Замислин туке акаја ситуација: Ки школа, узо о Бенјамини авена лескере дуј амала. Лескоро воѓи иранѓола тари дар, адалеске со акава курко веќе дуј пути теринена ле те пушинел. Акава ка овел о трито пути.

О прво чхаво вакерела леске:

Икалела нешто тари џепа хем џикоте дела е Бенјаминеске, вакерела: „Те запознајнав тут јекхе амалеа“, о лафи „амал“ нагласинела ле.

О Бенјамини дикхела кај ко вас иси ле цигара. Почминела те дарал панда по више.

Те ове сине ко е Бенјаминескоро тхан, со би кереа сине ту?

Дали е Бенјаминескере амала размислинѓе башо адава со керѓе? Дали ола коркори анена одлуке? На. О терне бут пути керена адава со керена ленгере амала. Ола мангена те овен прифатиме јаверендар, хем адалеске мукхена јавера те пхенен ленге со ваљани те керен а со на.

Ако аракхљовеа ки асавки ситуација, со шај те кере те шај ма те пере ко влијание тле врсниконгоро?

1. СПРЕМИН ТУТ АНГЛЕДЕР

   И Библија вакерела: „О гоѓавер мануш дикхела о лошнипе хем цидела пе, а о глупава џана понадари хем трпинена и казна“ (Изреки 22:3).

   Бут пути, англедер шај те дикхе о опасностија со авена. На пример, авеа паше узи несави група чхаве хем дикхеа кај ола пушинена. Ако англедер сиан спремимо башо асавко проблеми, тегани ка шај полокхе те икљове леа ко крајо.

2. РАЗМИСЛИН

   Ки Библија пишинела: „Аракхен тумари совест чисто“ (1. Петрово 3:16).

   Пуч тут: „Ако перава ко притисок е врсниконгоро, тегани сар ка осетинав ман пало адава?“ Точно, ко моменти шај ка ове прифатимо. Ама, сар ка осетине тут понадари? Спремно ли сиан те газине тут коркори само те угодине е јаверенге? (2. Мојсеева 23:2).

3. ОДЛУЧИН

   И Библија вакерела: „О гоѓавер мануш пазинела пе“ (Изреки 14:16).

   Кога-тогаш сарине амен ваљани те ана одлуке хем те живина адалеа. И Библија керела лафи башо о Јосиф, о Јов хем о Исус — мануша со анѓе шукар одлуке. Исто аѓаар, спомнинела е Каине, е Исаве хем е Јуда — мануша со на анѓе шукар одлука. Саве одлуке ка ане ту?

И Библија вакерела: „Постапин верно“ (Псалм 37:3). Ако англедер размислинеа башо последице хем одлучинеа сар ка постапине, ка изненадине тут кеда ка дикхе кобор тано локхо хем корисно те вакере тло стави.

Ма секирин тут! На ваљани те икере предавање тле врсниконге. Одлучно вакер „НА“. Или те шај те вакере јасно кова тано тло стави, шај те вакере:

• „Ки манде, ма рачунинен!“

• „Ме асавко нешто на керава!“

• „Џабе трошинена тумаро време манцар!“

Важно тано те одговорине одма хем одлучно. Ако кереа аѓаар ка изненадине тут кобор сигате ка мукхен тут рахати!

Со ако тле врсникија лена тут ки хајгара? Со ако вакерена туке: „Со — те на дараја?“ Хаљов, акава тано панда јекх начин сар шај о врсникија те керен туке притисок. Со шај те кере? Иси тут дуј опцие.

• Шај те сложине тут ленцар. („Оја, дарава!“ Пало адава вакер соске дараја.)

• Шај те вакере и причина соске одбинеа те кере нешто, хем вакер ленге нешто со ка чхивел лен те размислинен башо пле постапке. („Мислинѓум кај сиен доволно гоѓавер ма те пушинен!“)

Ако продолжинена те закачинен тут, циде тут адатхар! Кобор побутер бешеа ленцар, о притисок овела побаро. Ако џаја туке ко адава моменти, сикавеа кај одбинеа те ове сар ленде.

Реално — притисокија таро врсникија ка овен. Ама ту шај те одлучине со ка кере, саво стави ка сикаве хем дали ка мукхе те контролиринен тут. Значи и одлука тани тли! (Исус Навин 24:15).