Imagina bo e siguiente escena: Ora Brian mira dos mucha homber di su scol cana bin den su direccion, e ta cuminsa bira un tiki nervio. Dos biaha caba e siman aki nan a purba di pone presion riba dje pa e huma. Esaki lo ta di tres biaha.

E prome mucha homber ta bisa:

Mientras cu e ta papia, e ta saca algo for di su saco pa duna Brian.

Brian ta mira e sigaria den su man. Y su curason ta cuminsa bati mas duro.

Si abo ta Brian, kico lo bo haci?

E mucha hombernan ey di berdad a pensa riba loke nan ta haciendo? Ta riba nan mes nan ta haciendo e cos ey? Casi sigur cu no. E chens ta grandi cu nan lo a laga otronan influencia nan. Nan kier keda bon cu nan amigonan y pesey nan ta permiti otro hende dicidi loke nan ta haci.

Si abo haya bo mes den e mesun situacion, con bo por evita di haci mescos cu nan y asina resisti peer pressure?

1. PREPARA BO MES

   Bijbel ta bisa: “Hende sabí ta mira peliger i ta evit’é, esun sin eksperensia ta dal bai i haña su kastigu.”—Proverbionan 22:3, BPK.

   Hopi biaha, bo por mira problema di leu. Por ehempel, supone cu bo ta mira un grupo di mucha di scol ta huma sigaria. Si bo pensa di antemano ki problema lo por presenta, lo bo ta cla pa trata cu e situacion.

2. PENSA

   Bijbel ta bisa: “Mantene un consenshi limpi.”—1 Pedro 3:16.

   Puntra bo mes: Con lo mi sinti mi despues si mi bay tras di e mayoria? Ta berdad cu bo pareunan lo ta contento cu bo. Pero con lo bo sinti bo despues? Bo ta dispuesto pa sacrifica bo norma- y balornan djis pa tene e muchanan di bo klas contento?—Exodo 23:2.

3. TUMA DECISION

   Bijbel ta bisa: “Un hende sabi ta cauteloso.”—Proverbionan 14:16.

   Tardi of trempan nos mester tuma un decision y biba cu e consecuencianan. Bijbel ta menciona hombernan manera Jozef, Job y Hesus, cu a tuma decision corecto. Tambe e ta menciona Cain, Esau y Judas, cu a tuma mal decision. Kico abo lo haci?

Bijbel ta bisa cu nos mester ta “determina den [nos] curason” pa haci loke ta corecto. (Daniel 1:8, NW) Si bo pensa di antemano riba e consecuencianan y sa ki decision bo ta bay tuma, ta mas facil pa bo mustra kico ta bo posicion, y no tin nada mas mihor cu esey.

No worry, bo no tin nodi duna henter un speech. Un simpel NO firme mes ta suficiente. Of, pa mustra nan bon cla cu bo no ta cambia di opinion, bo por bisa:

• “No conta cu mi!”

• “Mi no ta haci e cosnan ey!”

• “Ban serio, bo conoce mi caba toch!”

E punto ta pa bo contesta di biaha sin draai rond di e asunto. Si bo haci asina, lo bo keda sorprendi con lihe nan lo stop di pone presion riba bo.

Kico si bo pareunan ta haci bofon di bo? Kico si nan bisa bo: “Ki’ a pasa bo? Cobarde bo ta?” No preocupa bo mes cu loke nan ta bisa. Nan kier djis pone presion riba bo. Con bo por reacciona? Bo tin por lo menos dos opcion.

• Bo por acepta loke nan bisa. (“Boso tin rason, mi tin miedo.” Anto duna un splicacion cortico dicon.)

• Bo por tira e bala bek. Bisa nan dicon bo no ta huma sigaria y despues bisa nan algo cu nan no tin contesta p’e. (“Abo ta huma? M’a kere cu bo ta mas sabi cu esey.”)

Si bo pareunan sigui haci bofon di bo, djis cana bay. Corda bon, mas largo bo keda caminda nan ta, mas presion nan lo pone riba bo. Si bo cana bay, bo ta mustra cu abo sigur no ta bay laga nan cambia bo manera di pensa.

Echo ta cu bo no por evita peer pressure. Pero, bo mes por dicidi kico bo kier haci, mustra kico ta bo posicion anto actua cu firmeza. Al fin y al cabo, ta bo decision.—Josue 24:15.