Ximana tiʼj techel lu: In nok tqʼoʼn Brian twitz tiʼj qa kyja kytzaj kabʼe tukʼil ex in kubʼ tnaʼn nim xobʼajil akux in che pon. Toj seman lu o txi kyqʼamaʼn kabʼe maj te tuʼn t-sichʼin. A jlu atzun toxin majju.

Jun kyxol qeju tukʼil in xi tqʼamaʼn te:

In jatz tiʼn jun tiʼ toj tbols, in xi kaʼyin toj twitz Brian ex in xi tqʼoʼn te.

In nok tkaʼyin Brian qa jun sichʼ, ex mas in kuʼx chyoʼn toj tanmi tuʼn xobʼajil.

Noqwit a teya Brian, ¿tiʼwtlo jaku txi ttzaqʼweʼna?

¿In nelpe kynikʼ tukʼil Brian tiʼjju in bʼant kyuʼn? ¿In kubʼ kybʼinchaʼn jlu tuʼnju ax tok kyajbʼil tuʼn tbʼant kyuʼn? Jaku t-xi qqʼamaʼn qa miʼn. In kubʼ kybʼinchaʼn jlu tuʼnju in nok kyqʼoʼn kywitz tiʼj qa in kubʼ kybʼinchaʼn txqantl. Kyajbʼil tuʼn miʼn kyel ikʼun kyuʼn txqantl, ex kyajbʼil tuʼn tkubʼ kybʼinchaʼn txqantl ik tzeʼn kye.

Qa ma tzʼok weʼya twitz jun nya bʼaʼn, ¿alkye tten jaku jaw tjyoʼna junxitl bʼe ex tuʼn miʼn tkubʼ tbʼinchaʼna aju in tzaj kyqʼamaʼn txqantl?

1. BʼINCHANKU TTENA

   In tzaj tqʼamaʼn Tyol Dios jlu: «Aju xjal at tnabʼl, ok t-xi tkeʼyin qa kyjaʼ ttzaj xobʼajil tibʼaj, in jyon naj tumel tuʼn tex twitz; atzunju xjal mintiʼ tnabʼl, kukx in xi laqʼeʼ tuj tbʼe ex in kʼixbʼi tuʼnju mya bʼaʼn» (Proverbios 22:3).

   Chʼixme tkyaqil maj nya kwest tuʼn tel qnikʼ tiʼj toj alkye ambʼil jaku qo ok weʼ twitz jun nya bʼaʼn. Jun techel, ximana tiʼj qa in nok tqʼoʼn twitza qa kyja kytzaj jun kʼloj kuʼxin in che sichʼin. Qa in nok tqʼoʼn twitza tiʼj, ya kbʼantel ttena tuʼn tok weʼya twitz nya bʼaʼn.

2. XIMANA

   In tzaj tqʼamaʼn Tyol Dios jlu: «Kybʼinchame aju bʼaʼn ik tzaʼnx in tmaʼn kyanmiye» (1 Pedro 3:16).

   Bʼaʼn tuʼn tkubʼ t-xjelina jlu: ‹¿Tiʼ kbʼel nnaʼne yajxitl qa ma kubʼ nbʼinchaʼne aju nbʼant kyuʼn txqantl?›. Ax tok, iktzun tten jaku che tzalaj qe tukʼila tiʼja. Noqtzun tuʼnj, ¿tiʼ kbʼel tnaʼna yajxitl? ¿Kbʼelpe tewina alkyexix teya ex tiʼ nimen tuʼna noq tuʼnju taja tuʼn kytzalaj qe tukʼila tiʼja? (Éxodo 23:2).

3. SKʼONKTZA JUN TBʼEYA

   In tzaj tqʼamaʼn Tyol Dios jlu: «Aju xjal at tnabʼl in xobʼ» (Proverbios 14:16).

   Yaj moqa lwey, qkyaqilx il tiʼj tuʼn tjaw qjyoʼn jun qbʼe ex tuʼn tikʼx quʼn aju ktzajel qiʼj tuʼnju qbʼe kjawel qjyoʼn. In yolin Tyol Dios kyiʼj ichan, moqa xinaq, ik tzeʼn José, Job ex Jesús aʼyeju jaw kyjyoʼn jun tbʼanel kybʼe. Ax ikx in yolin tiʼj Caín, Esaú ex Judas aʼyeju jaw kyjyoʼn jun nya bʼaʼn kybʼe. Atzun jaʼlo a teya kjawil jyonte alkye tbʼeya.

In tzaj tqʼamaʼn Tyol Dios jlu: «Alkye in japunxix tuʼn tuj chʼin, ax ikx tuj nimxix in japun tuʼn» (Lucas 16:10). Qa ma kubʼ t-ximana tiʼ jaku tzaj tuʼnju in kubʼ tbʼinchaʼna ex qa ma kubʼ t-ximana tiʼ kbʼantel tuʼna, nya kwest jaku tzʼela tuʼn t-xi tqʼamaʼna aju in kubʼ t-ximana. Ex kʼelel tnikʼa tiʼj qa atzun mas bʼaʼn.

Miʼn bʼaj tkʼuʼja, nya il tiʼj tuʼn t-xi tqʼamaʼna jun chikʼbʼabʼil kye tukʼila. Oʼkx qʼamanxa qa miʼn. Ax ikx jaku txi tqʼamaʼna qa mlay chʼexpaj aju nimen tuʼna aj t-xi tqʼamaʼna jlu:

• «Miʼn chjonte».

• «Mintiʼ nkubʼ nbʼinchaʼne qeju tiʼchaq aju».

• «Ojtzqiʼn tuʼna tiʼ nkubʼ ximane».

Tuʼn tbʼant jlu tuʼna, il tiʼj tuʼn t-xi ttzaqʼweʼn naja ex tukʼil qʼuqbʼil tkʼuʼja. Jakulo jaw labʼina aj tok tqʼoʼn twitza tiʼj aj tkyaj tzaqpiʼna kyuʼn tuʼn tkubʼ tbʼinchaʼna nya bʼaʼn.

¿Yajtzun qa ax qe tukʼila in che jyon tumel tuʼn ttzaj tqʼoja? Jakulo tzaj kyqʼamaʼn teya: «¿Tiʼ in tzaj tiʼja? ¡Miʼn tzaj xobʼa!». Aju tten lu kukx in nok bʼinchaʼn kyiʼj kuʼxin. ¿Tiʼ jaku bʼant tuʼna? At kabʼe tiʼ jaku bʼant tuʼna kywitz qeju nya bʼaʼn ik tzeʼn jlu:

• Tuʼn tkubʼ ttziyena. Jaku txi tqʼamaʼna jlu: «Ax tok, mlay kubʼ nbʼinchaʼne». Yajxitl qʼamanxa toj chʼin yol tiquʼn mintiʼ in kubʼ tbʼinchaʼna aju in tzaj kyqʼamaʼn.

• Tuʼn taj tqʼoʼna t-xel. Qʼamanxa tiquʼn mintiʼ in kubʼ tbʼinchaʼna ex qʼamanxa jlu te: «Jun xjal at tnabʼil ik tzeʼn teya mintiʼ in sichʼin».

Qa kukx in nok tilil kyuʼn tuʼn tkubʼ tbʼinchaʼna aju kyajbʼil, jaku tzikʼ bʼeta. Bʼaʼn tuʼn ttzaj tnaʼna, qa mas ambʼil ma kyaj tena, mas kʼokel tilil kyuʼn tuʼn tkubʼ tbʼinchaʼna aju in tzaj kyqʼamaʼn. Aj tikʼ bʼeta in kubʼ tyekʼuna qa mintiʼ in xi tqʼoʼna ambʼil kye txqantl tuʼn tkubʼ kychʼixpuʼn aju nimen tuʼna.

Ax tok, kwest tuʼn tel qikʼun tuʼn tkubʼ qbʼinchaʼn aju in tzaj kyqʼamaʼn txqantl. Noqtzun tuʼnj, jaku kubʼ t-ximana tiʼ taja tuʼn tbʼant tuʼna, qa ma txi tqʼamaʼna tiʼ nimen tuʼna ex tuʼn tkubʼ t-ximana tiʼ kbʼel tbʼinchaʼna. Ikju, a teya kbʼel ximente (Josué 24:15).