Hanni tenne ikkito hedi: Taammiru ledosi rossannori lame ooso isiwa higge dagganna laiti dibaxisiˈrino. Insa tenne lamala giddo calla lame higge sijaara aganno gede assate woˈnaaltino. Xa sayikkimeeshsho agi yitasiraati.

Lamunku giddo mittu iso togo yii:

Hakkiinni kiisete giddonni mitore fushshe Taammirura hiiˈˈi yii.

Taammiru laˈˈanno wote kuni beetti sijaara amade no. Tenne laita Taammirura yaannori baisi.

Ati Taammiru ikkoottoro ma assatto?

Taammiru jaalla konne coye assitanni noohu affeeti? Insa sijaara aga hanaffinohu uminsanni kaˈeeti? Hatto ikka hoogara dandaanno. Insa tenne assate kaˈinohu wolu manni xixxiiweennansa ikkara dandaanno. Insa darawonsa baxxannonsa gede assiˈrate yite darawonsa assituta assate kaˈino.

Togoo coyi atera tuncu yiihero, darawokki yitannohere agurte gara ikkinore assa dandaattohu hiittoonniiti?

1. BALAXXE HEDI

   Qullaawu Maxaafi togo yaanno: “Egennaamu manchi bushare afiro maaxamanno; hawanyu [woy, gowwu] eˈˈe qarramanno.”—Lawishsha 22:3.

   Tuncu yaannohe coye roore wote balaxxe heda dandaatto. Lawishshaho rosu mine ledokki rossanno ooso sijaara agganni atewa higge dagganna laitto yino. Qarrissahera dandiitannota balaxxe hedakki, tuncu yaannohe fonqolira qixxaawatto gede kaaˈlitannohe.

2. XEERTISSE HEDI

   Qullaawu Maxaafi togo yaanno: “Danchu tiiˈˈi heeˈroˈne.”—1 Pheexiroosi 3:16.

   Ateneeto togo yite xaˈmi: ‘Darawoˈya hoode haˈre insa assitannore assummoro albillitte gaabbo amaddaekka?’ Darawokki ikkituta ikka yannate geeshsha insa baxxannohe gede assitara dandiitanno. Kayinni tini albillitte gaabbote uwatto gede assitahe ikka? Ledokki rossanno ooso hagiirsiisate yite ayimmakki huˈna hasiˈrattoni?—Fulo 23:2.

3. MAA ASSATTORO DOODHI

   Qullaawu Maxaafi togo yaanno: “Egennaamu manchi bunshe seekke qorophanno.”—Lawishsha 14:16.

   Barrunni mitto barra, ninke baalunku uminke doorsha doodhankenna doodhinoommo doorshi abbanno guma mixxanke digattanno. Qullaawu Maxaafi lowo manni, lawishshaho Yooseefi, Iyyoobinna Yesuusi dancha doorsha doodhitinota kulannonke. Qoleno Qaayeeli, Eesawunna Yihuda gara ikkinokkire assitinota kulanno. Atina maa doodhatto?

Qullaawu Maxaafi, “Dancha coye assi” yaanno. (Faarso 37:3) Doodhatto coyi abbanno guma balaxxe hedde wodanakki mitto assiˈrakki, hedokki darawokkira kula shota ikkitannohe gede assitanno; qoleno tenne assakki kiissannohe.

Darawoˈyara lowore coyiˈra hasiissannoe yite yaaddooti. DIHASIˈREEMMO yite kaajjishshe coyiˈra calla ikkitara dandiitanno. Woy hedokki soorrattokkita leellishate togo yaa dandaatto:

• “Beebba daafurtooti!”

• “Ani togoore dikisiˈreemmowe!”

• “Togoore asseemmokkita affanni heedhenni!”

Qaru coyi hobbi ruxxi yinikki ranke qolate. Hatto assittoro, darawokki bayichonko saalfatte agurtanno gari ateranni dhagge ikkahera dandaanno!

Miteekkite darawokki mishshuhella? Lawishshaho, “Agittoro ma ikkatto? Ada ati mulla waajjaleessaatilla?” yituhero ma assatto? Hatto yaansa ate gara ikkinokkire assatto gede xixxiiwate murcidhe kaˈinota leellishshanno. Ati tennera ma assa dandaatto? Ajayi ajeenna lamu doorshi noohe.

• Insa balalsite saˈˈa dandaatto. (Lawishshaho, “Ee waajjoommo!” yite sijaara aga waajjatto korkaata haransite kuli.)

• Insa uminsa sodhinota leellisha. Sijaara agattokkihu mayiraatiro kulte kaˈe, insa heddanno gede assannore coyiˈri. (Lawishshaho, “Ani ageemmota agurina kiˈne agaˈne umise dhagge ikkitinoe!”)

Darawokki ate qacifata woy misha agura gibburo, insawiinni agurte haˈri! Insa ledo keeshshitto kiiro, gara ikkinokkire assatto gede roore xixxiibbannoheta deˈooti. Insawiinni agurte haˈrakki, darawokki ayimmakki soorritara hasiˈrattokkita leellishshanno.

Noore coyiˈniro, darawokki bunshete widira xixxiibbannoheta maaxante gata didandaatto. Kayinni assa hasiˈrattore doodha, hedokki kaajjishshe kulanna gargadha dandaatto. Insa aye geeshshano xixxiibbuhero assattore doodhattohu ateeti!—Iyyaasu 24:15.