Soka kuetyi: Ovanthu vevali valongesiwa na Bruno kosikola vafuena pwe, iya Bruno atili unene owoma. Ovikando vivali vemukuluminya okupuena. Etyi pahe matyikala otyikando tyatatu.

Omukuendye wo tete wati:

Uteya keiho etyi apopia ondaka “epanga” apola otyipuka momboloso etyitambeka Bruno.

Tyina Bruno atala pokati kominwe viae pena osikalu. Bruno awele vali unene owoma.

Inkha ove Bruno, ñgeno wakumbulula ñgeni?

Okuti Bruno ankho wasokale kuetyi vekahi nokulinga? Okuti ovakuendye ovo, ovo muene valinga omatokolo avo? Au. Ovikando ovinyingi ovakuendye vahongiliyua na vakuavo. Valinga ovipuka opo vakuavo vehevetombe, ngotyo avalingi etyi vakuavo vekahi nokulinga.

Inkha ove uvasiwa notyitateka ngotyo, ñgeno walinga tyi opo utyivile okutetulula otyitateka otyo?

1.  

   Ombimbiliya yati: “Omunthu wokualunguka oyou utala otyivi iya akaholama, mahi, omunthu uhena onondunge wenda vala iya akamona ononkhumbi.”​—Provérbios 22:3.

   Ovikando ovinyingi, tyitavela okutala etyi matyitundililako. Mongeleka, soka ñgeno ukahi nokuenda omono ava ulongesiwa navo vekahi nokupuena komutwe wove. Mokonda wamonale otyitateka ove mokala tyafuapo opo ulityilike-tyo.

2.  

   Ombimbiliya ipopia okuti: “Tualeiko okukala nomutima omuwa.”​—1 Pedro 3:16.

   Lipula okuti: ‘Oñgeni mandyilitehelela inkha ndyilinga etyi vakuetu valinga?’ Tyotyili, hamwe ava ulongesiwa navo mavekupande mahi momuvo uhehi. Mahi oñgeni molitehelela konyima? Okuti uhanda umwe okuyekapo okulekesa ovelie, opo uhambukiswe vala vana ulongesiwa navo?​—Êxodo 23:2.

3.  

   Ombimbiliya ipopia okuti: “Omunandunge wovola okukahateka ovivi.”​—Provérbios 14:⁠16.

   Mokueenda kuomuvo, tuna okulinga omatokolo atutavela etyi tyitundililako. Ombimbiliya ipopia ovalume vamwe, Jose na Job, na Jesus valingile omatokolo aviuka. Ipopia vali okuti Kaim na Esau na Juda, valingile omatokolo ahaviukile. Iya oityi ove molingi?

Ombimbiliya ipopia okuti: “Tuna okulinga ovipuka nekolelo.” (Salmo 37:3) Inkha usoka kuetyi tyitundililako molingi omatokolo aviuka, tyipona etyi ankho ukevelela.

Wehesuke​—ove kuesukisile okupopila unene vakuenyi konthele Yombimbiliya. Wesukisa vala okuti AU nondaka yapama. Ine opo utyilekese umwe nawa okuti kuhande, upondola okupopia okuti:

• “Ame hihande!”

• “Ame hilingi ovipuka ovio!”

• “Onwe mutyii okuti ame hilingi ovipuka ovio!”

Onkhalelo yaviuka, okukumbulula liwa-liwa nondaka yapama. Inkha ulinga ngotyo, mohuvu okutala oñgeni vakuenyi mavayekepo okukuhongilinya!

Oityi molingi inkha vakuenyi vekukuela? Iya ankho vati, “Oityi tyapenga​—una owoma?” Tala okuti ukahi vala nokukuelwa navakuenyi. Oityi molingi? Ove una onomphitilo onombali.

• Ove motavela etyi vekukuela. ( “Ame ndyitupu etyi nekulinga. Ame ndyina owoma!” Muaina popia liwa-liwa.)

• Ove upondola okuyeka vekutukane. Mahi utupu etyi wevelinga. (“Muaina popia liwa-liwa otyitateka tyove!”)

Inkha ava ulongesiwa navo kosikola vekuhongilinya enda nkholo! Hinangela okuti, inkha ukalapo ehimbwe, molingi etyi tyihaviukile. Inkha utundapo, molekesa okuti kuhande vakuenyi vapilulule onkhalelo yove.

Tyotyili, ove kumetyivili okutyilika vakuenyi vekuhongilinye. Mahi ove una okutokola etyi uhanda okulinga, lekesa okuti wapama iya uliyunga. Konthyulilo ove muene motokola etyi molingi!​—Josué 24:15.