Cai tucushcai iyari: Brayan manzhai sintirica ishqui cumpañajcunara mayanllamushcara ricusha. Cai semanai ña ishqui cuti paita tabacura chupachingaj munanushca. Ña caihua quinsa an.

Paigunamanda shuj nin:

Bolsillomanda llucchisha ñahuira sipirisha Brayanma ricuchin.

Brayan tabacura ricun chi malta maqui riruunai, pai mas manzhai charishcara sintin.

Can Brayan asha, ¿imara ruranguima?

¿Brayan cumpañajcuna yachanunzhu ima rurashcara? ¿Paiguna quiquin ajllashcara apinushcachu? Mana. Huaquimbi shujcuna rurashcara catinushca. Cumpañajcunahua angaj munanun, chiraigu shujcuna paigunamanda ajllanuchu saquinun.

Brayan cuinta pasausha, ¿imasnara ruranguima shujcuna munashcara mana catingaj?

1. PURUNTUI

   Biblia ninmi: “Iyaiyuj runa manalira ricusha miticun, randi mana yachajcuna ñaupajma pasasha turmindarinun” (Proverbios 22:​3).

   Ñacas tucui huras llaquiuna tiangaraushcara yachanchi. Iyari, can purisha riushcai ricungui shu muntun maltauna tabacura chupasha. Can ñaupalla puruntusha llaquiunara vinsingaj ushangaraungui.

2. IYARI

   Biblia ninmi: “Ali rana iyaira charichi” (1 Pedro 3:16).

   Tapuri: ¿Imasnara sintirisha tucuiguna rurashcara catisha? Sirtumi an, camba cumpañajcuna ansa timpulla canda chasquinunga. Shinajpi huasha ¿imasnara sintiringui? ¿Saquinguichu can tucui quirishcara camba cumpañajcunara ali sintichingaj? (Éxodo 23:​2).

3. AJLLAI

   Biblia ninmi: “Iyaiyuj runa ripararus purin manalimandas caruyan” (Proverbios 14:16).

   Ñaupa o huashas tucuiguna ajllana anchi, shinallara huasha ima tucushcaunahua causana. Biblia riman ali ajllaj cariunamanda imasna José, Job, Jesús shinallara mana ali ajllashcaunamanda riman imasna Caín, Esaú, Judas. Can ¿imara rurangaraungui?

Biblia ninmi “alira casusha rurai” (Salmo 37:​3). Can rurashcaunai ima tucunara iyarisha shu iyaira ña apisha can iyashcara rimangaj mas ahualla anga, shinallara valinmi.

Ama turbarichu, mana yapajta rimana angui camba cumpañajcunara. Pitijta mana, rimai. Shinallara rimana angui can iyashcara mana turcaringachu casna rimasha:

• “¡Ñucahua mana cuintaichu!”.

• “Ñuca mana chigunara ruranimi”.

• “Ña yachangui ñuca iyarishcara”.

Pitijta pasajta rimana angui. Caita rurasha ricungui camba cumpañajcuna ña mana molestanunga.

Huaquimbi canda cumpañajcuna pingaibi churangaj rimanunga: “¿Ima tucuca canhua? ¿Manzhai charinguichu?”. Casna tunu shimiuna utilizanun can paiguna munashcara rurangaj. ¿Imasnara cutipanguima? Ishqui cutipana charingui:

• Paiguna rimashcara catingui. Rimana ushangui: “Sirtura rimangui, manzhai charini”. Chi huasha rimangui imarasha.

• Cuna can munashcara paiguna rurachu. Intindichi imarasha can mana rurangui, casna rimasha: “Can cuinta sabiru runa asha tabacura mana chupangachu”.

Molestasha catinujpi, ri. Iyari, mas timpu chibi saquirisha mas turbachinunga. Can risha ricuchingui mana shujcuna canmanda ajllana ushashcara.

Sirtu an, tucui huras molestajcuna tianga. Can ajllana ushangui ima ruranara, pitijta rimai ima iyashcara, shayachi ima pasangaraushcara. Sirtu pacha, canllara ajllana ushangui (Josué 24:15).