Se mea e ono tupu: Ua amata ona popole Brian a o faalatalata atu ni tamaiti se toʻalua e latou te aʻoʻoga faatasi. Ua faalua ona la taumafai i lenei vaiaso e faaosoosoina Brian e ula se sikareti. O le taimi lona tolu la lea ua la faaosoosoina ai o ia.

Ua fai atu le tamaitiiti muamua:

Ua ʻataʻata o ia ma faamamafa le taʻuina o le upu “uō,” a o ia aumai se mea mai i le taga o lona ofu ma tuu atu iā Brian.

Ua iloa atu e Brian le sikareti o loo i le lima o le tamaitiiti, ma ua atili ai ona popolevale o ia.

Pe ana faapea o oe o Brian, o le ā le auala e te tali atu ai?

Pe sa mafaufau lelei na tamaiti e aʻoʻoga faatasi ma Brian i a la gaoioiga o loo fai? Pe na teʻi lava ua la faia lea filifiliga? E leai. O le mea moni, ua la mulimuli atu i taaʻiga a isi tagata. E la te mananaʻo e talia e isi tagata i laʻua. O lea, ua la faatagaina ai isi e faatonu i laʻua i le mea e fai.

Pe ana tupu lea mea iā te oe, o le ā se filifiliga e te faia e ese mai i le filifiliga na faia e na tamaiti e toʻalua, ma tetee atu ai i faaosoosoga mai i isi talavou?

1. IA NOFOSAUNI

   Ua faapea mai le Tusi Paia: “O lē ua iai le utaga mamao e na te iloa atu le mala ma lafi ai, a o lē ua leai se poto masani e alu atu pea o ia ma malaia ai i āuga leaga.”—Faataoto 22:3.

   E masani lava e mafai ona e iloa tulaga e tulaʻi mai ai faafitauli, a o leʻi tutupu. O se faataʻitaʻiga, seʻi faapea ua e iloa atu ni tamaiti e tou te aʻoʻoga faatasi o loo ulaula. O lou nofosauni mo lenā tulaga, o le a e iloa ai le auala e taulima ai lenā faafitauli.

2. IA MAFAUFAU LELEI

   Ua faapea mai le Tusi Paia: “Ia taofimau i se lotofuatiaifo lelei.”—1 Peteru 3:16.

   Fesili ifo iā te oe lava, ʻO ā ni oʻu faalogona i se taimi mulimuli ane pe afai ou te mulimuli atu i mea o loo faia e isi talavou?’ Atonu o le a e ʻalofia ai le lē fiafia o isi talavou iā te oe i lenā taimi. Ae o ā ni ou faalogona i se taimi mulimuli ane? Po o le a e lotomalie e tuulafoaʻi mea e te faatāua ma talitonu i ai, tau ina ia faafiafia ai tamaiti e tou te vasega faatasi?—Esoto 23:2.

3. IA FAI SAU FILIFILIGA

   Ua faapea mai le Tusi Paia: “E mataʻu le tagata atamai.”—Faataoto 14:16.

   O le a oo mai le taimi e tatau ai ona tatou faia se filifiliga, ma tofo ai i iʻuga o na filifiliga. Ua faamatalaina i le Tusi Paia tagata e pei o Iosefa, Iopu, ma Iesu o ē na saʻo a latou filifiliga. O loo faamatalaina ai foʻi i latou na sesē a latou filifiliga e pei o Kaino, Esau ma Iuta. O le ā o le a e faia?

Ua faapea mai le Tusi Paia, ʻia e maumauaʻi i lou loto.’ (Tanielu 1:8) Pe afai ua uma ona e mafaufau i iʻuga o lau filifiliga ma ua e maumauaʻi e fai lenā filifiliga, o le a faigofie ona e faailoa atu lau filifiliga ma o le a aogā iā te oe.

E lē faapea e te tau lauga atu i isi talavou. Atonu e lava lou fai atu LEAI ae ia maumauaʻi. Pe ina ia faamautinoa atu foʻi e lē suia lava lau filifiliga, e mafai ona e faapea atu:

• “Soia, ou te lē faia lenā mea!”

• “E lē taitai lava ona ou faia lenā mea!”

• “Vaai, e te iloa lelei a ou te lē faia lenā mea.”

O le mea e sili ona tāua, o le vave ona tali atu, ma ia faia ma se uiga mautinoa. O le faia faapea, atonu o le a faateʻia ai oe i le lē toe faaosooso mai o isi talavou.

Ae faapefea pe a faifai atu isi talavou iā te oe? Ae faapefea pe a latou fai atu, “E ese ma lou palaai.” Ia iloa o lenei ituaiga o taufaifaiga ua na o se faaosoosoga masani mai i talavou. O le ā le auala e te tali atu ai? E lua auala e mafai ona e tali atu ai.

• E mafai ona e ioe i le taufaifaiga. (“E saʻo oe o lea ou te fefe.” Ona faamatala puupuu atu lea o le māfuaaga e te fefe ai.)

• E mafai ona e toe tali atu i le faaosoosoga. Faamatala atu le māfuaaga e te musu ai, ona fai lea i isi talavou e toe mafaufau lelei pe o saʻo le mea o loo latou faia. (“Na ou faapea lava aʻu e te poto ma e lē taitai e ulaula.”)

Pe afai e faaauau pea ona taufaifai atu isi talavou, ia savali ese. Manatua o le umi lava e te iai i inā, o le atili malosi foʻi lenā o le faaosoosoga. O lou alu ese, e faailoa atu ai e te lē faatagaina isi e suia mea e te faatāua ma talitonu i ai.

O le mea moni, o le a taumafai pea isi talavou e faaosoosoina oe. Ae e mafai ona e filifili i le mea e te manaʻo e fai, faailoa atu lau filifiliga, ma aua le faatagaina isi talavou e pulea au mea e fai. Auā o le mea moni, o le filifiliga e patino lava iā te oe.—Iosua 24:15.