Pensaraʼan ja it: ja Brayan yabʼ och lasasuk ja skwerpo yajni yila chabʼe ja smoji mojxiyejan ja bʼayi. Ja semana it kʼapjitayi chabʼ ekʼele bʼa oj snukʼ may. Sok ja wego jaxa bʼa yoxil ekʼele.

June bʼa yeʼnle yala:

Ay jas ya eluk ja bʼa sbolsa sok stsʼel satin, tixa skʼapayi ja Brayan.

Yajni yila ja Brayan ja may yiʼoj ja keremi, yabʼ kʼe lasasuk mas ja skwerpo.

Lekbʼi weʼnuka ja Brayan, ¿jas oja kʼuluk?

¿Wan maʼ xa kʼuʼan ja smojik ja Brayan wa snaʼawe ja jas wane skʼulajel? ¿Yeʼn maʼ spensare? Bʼobʼta miyuk. Bʼobʼta ja ita wane snochjel ja jas wa skʼulane ja tuki. Kechan wa skʼanawe lek oj iljuke yuja tuki sok ja yuj wa xyaʼawekan pilan maʼ oj aljuk yabʼye ja jas oj skʼuluke.

Lekbʼi x-ekʼa bʼaj ja wokol it, ¿ay maʼ wiʼoj pilan modo jas oja kʼuluk bʼa oj kuchukawuj ja stʼenwanel ja tuki?

1. CHAPA BʼAJ BʼAJTAN

   Ja Biblia wa xyala: «Ja maʼ wa spensaran leki wa xyila ja jas xiwela sbʼaji sok wa snakʼa sbʼaj, pe ja maʼ mi spensaran leki wa x-ekʼ toj sok wa xyila ja swokolil» (Proverbios 22:3).

   Ja masni wa x-ekʼi, ja wokoliki wani x-ilxi wa xjaki. Pensaraʼan lekbʼi ja bʼa wajuma xkʼota sat jun tsome kerem wane snukʼjel may, ta ocha pensaraʼuk bʼajtanto ja jas oj ekʼuki, masni chapan oj ajyan bʼa oja naʼ jas oja kʼuluk.

2. PENSARAʼAN

   Ja Biblia wa xyala: «Ajyanik tzamal ja bʼa wawaltzilexi» (1 Pedro 3:16, YD).

   Jobʼo bʼaj: «¿Jastal maʼ oj kabʼ ta jaʼ jnocho skʼulajel ja jas wa skʼulan ja tuki?». Bʼobʼta jawa mojik bʼa eskwela lekni oj yila, ama bʼa tʼusanta tyempo. Pe ¿jastal maʼ oja wabʼ mas tsaʼan? ¿Wan maʼ xa kʼana oja chʼay ja jastal kʼotela bʼa kechan lek oj kanansok jawa mojiki? (Éxodo 23:2).

3. TSAʼA JAS OJA KʼULUK

   Ja Biblia wa xyala: «Ja maʼ bibo wa skʼela kʼinal sok wa sjitsa sbʼaj ja bʼa mi lekuk» (Proverbios 14:16).

   Wani x-eljul ja tyempo bʼa tʼilan oj jtsatik ja jas oj jkʼuluktiki sok yiljel ja slekilal ma ja smaloʼili. Ja Biblia wa staʼa tiʼal jastal ja José, Job soka Jesús, bʼa stsaʼawe lek skʼulajel. Pe chomajkil wa staʼa tiʼal bʼa Caín, Esaú soka Judas, bʼa mi lek stsaʼawe skʼulajel. ¿Jas oja kʼuluk ja weʼn?

Ja Biblia wa xyala: «Ja maʼ toj ay soc ja tʼusan yioji, toj ni oj cho ajyuc soc ja ta jitzan cʼa yioji» (Lucas 16:10). Ta apensaranta ja jas oj bʼobʼ ekabʼaj sok atsaʼata jas oja kʼuluki, yaljel ja jas waxa pensaraʼani bʼobʼta masni pasil bʼa weʼna sok ojni awil ja slekilali.

Mok chamuka kʼujol, mi tʼilanuk oj chʼaka cholyabʼ yibʼanal. Malanta oja wal miyuk. Chomajkil alakan jaman lek bʼa mini oja tukbʼes jawa pensari sok oj bʼobʼa wal:

• «Ja keʼn mokni awaʼon kwenta».

• «Ja keʼn mi xkʼulan ja jastik junuk jaw».

• «Iday, ¡wanxa xa naʼa jastalon!».

Ja mas leki jani sjakʼjel wego sok mini tʼun xiwel. Ta jach akʼulan, bʼobʼta chamtoni oja wabʼ ja wego oj yaktayakan ja maʼ wa stʼenawa.

Bʼobʼta jawa mojiki wa xya kʼixwan. Sok bʼobʼta oj aljukawabʼ: «¿Jas yuj mixa kʼana? ¿Yuj wala xiwi?». Ja tikʼe yaljelik it jani jel xyawe makunuk bʼa stʼenjel ja tuki. ¿Jastal oj bʼobʼa jakʼe? Ayni wiʼoj chabʼ modo.

• Snochjelyi ja sloʼili. (Oj bʼobʼa wal: «Meraniʼa, wani la xiwyona». Tsaʼan, choloyabʼ tʼusan jas yuj wala xiwi).

• Yajel kumxukyi ja sloʼili. (Choloyabʼ jas yuj mixa kʼulan sok tixa walayabʼ: «June maʼ bibo jastal weʼna mini oj yabʼ may»).

Ta mikʼa xyaktayakan, jitsa abʼaj. Ajuluka kʼujol yajni mas albʼel wala kani, mastoni oj tʼenjan. Yajni waxa jitsa abʼaj, waxa jeʼa weʼnani waxa wala jas oja kʼuluk.

Ja smeranili, mi xbʼobʼa nakʼa bʼaj soka stʼenwanel ja tuki. Pe ojni bʼobʼa tsaʼ ja jas oja kʼuluki, yajelkan jaman lek ja jas waxa pensarani sok skomjel ja wokoli. Pes weʼnani waxa naʼa ja jas oja kʼuluki (Josué 24:15).