Kěnang pẹ̌pikirẹ̌ ini: Su sikol᷊ah piạ darua hapị himaung si Brian, pěndang i Brian seng tawe sědapẹ̌ e. Su misa ini seng duang sul᷊ẹ i sire měgělị sosọ si sie, kụ sahěllo ini seng katělung sul᷊ẹ e.

Anạ esẹ humotong naul᷊ị,

Su tempong i sie nẹ̌bera ”hapị” i sie něgělị kode dingangu matane, kụ piạ barang nial᷊ạ bọu papodẹ e nighělị si Brian.

I Brian nakasilo sosọ su limane. Pěndang i Brian sauneng tawe sědapẹ̌ e.

Mạeng i kau nakoạ i Brian, apa sarung koatengu?

Apa manga hapị i Brian kahěngang-hěngang masingkạ apa nikoạ i sire? Apa ene kahěngang-hěngang kapulung i sire? Ěndịu tala. Kal᷊awọkange měkoạ ene, ual᷊ingu tụtol᷊e kapulung hapị i sire. I sire mapulu taumata wal᷊inẹ měhapị si sire. Hakị u ene, i sire měmala taumata wal᷊inẹ měngatorẹ̌ si sire.

Mạeng ene nariadi si kau, kere apa i kau měmile tawe tumol᷊e kapulung hapị?

1.  

   Alkitapẹ̌ naul᷊ị, ”Taumata pelesa mẹ̌tẹ̌teghang u kamageng makasilo silakạ arawe taumata wodo měngkate rụdal᷊eng turusẹ̌ mase kahombangeng silakạ masaria.”—Baweran Salomo 22:3.

   Biasane, i kau botonge makasingkạ kal᷊imona mạeng piạ masalah mariadi. Contone, i kau nakasilo bọu marau manga hapị su sikol᷊ah natampung, kụ měnẹ̌nosọ. Mạeng i kau maingatẹ̌ masalah apa sarung mariadi, i kau botonge tumatěngo ene.

2.  

   Alkitapẹ̌ naul᷊ị, ”Kěngkatilangko ral᷊ungu naung i kamene.”—1 Petrus 3:16.

   Pěkiwal᷊o su watangengu, ’Mạeng iạ tumol᷊e si sire kere apa pěndangku mahi?’ Ěndịu, i sire mapulu měhapị si kau. Katewe, kerea pěndangu mahi? Apa i kau mapulu i sire mal᷊uasẹ̌, katewe pẹ̌dal᷊ahapị u dingangi Yehuwa marusa?—Sasěbang 23:2.

3.  

   Alkitapẹ̌ naul᷊ị, ”Taumata mapia sěntiniạ mang mateghang.”—Baweran Salomo 14:16.

   I kitẹ kěbị tatapẹ̌ harusẹ̌ měmile, kụ měnarimạ hasil u apa nipileng i kitẹ. Alkitapẹ̌ naul᷊ị i Yusuf, Ayub dingangi Yesus němile barang mapia. Katewe, i Kain, Esau, dingangi Yudas němile barang dal᷊akị. Mạeng i kau kerea?

Alkitapẹ̌ naul᷊ị, ”Pěkoạ e mapia.” (Mazmurẹ̌ 37:3) Mạeng i kau masingkạ hasil u putusang sarung koatengu, maul᷊ị apa putusangu su manga hapị u ene gampang—lai piạ al᷊amate.

Abe katakụ—i kau tawe harusẹ̌ měnasẹ̌ si sire. Pakawahani maul᷊ị TALA, ene seng botonge. Tadeạu hapị tawe měmaringang si kau měkoạ barang dal᷊akị, paul᷊ị e:

• ”Tala, iạ mạdiri!”

• ”Mạeng barang kerene, kuhạe!”

• ”I kau masingkạ toh, iạ mạdiri barang kerene!”

Pakawahani maul᷊ị i kau mạdiri. Mạeng i kau měkoạ ene, i sire seng mạdiri měmaringang si kau měkoạ barang dal᷊akị!

Kerea mạeng piạ taumata mělangehẹ̌ si kau? Kerea mạeng i sire naul᷊ị, ”Kawe? I kau matakụ ang?” I kau harusẹ̌ masingkạ i sire kětạeng měnal᷊ukạ si kau—i sire mapulu i kau tumol᷊e si sire. Mạeng kerene, apa harusẹ̌ koatengu? Pilẹe ini.

• Tarimạe bawerang i sire. (”Kahěngang, iạ memang matakụ!” Bọu ene paul᷊ị alasange.)

• I kau botonge sumimbahẹ̌ si sire. Paul᷊ị alasange tadeạu i sire mẹ̌pikirẹ̌. (”Sěnangku, i kamene tawe měkoạ hal᷊ẹ̌ bodokẹ̌ kerene!”)

Mạeng i sire turusẹ̌ mělangehẹ̌, pẹ̌těngkarau bọu ene! Mạeng i kau tatapẹ̌ sene, i sire turusẹ̌ mělangehẹ̌ si kau. Katewe, mạeng i kau měngal᷊ing, ene něnodẹ i kau tawe měmala i sire měngatorẹ̌ si kau.

Taumata wal᷊inẹ mang tatapẹ̌ měmaringang si kau měkoạ barang dal᷊akị. Katewe, i kau botonge měmile apa sarung koatengu, paul᷊ị apa pendirian u, kụ koạ e ene. Kasamuriange, i kau mang harusẹ̌ měkoạ putusang hala!—Yosua 24:15.