Akamanako ana i teia akaraanga: Kua mamae te kopu o Brian te aravei anga tona nga oa iaia. E rua taime i teia epetoma to raua māro anga iaia kia kai avaava. Ko te toru taime teia.

Tuatua te tamaiti mua:

Kua tamaru aia i te tuatua “oa” ma te kamoanga mata. E oti kua kiriti mai aia i tetai apinga mei roto i tona pute e kua oronga atu kia Brian.

Kite atu a Brian i te avaava i roto i te rima o te tamaiti. Mamae roa atu tona kopu.

Me ko koe a Brian, akapeea koe me pau?

I akamanako ana ainei te nga oa o Brian i ta raua e rave ra? Na raua ainei teia ikianga? Kare paa. Te aru ua ra raua i ta tetai ke akakeu anga. Inangaro raua kia ārikiia mai, no reira raua i tuku ua ai i tetai ke kia akakeu ia raua.

Me tupu teia kia koe, eaa taau ka rave i te patoi atu i te taomianga a te au oa?

1. TEATEAMAMAO

   Karanga ra te Pipiria: “E kite mamao te tangata pakari i te kino e kua pipini iora; te aere ua atura te kite kore, e mate atura.”—Maseli 22:3.

   Maataanga o te taime, ka kite koe e ka tupu te manamanata. Ei akaraanga, penei te kite atura koe i tetai pupu oa e kai avaava ra. Na te teateamamao anga, papa koe no te kopae atu i te reira.

2. AKAMANAKO

   Karanga ra te Pipiria: “Ei akava-ngakau meitaki to kotou.”—1 Petero 3:16.

   Ui kia koe uaorai, ‘Eaa te ka tupu me aru ua au i te pupu tangata?’ Tika, ka mareka mai toou au oa no tetai tuatau poto. Eaa toou manako i muri ake i te reira? Inangaro ainei koe i te akakore i toou tu meitaki no te akamareka ia ratou?—Exodo 23:2.

3. IKI

   Karanga ra te Pipiria: “Te akara meitaki ra te tangata akono ra i tona takainga.”—Maseli 14:15.

   I teia taime e i te tuatau ki mua, ka iki e ka āriki tatou eaa te ka tupu mai. Akakite maira te Pipiria no tetai au tangata mei ia Iosepha, Iobu e Iesu tei rave i te au ikianga meitaki. Te akakite katoa maira te reira no Kaina, Esau e Iuda tei rave i te ikianga kino. Eaa taau ka iki?

Karanga ra te Pipiria: “Ko te akono meitaki i te mea ngiti ra, kua akono meitaki katoa i te mea maata.” (Luka 16:10) Me kua akamanako ana koe i te ka tupu e kua aru koe i taau ikianga, ka māmā ua i te akakite i taau i iki—e ka mataora koe.

Eiaa e manamanata—kare koe e anoanoia kia ako i toou au oa. Rava ua i te tuatua e KARE. Me kore, akapapu atu i toou manako na te tuatua anga:

• “Akaatea atu!”

• “Kare au e rave ana i tera!”

• “Ae, kite ua koe i taku ikianga!”

Mea puapinga roa atu, kia pau viviki ma te tu papu. Me akapera koe, penei ka poitirere koe e ka akaruke viviki toou au oa ia koe!

Akapeea me tatiaeae mai toou au oa ia koe? Akapeea me ui mai ratou e, “Eaa te manamanata—mataku koe?” Akamanako ana eaa teia tu tatiaeae anga—e taomianga na te au oa. Akapeea koe me pau? E rua aau ikianga.

• Ka āriki koe i te tatiaeae. (“Tika taau. Mataku au!” Akakite atu i te tumu.)

• Akaoki i te taomianga. Akakite i te tumu i patoi ei koe e e āriki i te tu karape o toou oa. (“Manako au e tamaiti kite koe. Kare koe e kai avaava!”)

Me tatiaeae ua rai toou au oa ia koe, e akaruke! Akamaara, te roa atu ia koe i reira, te pakari atu te taomianga. Na te akaruke anga, akaari ra koe e kare koe e akatika i tetai ke kia akatere ia koe.

Tika, kare e rauka ia koe i te kopae i te taomianga a te au oa. Inara ka rauka ia koe i te iki i taau ka rave, te akakite i te tumu, e te akaaere i taau uaorai ka iki. I na, naau te reira ikianga!—Iosua 24:15.