KAJJITÕK 6
Elemen Aõ Jum̦ae M̦anit ko Renana im Menin Kapo ko jãn Jo̦dikdik ro Jet?
TA EO KWÕNÃJ KAR KÕM̦M̦ANE?
L̦õmn̦ak m̦õk kõn waanjoñak in: Ke ruo iaan rijikuul̦ ro m̦õttan Brian rej kepaake, ejino nana an mour. Ruo alen aer kar kajjioñ kapoiki bwe en kõbaatat ilowaan wõt wiik eo. Im kiiõ ej kein kajilu in aer itõn kajjioñ kapoiki.
L̦adik eo me ej kepaake m̦oktata ej ba:
“Kwõbar make iaam̦ ke? Ikõn̦aan lewaj juon m̦õttam̦.”
Innem ej kiil rãjetin mejãn ke ej rãbõjo̦ im lel̦o̦k juon men ñan Brian.
Brian ej lo pakij in jikka eo pein l̦adik eo im juon wũd ikõtaan pein. Brain ej kab baj nanal̦o̦k wõt an mour.
Brian ej ba: “Jol̦o̦k bõd ak em̦õj aõ kar ba bwe ijjab . . . ”
Ej kõnnaan wõt ak l̦adik eo kein karuo eba: “Ta l̦e kwõmijak ke!”
Brian ej kwal̦o̦k an peran im ba: “Ijjab!”
L̦adik eo kein karuo ej am̦bwilãleik Brian im ba. “Kwõn bõke.”
L̦adik eo m̦okta ej kepaakel̦o̦k wõt jikka eo ñan mejãn Brian im ej jiroñe im ba: “Kõm ban ba ñan jabdewõt. Ejjel̦o̦k juon enãj jel̦ã.”
El̦aññe en kar kwe Brian, ta eo kwõnãj kar kõm̦m̦ane?
BÕJRAK IM L̦ÕMN̦AK!
Jo̦dikdik rein me joñaer wõt Brian relukkuun ke jel̦ã ta in rej kõm̦m̦ane? Rekar ke make kããlõt ñan aer kõbaatat? Bõlen rekar jab. Ãinwõt enañin aolep jo̦dikdik, rein rar kõtl̦o̦k bwe armej ro ren kapoiki er ñan kõbaatat. Kõn aer kõn̦aan bwe ro jet ren m̦õttãik er, rar kõtl̦o̦k bwe ren kããlõt ta eo ren kõm̦m̦ane.
El̦aññe kwõj iioon ejja men in wõt, ta eo enaaj jipañ kwe ñan jutak pen im jab baj l̦oore wõt ta eo aolep jo̦dikdik ro rej kõm̦m̦ane?
-
JEL̦Ã TA EO ENAAJ WAL̦O̦K
Baibõl̦ ej ba: ‘Juon rũjel̦ãl̦o̦kjen̦ emaroñ kile an itok jorrããn ñane im ko jãne, ak juon rũjajel̦o̦kjen̦ ej wõnm̦aanl̦o̦k wõt innem bũrom̦õj tokãlik.’—Jabõn Kõnnaan 22:3, UBS.
Jet iien, kwõmaroñ kalimjek juon men im jel̦ã kadede ta eo enaaj ewal̦o̦k. Ñan waanjoñak, jen ba bwe kwõj reilo̦k im lo jet rijikuul̦ rej kõbaatat. Am̦ jel̦ã kadede kõn ta eo enaaj wal̦o̦k, men in enãj jipañ eok bwe kwõn pojak im jel̦ã ta eo kwõn kõm̦m̦ane.
-
L̦ÕMN̦AK
Baibõl̦ ej ba: “Ami bõklõkõt en erreo.”—1 Piter 3:16, UBS.
Kajjitõk ippam̦ make, ‘Ta eo enaaj wal̦o̦k ñan ña tokãlik el̦aññe ij l̦oore men eo aolep rej kõm̦m̦ane?’ M̦ool bwe jo̦dikdik ro jet renaaj kiiõ m̦õn̦õn̦õ waj ippam̦. Ak enãj elemen eñjake eo am̦ tokãlik? Kwõnãj ke mel̦o̦kl̦o̦ke tõmak eo am̦ kõnke kwõn kam̦õn̦õn̦õik classmate ro am̦?—Exodus 23:2, UBS.
-
KÕM̦M̦AN PEPE
Baibõl̦ ej ba: “Ro ewõr aer kõl̦mãnl̦o̦kjen̦ rej kõjparok er make jãn jorrããn.”—Jabõn Kõnnaan 14:16, UBS.
Juon iien jenaaj aikuj kõm̦m̦ane juon pepe, im jabdewõt pepe eo jej kõm̦m̦ane enaaj jelõt mour eo ad. Baibõl̦ ej kwal̦o̦k kõn ro rar kõm̦m̦ani pepe ko rejim̦we ãinwõt Josep, Job, im Jesus. Ej bar kwal̦o̦k kõn ro rar kõm̦m̦ani pepe ko rejjab em̦m̦an ãinwõt Kein, Iso, im Judas. Ak kwe, kain pepe rot eo kwõnaaj kõm̦m̦ane?
Baibõl̦ ej ba: “Eo ej tiljek ilo men ko reddik enaaj tiljek ilo men ko rel̦l̦ap.” (Luk 16:10, UBS) El̦aññe em̦õj am̦ pepe kadede kõn ta eo kwõnaaj kõm̦m̦ane im l̦õmn̦ak kõn men ko renaaj wal̦o̦k ñe ebõd kããlõt eo am̦, enaaj lukkuun pidodo am̦ kwal̦o̦k ta eo kokõn̦aan kõm̦m̦ane. Im kwõnaaj lo jeraam̦m̦an kõn pepe eo am̦.
Jab inepata, kwõjjab aikuj buul̦ kõmel̦el̦e ñan jo̦dikdik ro kõn unin am̦ jab l̦oore er. Ebwe wõt ñan am̦ ba JAAB. Bareinwõt, ñan kaalikkarl̦o̦k uwaak eo am̦ ñan er, kwõmaroñ ba:
-
“Jab kapo!”
-
“Ijjab kain n̦e!”
-
“Ejab kwõjel̦ã ke kõjro ejjab kain n̦e!”
Men eo em̦m̦antata ej m̦õkaj im kwal̦o̦k kõn tõmak eo am̦. El̦aññe kwõj kõm̦m̦ane men in, kwõnãj lo an jo̦dikdik ro bõjrak jãn aer kapoik eok!
ÑE REJ KAJJIRERE IM KAKŨTÕTÕIK KWE
Ñe kwõj kõtl̦o̦k bwe jo̦dikdik ro jet ren kapoik kwe, kwõnãj oktak im ãinwõt juon robaat eo rej control e
Ta el̦aññe jo̦dikdik ro jet rej kajjirere im kakũtõtõik kwe? Ta eo kwõnãj kõm̦m̦ane ñe rej ba, “Eita, kwõmijak ke?” Eñin ej juon iaan men ko ekkã an jo̦dikdik ro kõm̦m̦ane ñan kakũtõtõik ro jet. Enãj elemen am̦ uwaake er? Ewõr ruo men ko kwõmaroñ kõm̦m̦ani.
-
Kwõmaroñ kwal̦o̦k am̦ errã. (Kwõmaroñ ba, “Kwõj m̦ool, imijak!” Innem ba wõt jidik etke kwõj ba men in.)
-
Kwõmaroñ ukot men eo rej ba bwe ren lukkuun l̦õmn̦ak kõn men eo rej kõm̦m̦ane. Kwal̦o̦k unin am̦ m̦akoko, im kajjioñ kareel er bwe en oktak aer l̦õmn̦ak. (Kwõmaroñ ba, “Ij ba wõt kwõlukkuun mãlõtlõt ñan am̦ kõbaatat!”)
El̦aññe jo̦dikdik ro rej wõnm̦aanl̦o̦k wõt im kakũtõtõik kwe, etal jãn ippãer! Keememej, ñe eto am̦ pãd ijo, enaaj l̦apl̦o̦k aer kajjioñ iuun eok ñan kõm̦m̦ane men eo enana. Ilo am̦ etal, kwõj kwal̦o̦k bwe kwõjjab kõn̦aan bwe ro jet ren ukot eok bwe kwõn kõm̦m̦ani men ko renana.
Ilo m̦ool, kwõjjab maroñ ko jãn menin kapo im m̦anit ko renana jãn jo̦dikdik ro jet. Bõtab, ewõr am̦ maroñ ñan kããlõt ta eo kokõn̦aan kõm̦m̦ane, ba bwe kwoban kõm̦m̦ane men eo enana, im jab kõtl̦o̦k an ro jet control e kwe. Ilo jem̦l̦o̦kin, am̦ make pepe ta eo kwõnaaj kõm̦m̦ane!—Joshua 24:15.
