Caita yari: Albertoga pai ishcai compañeroguna shamuuta ricusha dsaujlla sintirin. Cai semanaibiga ishcai cutin tabacota chupai ni tucushca. Cunanga chasnallata ningahua cuti caillayaunguna.

Shuc compañero nin:

Bolsillomanda tabacota surcusha, ñahuita pin rasha, Albertota ricuchin.

Albertoga paihua compañero maquibi tabacota ricusha, mas manzharin.

Alberto ashaga imata ranguima.

Albertohua compañeroguna imata raushcata yachanaunzhu. Amu munashcata anllashcaunachu. Mana imachari. Shuccuna casna rashcatachari ricushcauna. Compañeroguna ñaupacpi alita ricurinata munan. Chiraicumi, shuccuna imatas ranata anllanauchun nisha saquin.

Can casna shinai ausha, shuccuna mana alita rai nicpi imata ranguima.

1. IMATA RANATA YUYARI

   Bibliaga nin: “Yuyayuc runaga turmintarinata musiarisha, caruyanmi. Yuyai illac runaga turmintarinata musiarishallata rin, chi huasha llaquibi urman” (Proverbios 22:3).

   Turmintugunata musianalla man. Caita yari: canba compañerogunata tabacota chupauta ricusha. Ima tucunata ñaupata musiarishaga imata ranata yachanguimi.

2. IMA TUCUNATA PINSAI

   Bibliaga nin: ‘Ali yuyaihuan causaichi’ (Hechos 24:16).

   Tapuri: “Shuccuna shinallata rashaga imasata sintirisha”. Canba compañeroguna shuc ratuta alita ricui tucungui. Chasna ashahuas, huashaga imasata sintiringui. Canba compañerogunahuan alita apanacungahua, can imasami runa ashcata saquina munanguichu (1 Corintios 15:33).

3. IMATA RANATA ANLLAI

   Bibliaga nin: “Dios mana pugllaibacchu. Imatas tarpushaga chillatatami pallangui” (Galatas 6:7).

   Tucuigunami ima uraspas imata ranata anllana anchi, ima tucunata yachashas. Bibliaga alita rac runagunamanda cuintan. Paiguna man Jose, Job, Jesus. Chimandas mana alita rac runagunamandas cuintanmi. Paiguna manaura Cain, Esau, Judas. Can imata rangui.

Bibliaga ninmi “pactachic” runaguna ana manchi nisha (Lucas 16:10). Ima tucunata pinsashca asha, imata ranata anllashca ashaga, canda molestauccunata imata rimana mas ali anga. Mana facil acpihuas, caita rana mas ali man.

Ama yanga yarichu, canba compeñerogunata mana tucuita rimana changui. Shuccuna canda mana alita rai nicpi, sinzhi shunguta rasha mana nina angui. Chimandahuas, can rimashcata pactachina ashcata intindichi:

• “Mana rishachu”.

• “Can rashcata mana rashachu”.

• “Imata ñuca yuyashcata yachanguimi”.

Can yuyashcata mana manzhasha huaira shina cutichi. Chasna racpiga, camba compañeroguna molestanata saquingauna.

Compañeroguna canda pingachingahua, casna ninaun: “Imata tucungui. Ama manzhaisiqui aichu”. Escuelaibiga chasnami molestac anaun. Imatata rana ushangui. Caigunaibi yuyari:

• Casna nina ushangui: “Indá, manzhaisiqui mani”. Chi huasha, imaraicu chasna nishcata, ushashaga ansallata intindichi.

• Imaraicu can chita mana rashcata rimai. Casna nina ushangui: “Can shina yuyayuc runaga mana tabacota chupanmachu”.

Molestasha caticpiga chimanda anchuri. Yuyari: can chillai uyasha shayacpiga binsi tucunguimi. Chimanda anchurishaga can imata ranata anllashcata ricuchingui.

Caibi pinsari: Molestac runagunaga maibihuas tiyanaunmi. Chimanda, can imata ranata anllana ushangui, chasnallata imata pinsashcata pagllai intindichi. Alita ranata canllami anllana ushangui (Josue 24:15).