລະຍື່ນໃຫ້ໄບຣອັນ.
ເມື່ອເຫັນກອກຢາສູບຢູ່ໃນມືລາວ ໄບຣອັນກໍແຮ່ງຈຸກທ້ອງຫຼາຍກວ່າເກົ່າ.
ໄບຣອັນເວົ້າວ່າ: “ບໍ່ເອົາ ຂ້ອຍບອກເຈົ້າແລ້ວວ່າຂ້ອຍບໍ່ . . . ”
ຊາຍໜຸ່ມຄົນທີສອງເວົ້າຂຶ້ນວ່າ: “ຢ່າຂີ້ຢ້ານຫຼາຍ!”
ໄບຣອັນລວບລວມຄວາມກ້າແລ້ວເວົ້າວ່າ: “ຂ້ອຍບໍ່ໄດ້ຂີ້ຢ້ານ!”
ຊາຍໜຸ່ມຄົນທີສອງກອດບ່າໄບຣອັນ ແລ້ວເວົ້າຄ່ອຍໆວ່າ: “ສູບໂລດນະ.”
ຊາຍໜຸ່ມຄົນທຳອິດເອົາກອກຢາສູບຫຍັບເຂົ້າມາໃກ້ໜ້າໄບຣອັນແລະຊິ່ມວ່າ: “ພວກເຮົາບໍ່ບອກໃຜດອກ. ຈະບໍ່ມີໃຜຮູ້ດອກ.”
ຖ້າເຈົ້າເປັນໄບຣອັນ ເຈົ້າຈະເຮັດແນວໃດ?
ຢຸດແລະຄິດ!
ໝູ່ຂອງໄບຣອັນໄດ້ຄິດຄັກແລ້ວບໍໃນສິ່ງທີ່ກຳລັງເຮັດ ແລະເຂົາເຈົ້າຢາກເຮັດເອງບໍ? ອາດຈະບໍ່ແມ່ນ. ສ່ວນຫຼາຍແລ້ວ ໄວໜຸ່ມມັກເຮັດຕາມຄົນອື່ນ. ເຂົາເຈົ້າຢາກໃຫ້ຄົນອື່ນຍອມຮັບ ດັ່ງນັ້ນຈຶ່ງຍອມຖືກຈູງດັງທັງໆທີ່ຮູ້ວ່າສິ່ງນັ້ນບໍ່ຖືກຕ້ອງ.
ຖ້າປະເຊີນກັບສະຖານະການແບບດຽວກັນ ເຈົ້າຄວນເລືອກແນວໃດເພື່ອຈະບໍ່ເຮັດຕາມແລະຕ້ານທານຄວາມກົດດັນຈາກໝູ່?
-
ຄາດການລ່ວງໜ້າ
ຄຳພີໄບເບິນບອກວ່າ: ‘ຄົນສະຫຼາດເຫັນການຮ້າຍແລະໄປລີ້ຕົວ ແຕ່ວ່າຄົນຂາດປະສົບ ການກາຍໄປໂລດແລະຖືກການລຳບາກ.’—ສຸພາສິດ 22:3
ສ່ວນຫຼາຍເຈົ້າມັກຈະເບິ່ງອອກວ່າຈະເກີດບັນຫາຫຍັງຂຶ້ນ. ຕົວຢ່າງເຊັ່ນ: ຖ້າເຈົ້າເຫັນນັກຮຽນກຸ່ມໜຶ່ງກຳລັງສູບຢາຢູ່ທາງໜ້າເຈົ້າ ເຈົ້າກໍເດົາໄດ້ວ່າເຂົາເຈົ້າຈະຊວນເຈົ້າໃຫ້ສູບນຳເມື່ອຍ່າງກາຍໄປ. ເຈົ້າສາມາດກຽມພ້ອມເພື່ອຮັບມືໄດ້.
-
ຄິດ
ຄຳພີໄບເບິນບອກວ່າ: “ຈົ່ງມີໃຈຮູ້ຜິດແລະຊອບ.”—1 ເປໂຕ 3:16
ໃຫ້ຖາມຕົວເອງວ່າ: ‘ຖ້າຍອມເຮັດຕາມໝູ່ ຂ້ອຍຈະຮູ້ສຶກແນວໃດ?’ ແມ່ນຢູ່ ໝູ່ອາດມັກເຈົ້າໃນໄລຍະໜຶ່ງ ແຕ່ເຈົ້າຈະຮູ້ສຶກແນວໃດຫຼັງຈາກນັ້ນ? ເຈົ້າຈະຍອມສູນເສຍຄວາມເປັນຕົວຂອງຕົວເອງພຽງເພື່ອໃຫ້ໝູ່ຍອມຮັບບໍ?—ອົບພະຍົບ 23:2
-
ຕັດສິນໃຈ
ຄຳພີໄບເບິນບອກວ່າ: “ຄົນສະຫຼາດຈະລະວັງຕົວ.”—ສຸພາສິດ 14:16, ລ.ມ.
ໃນທີ່ສຸດ ເຮົາທຸກຄົນຕ້ອງເລືອກແລະໃຊ້ຊີວິດກັບຜົນຂອງການເລືອກນັ້ນ. ຄຳພີໄບເບິນບອກວ່າໂຢເຊບ ໂຢບ ແລະພະເຍຊູເລືອກຖືກ ແຕ່ກາອີນ ເອຊາອຶ ແລະຢູດາອີດສະກາລີໂອດເລືອກຜິດ. ເຈົ້າເດຈະເລືອກແບບໃດ?
ຄຳພີໄບເບິນບອກວ່າ: ໃຫ້ເປັນຄົນ “ສັດຊື່.” (ຄຳເພງ 37:3) ຖ້າເຈົ້າຄິດເຖິງຜົນໄດ້ຜົນເສຍແລ້ວຕັດສິນໃຈ ການບອກເຖິງຈຸດຢືນຂອງເຈົ້າກໍຈະງ່າຍຫຼາຍຈົນເຈົ້າແປກໃຈແລະເກີດຜົນດີນຳອີກ.
ຢ່າຄິດຫຼາຍ ເຈົ້າບໍ່ຕ້ອງເຖິງຂັ້ນເທດເລື່ອງພະຄຳພີໃຫ້ໝູ່ຟັງ. ການປະຕິເສດຢ່າງໜັກແໜ້ນກໍພຽງພໍແລ້ວ ຫຼືຖ້າຢາກໃຫ້ໝູ່ເຂົ້າໃຈຊັດເຈນເຖິງການຕັດສິນໃຈຂອງເຈົ້າ ເຈົ້າອາດເວົ້າວ່າ:
-
“ບໍ່ ຂ້ອຍບໍ່ສູບ!”
-
“ຂ້ອຍບໍ່ເຮັດເລື່ອງແບບນີ້!”
-
“ເຈົ້າໜ້າຈະຮູ້ຈັກຂ້ອຍດີ!”
ຈຸດສຳຄັນກໍຄື ເຈົ້າຕ້ອງຕອບທັນທີແລະໜັກແໜ້ນ. ຖ້າເຮັດແບບນັ້ນ ໝູ່ອາດຈະບໍ່ຊວນເຈົ້າສູບອີກ!
ຮັບມືກັບການຖືກເຍາະເຍີ້ຍ
ຖ້າເຈົ້າຍອມເຮັດຕາມຄວາມກົດດັນຈາກໝູ່ ເຈົ້າຈະເປັນຄືຫຸ່ນຍົນທີ່ໃຫ້ເຂົາເຈົ້າຄວບຄຸມ
ຖ້າໝູ່ເຍາະເຍີ້ຍເຈົ້າເດ? ຫຼືຖ້າໝູ່ເວົ້າວ່າ “ຂີ້ຢ້ານເອີຍ!” ໃຫ້ຈື່ໄວ້ວ່ານີ້ຄືວິທີທີ່ໝູ່ພະຍາຍາມກົດດັນເຈົ້າ. ເຈົ້າຈະຕອບແນວໃດ? ຢ່າງໜ້ອຍເຈົ້າມີ 2 ທາງເລືອກ.
-
ເຈົ້າອາດຍອມຮັບເລີຍວ່າເປັນຄົນແບບນັ້ນ. (“ແມ່ນ ຂ້ອຍຂີ້ຢ້ານ!” ຈາກນັ້ນກໍບອກເຫດຜົນສັ້ນໆ.)
-
ເຈົ້າອາດກົດດັນຄືນ. ບອກເຫດຜົນທີ່ເຈົ້າບໍ່ເຮັດຕາມແລ້ວຖາມຄືນເພື່ອໃຫ້ໝູ່ຄິດ. (“ເບິ່ງເຈົ້າຄືຄົນສະຫຼາດ ແຕ່ເປັນຫຍັງຈຶ່ງສູບຢາ!”)
ຖ້າໝູ່ຍັງກົດດັນເຈົ້າ ໃຫ້ຍ່າງໜີ! ໃຫ້ຈື່ໄວ້ວ່າ ແຮ່ງຢູ່ດົນ ຄວາມກົດດັນກໍແຮ່ງເພີ່ມຂຶ້ນ. ຖ້າເຈົ້າຍ່າງໜີກໍສະແດງໃຫ້ເຫັນວ່າເຈົ້າບໍ່ຍອມໃຫ້ຄົນອື່ນມາປ່ຽນຕົວເຈົ້າ.
ໃນຊີວິດຈິງ ເຈົ້າບໍ່ສາມາດຫຼົບຫຼີກຄວາມກົດດັນຈາກໝູ່ໄດ້. ແຕ່ສິ່ງທີ່ເຈົ້າເຮັດໄດ້ກໍຄື ຕັດສິນໃຈ ບອກຈຸດຢືນ ແລ້ວຄວບຄຸມສະຖານະການໃຫ້ໄດ້ ເພາະໃນທີ່ສຸດ ເຈົ້າຕ້ອງເປັນຄົນເລືອກເອງ!—ໂຢຊວຍ 24:15
ເລື່ອງທີ່ເຈົ້າອາດຈະມັກ
ວິດີໂອສອນດ້ວຍຮູບແຕ້ມ
ສູ້ກັບແຮງກົດດັນຈາກໝູ່ລຸ້ນດຽວກັນ!
ສີ່ວິທີງ່າຍໆສາມາດຊ່ວຍເຈົ້າໃຫ້ເປັນໂຕຂອງໂຕເອງແລະຕັດສິນໃຈດ້ວຍໂຕເອງໄດ້.
