Sioloto atu ki he talanoa ko ení: ‘I he fakaofiofi atu ha toko ua ‘o hono ngaahi kaungāakó, ‘oku ongo‘i ‘e Pita ‘oku ‘ī‘ī hono keté. Na‘e tu‘o ua ‘i he uiké ni ‘ena feinga‘i ia ke ne ifi tapaka. Ko ‘ena feinga eni hono tu‘o tolú.

‘Oku lea atu ‘a e tamasi‘i ‘uluakí:

‘Okú ne fakamamafa‘i ‘a e fo‘i lea “kaume‘á” mo fakakuitaha ‘i he‘ene to‘o hake ha me‘a mo lī atu hono nimá kia Pita.

‘Oku sio ‘a Pita ki he fo‘i sikaleti ‘i hono nimá. ‘Oku toe ‘ī‘ī ange ‘a e kete ‘o Pitá.

Kapau ko Pita koe, ‘e anga-fēfē ha‘o tali?

Na‘e fakakaukau mo‘oni ‘a e to‘ume‘a ‘o Pitá fekau‘aki mo e me‘a ‘okú na faí? Kuó na ‘osi fai ha fili ma‘a kinaua pē? Ngalingali ‘ikai. Ko hono mo‘oní, na‘á na ‘ulutukua ki he tākiekina ‘a e ni‘ihi kehé. ‘Okú na loto ke tali lelei kinaua, ko ia ‘okú na faka‘atā ai ‘a e ni‘ihi kehé ke nau fakafuo ‘a e me‘a ke na faí.

Kapau na‘á ke fehangahangai mo ha tu‘unga pehē, ‘e lava fēfē ke ke fili ha ‘alunga kehe pea taliteke‘i ‘a e tenge mei he to‘ume‘á?

1. FAKAKAUKAU TOKAMU‘A

   ‘Oku pehē ‘e he Tohi Tapú: “Ko e fakapotopoto ‘oku ne sio ki he kovi, ‘o ne toi: Ka ko e hehemangofua ‘oku nau laka atu pe, ‘o mo‘ua ai.”—Palōveepi 22:3.

   ‘Oku fa‘a lava ke ke sio tokamu‘a ki he palopalemá. Ko e fakatātaá: Pehē pē ‘okú ke sio atu ki ha kulupu ho kaungāakó, pea ‘oku nau ifi tapaka. ‘I ho‘o fakakaukau tokamu‘a ki he palopalemá, te ke mateuteu ai ke fekuki mo ia.

2. FAKAKAUKAU

   ‘Oku pehē ‘e he Tohi Tapú: “Tauhi ma‘u ha konisēnisi lelei.”—1 Pita 3:16.

   ‘Eke hifo, ‘‘E fēfē ‘eku ongo‘í ‘i he lele lōloá kapau te u muimui pē ‘i he tokolahí?’ Ko e mo‘oni, ‘e fakataimi pē ho‘o ‘ai ke sai‘ia ho to‘ume‘á ‘iate koé. Ka ‘e fēfē ho‘o ongo‘í ‘amui ange? Te ke loto-lelei ke feilaulau‘i ‘a e me‘a ‘okú ke fakamahu‘inga‘i mo tui ki aí koe‘uhi pē ke fakahōhō‘ia‘i ho kaungāakó?—‘Ekisoto 23:2.

3. FAKAPAPAU‘I

   ‘Oku pehē ‘e he Tohi Tapú: “Ko e tangata poto ‘oku ne manavahe” pe tokanga.—Palōveepi 14:16.

   Kuo pau ke tau fai ha fili pea hokosia hono ngaahi nunu‘á ‘i he ‘ahó ni pe ‘amui ange. ‘Oku fakamatala ‘a e Tohi Tapú fekau‘aki mo e kau tangata hangē ko Siosifa, Siope mo Sīsū, ‘a ia na‘a nau fai kotoa ‘a e fili na‘e totonú. ‘Oku toe fakahaa‘i mai fekau‘aki mo Keini, ‘Īsoa mo Siutasi ‘a ia na‘a nau fai ha ngaahi fili kovi. Ko e hā te ke faí?

‘Oku pehē ‘e he Tohi Tapú: “Faitōnunga ‘i ho‘o tō‘ongá.” (Saame 37:3, NW) Kapau kuó ke ‘osi fakakaukau fekau‘aki mo hono ngaahi nunu‘á pea kuó ke ‘osi fakapapau‘i ia ‘i ho ‘atamaí, ko hono fakahaa‘i ho tu‘ungá ‘e lava ke ke ‘ohovale ‘i he‘ene faingofuá—pea fakafiefia.

‘Oua ‘e hoha‘a—‘oku ‘ikai fiema‘u ia ke ke malanga‘i ho to‘ume‘á. Ko ha ki‘i lea ‘IKAI kae tu‘uma‘u, ‘e fe‘unga nai ia. Pe ko hono ‘ai ke mahino ‘oku ‘ikai toe ala liliu ho tu‘ungá, ‘e lava ke ke pehē:

• “‘Oua te ke fakakau au!”

• “‘Oku ‘ikai te u fai ‘a e fa‘ahinga me‘a ko iá!”

• “‘Okú ke ‘ilo‘i he‘ikai te u fai ena!”

Ko e kií, ko e ‘oatu ha tali vave fakataha mo e tuipau. Kapau te ke fai pehē, te ke ‘ohovale nai ‘i he vave ‘a e mavahe atu ho‘o to‘ume‘á!

Fēfē kapau ‘oku manuki‘i koe ho to‘ume‘á? Fēfē kapau ‘oku nau pehē atu, “Ko e hā ho palopalemá—ko e tokotaha vaipalo koe?” ‘I hono ‘ilo‘i ‘a e fa‘ahinga manuki ko ení ‘a ia ‘oku ui—ko e tenge ta‘etoka‘i mei he to‘ume‘á. Ko e hā ho‘o talí? ‘Oku ‘i ai ha me‘a ‘e ua ke ke fili mei ai.

• ‘E lava ke ke tali ‘a e manukí. (“‘Okú ke mo‘oni, ‘oku ou ilifia!” Fakamatala nounou ho‘o ‘uhingá.)

• ‘E lava ke ke fakahanga atu ‘a e tengé kiate ia. Tala ‘a e ‘uhinga ‘okú ke taliteke‘i aí, pea fakahaa‘i pōto‘i ia ki ho to‘ume‘á. (“‘Oku ou pehē ‘e au ‘okú ke fu‘u ‘atamai lelei ke ke ifi!”)

Kapau ‘oku hokohoko atu hono manuki‘i koe ho to‘ume‘á, mavahe! Manatu‘i, ko e fuoloa ange ho‘o nofo aí, ko e lahi ange ia ‘o e tenge ‘e fai atú. ‘I ho‘o mavahe mei he feitu‘u ko iá, ‘oku fakahaa‘i atu ai ho‘o fakafisi ke faka‘atā ‘a e ni‘ihi kehé ke nau liliu koe.

Ko hono mo‘oní, he‘ikai lava ke ke toi mei he tenge ‘a e to‘ume‘á. Ka ‘e lava ke ke fakapapau‘i ‘a e me‘a ‘okú ke loto ke faí, fakahaa‘i ho tu‘ungá pea mapule‘i ia. Ko e faka‘osí, ‘oku ‘a‘au ‘a e filí!—Siosiua 24:15.