6ǁÎ DÎS
Mati ta ti ǀhōsana xu ta ra hō ǁgâiba a mâǃoa ǁkhā?
TARENATS SATSA A DĪ ǁKHĀ?
ǂÂi re sao ra-i xa: ǁÎb ǀhōsa gu ra ǀgū hînab ge Braina ǁîb dommi ǃnâ ǃgubusa ra hōǃâ. ǁÎgu ge ǀgam ǃnāra kōse nē wekhe ǁîba saruhe go mā tsâ. Tsî nēs ge nî ǃnonaǁî ǃnā i nē wekheb ǃnâ.
ǂGuro axab ge ra mî:
“Nētsēts ǁkhaba ǀguri hâ? Hā re îts ti ǀhōsab ǀkha ǂangusa dī.”
ǁÎb ge “mûsa ra ǂgambase” ra mî nēb ge ti ǀhōba tsî xū-e ǁîb ǁhōsa xu ūǂui tsî Braina ra mā.
Tsîb ge Briana saruba ǁîb ǀhōb di ǃommdi ǃnâ ra mû. Tsî i ge Briani dommi ǃnâ hâ ǃgubusa kais ǀguisa ra dī.
Ob ge Briana “ǀûba te re.” “Tita ge ǀnai satsa ge mîba tita ge dī tide. . . ”
Tsîb ge ǀgamǁî axaba ra mî: “Tā ǃaoǃnâ khoe-i khami tanisen re.”
Ob ge Briana ǁkhoaǂgaose ge mî “ǃaoǃnâ tama ta ge hâ.”
ǁNāpaxūb ge ǀnî hâba ǁîb di ǁôaba Briani di ǃhōs ai ge mâi. Tsî ǃnōsa dommi ǀkha ge mî, “ǂgaes ǀguisa dī re.”
Tsîb ge ǁnāpaxū Briani tawa ge mâǀgū tsî ge mî: “Khoe-e kham ge mîba tide tsî khoe-i ge ǂan tide.”
Satsa tare-e ga dī hâ, Briani di ǁharodi ǃnâts ga hâhâ o?
ǁAEBA Ū TSÎ ǂÂI RE!
Briani ǀhōsaga ǂâi i gere tare-e gu gere dīsa? Aitsama gu ge ǁîgu mîǁguiga gere dībasen? ǁNās ge ge ī ǁoa i. ǁÎgu tsîn ge māsenxase ǀhōsan di ǁgâib ǃnaga ge hâ i. ǁÎgu ge gere ūǃoahe ǂgao ǁîgu ǀhōsan xa tsî ge mā-am î gu ǂgaeǂguihe.
Nēti ī mâsib ǃnâts ga sats tsîna hâhâ o, matits ga ǀnî hâ daoba ǁhûibasen hâ tsî sa ǀhōsana xuts ra hō ǁgâiba mâǃoa hâ?
-
ǁAEB AIǃÂ ǂÂIǃGÂ RE
Elobmîs ge ra mî: “Gā-ai khoeb ǂkhababa mû tsî ra gaugausen, xawe gâren ge ǃgûǂgâ tsî ra ǁkharahe.”—ǂKhoamîdi 22:3.
ǃNāsa ǁaeba da ge ǂkhababa ī-i nîs aiǃâ ra mû. Aiǁgausets ge ǀnîsi sa skol ǀhōsaga ǂguise gu mâ tsî ra ǂgae hîna go mû. ǁAeb aiǃâ ǂâi re tare-ets nî dīsa tsî matits a ǂgōsen ǁkhā ǀgaub tsîna.
-
ǂAI RE
Elobmîs ge ra mî: “Î du ǃgâi ǂâisa ūhâ.”—1 Petrub 3:16.
Sats a dîsen ǁkhā i, ‘mati i ǀgauba ta ǂgui khoen ǁaegu ūhâ?’ Sats ge ī ǁkhā i ga o, ǁaerob ǀgaib ǀguiba sa ǀhōsan sats ǃnâ ūhâ tama hâ ǃgâiǃgâibasensa xu nî ǂgōsen. Xawe satsa ega mati nî tsâ? Sats a hamsats māsenxase ra ǁamaxū, sa ǀhōsana ǂkhîǂkhîs ǃaroma?—Eksodus 23:2.
-
MÎǁGUI RE
Elobmîs ge ra mî: “Gā-aib ra ǃao, tsî ra ǂgō ǂkhababa xu.”—ǂKhoamîdi 14:16.
ǀAms ai ta ge sida ge ǁhûi mîǁguigu ǃoagu nî ûi tsî aitsama nî ǃereambasen. Elobmîs ǃnâ da ge Josefi, Jobi tsî Jesub tsîn xa ra ǁkhāǁkhāsen hîna ge ǃgâi mîǁguiga a dīgu xa. Tsî da ge Kainni, Esaub tsî Judab hîna ge ǁgai mîǁguiga dīgu xas tsîna ra ǁkhāǁkhāsen. Satsa tae-e nî dī?
Elobmîs ge ra mî: “ǂGomǂgomsase tanisen re.” (Psalmdi 37:3) ǁAeb aiǃâts ga ra tsūb hîna nî hāba ǂâiǃgâ o, o gu ge sa mîǁguiga kaise nî supu—tsits ge ǀkhaeba nî hō.
Tā ǁae re—sa ǀhōsan ge ǁnamahesa ǂhâ tama hâ. Hî-i ti mîs ge ǂâu hâ. Tamas ka iots ge nî mâǁapo tsî sao rana a mî ǁkhā:
-
“Tita ǃgôaǂuiǃ”
-
“Tita ge ǁnāti ī xūna dī tama hâ!”
-
“Nēn hoan ǃnâts ge ǃgâise a ǂan teǃ”
Sats ge ǃhaese sa mîǁguib tsî ǂgomǀgaub ǀkha a ǃeream ǁkhā. Sats ga ti dī o, ots ge nî mû matikō ǃhaesen sa ǀhōsana satsa xu ra bēsa.
ǃHŌ-AONATS NÎ SÎSENŪ ǀGAUB
Sats ga ra māsen o, sa ǀhōsan di ǁgâib ǃnâ ots ge roboti khami nî ī hîna ra ǂgaeǂguiheba.
O sa ǀhōsan ga ra ǃhō tsi os? Mîn ga ra o, “tae-i ǂnâǂnâsensa—ǃaoǃnâ îts a?” Nēti ī ǃkhāǃkhāsa mûǂan re, ī-i a khami ǁgai ǀhōsana xu i ra hā amaga. Satsa tare-e nî dī? ǀGam ǀgaugats ge ūhâ.
-
Sats ge nē mî ǁgaiǁgaihesa ūǃoa tsî a mî ǁkhā. (“ǂHanuts a, ǃao ta ra!” Tsî ǁnāpaxū ǃaromasa a mā ǁkhā.)
-
Sats ge ǁî-e gā-aise a sîsenū ǁkhā. Aiǁgause ǂgaeba tamats hâ ǃaromasa mîba re tsî ǁî-e ǁnās xa i a ǃgâisa ǁgau. (“ǁNâuǃābats ūhâ amaga ta ge tita go ǂâi hâ i sats ǂgae tama hâ ti!”)
Sa ǀhōsan ga ra aiǃgû o satsa ǃkhāǃkhās ǃnâ-ū ots ge nî ǃgûbē! ǂÂis ǃnâ ūhâ re sats ga ra mā-ams kōse i ge ǁgâiba nî ǃgomba tsi. Sats ga ǁnāpaxū ga ra ǃgûbē o, ots ge ra ǁgau sats khoena mā-am tama hâsa ǁîn xa ǂgaeǂguihesa.
Ama a !khais ge ai-ôahets nîsa. Xawe sats ge mîǁgui ǁkhā tae-ets nî dīsa. Sats ra tsâ ǀgausa mî re tsî mâts ra pa mâ re, sats nî dīs ge satsa xu hâ!—Josuab 24:15.
