Ximoiljui ni: Brian amo kimati tlake kichiuas pampa kiita kinechkauijtiauij omej telpokamej. Ompa kiiljuijtokej ma tlachichina ipan ni semana, uan moiljuia nama sampa kiiljuisej.

Se kiiljuia:

Kinextilia tlake kiuika uan kiiljuia ma kikui se.

Kema nopa telpokatl kikixtia se cigarro uan kimaka, Brian amo kimati tlake kichiuas.

Tlaj ta mitspanoskia kej Brian, ¿tlake tijchiuaskia?

¿Timoiljuia nopa omej telpokamej nelia kimatij tlake kichiuaj? ¿Kichiuaj nopa pampa inijuantij kiampa kitlapejpenijkej? Uelis inijuantij nojkia kichiuaj tlen sekinok kiniljuiaj. Pampa amo kinekij ininselti itstosej, kinkauaj sekinok ma kiniljuikaj tlake kichiuasej uan kiampa mouampojchiuasej ininuaya.

Tlaj ta nojkia kiampa mitspanoskia, ¿tlake mitspaleuis amo tijchiuas kej inijuantij uan ta moselti tijtlapejpenis tlake tijchiuas?

1. XIMOILJUI TLAKE TIKIJTOSKIA

   Biblia kiijtoua: “Se tlakatl tlen tlalnamiki nimantsi momaka cuenta intla mauilili kampa yaui uan axpano, pero se tlen uiuitik axkichiua cuenta uan kipantia tlen axkuali” (Prov. 22:3).

   Kemantika, nima nesi tlaj tijpiasej se kuesoli o amo. Ximoiljui tinejnentia uan tikinita se keskij telpokamej tlachichintokej. Tlaj achtoui kuali timoiljuis tlake ueliskia tikijtos, tijmatis tlake tijchiuas kema mitsiljuisej xitlachichina.

2. XIMOILJUI TLAKE PANOSKIA

   Biblia kiijtoua: “Xijpiakaj kuali inmotlalnamikilis” (1 Ped. 3:16, TNM).

   Ximotlajtlani: “¿Kenijkatsa nijyolmatis tlaj nochipa nijchiuas tlen sekinok kichiuaj?”. Uelis katli ininuaya timomachtia kinekisej mouikasej mouaya maske san se keski tonali. Teipa, ¿kenijkatsa tijyolmatis? ¿Tijchiuas tlen amo kuali san pampa tijneki kuali timouikas ininuaya katli timomachtia? (Éx. 23:2).

3. XIJTLAPEJPENI TLAKE TIJCHIUAS

   Biblia kiijtoua: “Se tlen tlalnamiki kimakasi tlen axkuali uan mouejkatlalia” (Prov. 14:16).

   Se tonali moneki tijtlapejpenisej tlake tijchiuasej uan moneki tijmajtosej tlake panos ika tlen tijchiuasej. Biblia kiijtoua se keskij tlakamej kuali kitlapejpenijkej tlen kichiuaskiaj, kej José, Job uan Jesús. Nojkia kiijtoua sekinok amo kuali kitlapejpenijkej tlen kichiuaskiaj, kej Caín, Esaú uan Judas. Ta, ¿tlake tijchiuas?

Biblia kiijtoua: “Xijchiua tlen kuali” (Sal. 37:3). Tlaj kuali timoiljuijtok tlake panoskia ika tlen tijchiuas uan ya tijmati tlake tijchiuas, uajka ayokmo ouij tikijtos tlen ta timoiljuia. Kiampa nojkia kuali tijyolmatis tlaj tikijtos kenke amo tijneki tijchiuas tlen mitsiljuiaj.

Amo ximotekipacho, amo moneki miak tlamantli tikiniljuis. San xikiniljui AMO. Nojkia uelis tikiniljuis amo kema tijchiuas tlen mitsiljuiaj ika ni tlajtoli:

• “Na amo nijchiuas nopa”.

• “¡Amo nijneki! Na amo kema nijchiuas nopa”.

• “¡Amo titlakaki! ¡Nimitsiljuia amo nijneki!”.

Moneki nima tikiniljuis uan amo timajmauis. Tlaj kiampa tijchiuas, uelis ayokmo tleno mitsiljuisej.

Uelis katli ininuaya timomachtia mitspinaualtisej. Uelis mitsiljuisej ni: “¿Kenke amo tijneki tijchiuas? ¿Timajmaui?”. Katli kinekij ma tijchiuakaj se tlamantli tlen amo kuali nochipa kiampa kiijtouaj. ¿Tlake uelis tijchiuas kema kiampa mitsiljuisej? Uelis tijchiuas se tlen ni ome tlamantli:

• San xikinuetskili. Ueliskia tikiniljuis: “Kena, achi nimajmaui”. Teipa xikiniljui kenke.

• Xikijto seyok tlamantli. Achtoui xikiljui kenke amo tijneki tijchiuas uan teipa xikiljui: “Se akajya katli kuali tlalnamiktok amo tlachichina”.

Tlaj nojua san tlemach mitsiljuiaj, xikinkajteua. Xikilnamiki: tlaj nojua tikintlakakilijtos, tijmatis ouij amo tijchiuas tlen inijuantij kinekij. Tlaj tikinkajteuas, tijnextis ta tijtlapejpenia tlake tijchiuas.

Maske nochipa itstosej katli kinekisej xijchiua tlen amo kuali, ta uelis tijtlapejpenis tlake tijchiuas uan tikijtos kenke amo tijneki tijchiuas tlen sekinok mitsiljuiaj. Kiampa tijnextis san ta tijtlapejpenia tlake tijneki tijchiuas ipan monemilis (Jos. 24:15).