Kalilakpuwanti uma: Brian makgkatsi pi asta pulakkatsan akxni akxilha chatiy xcompañeros pi talakatsuwimakgolh. Uma semana xlimakgtiya wanikgolh pi kaxkulilh. Chu la uku xlimakgtutu nawanikan.

Chatum wani:

Wi tuku makutu kxbolsa xpantalón, matsuwini xlakgastapu chu wani Brian pi katiyalh.

Brian akxilha cigarro kxlakgstipan xmakan uma kgawasa chu liwaka pulakkatsan.

Komo chuna xtitaxtu la Brian, ¿tuku xtlawa?

¿Lakpuwana pi xcompañeros Brian katsikgo tuku tlawamakgo? ¿Lakpuwana pi xakstukan laksakkgonit tuku natlawakgo? Max ni. Max chuna tlawakgo xlakata amakgapitsin kawanikgonit. Lakaskinkgo kakamakgamakglhtinanka chu wa xlakata mastakgo talakaskin pi amakgapitsin kalaksakkgolh tuku natlawakgo.

Komo chuna xtitaxtu, ¿xlakgati atanu tuku natlawaya chu ni namastaya talakaskin pi amakgapitsin namatlawikgoyan tuku xlakan lakaskinkgo?

1. KALAKKAXWILI TUKU NATLAWAYA

   Biblia wan: «Tiku skgalala akxilha tuku nitlan chu tatsekga, pero tiku xatonto tsaj an chu pati tuku nitlan kitaxtu» (Proverbios 22:3).

   Makglhuwa, tlan katsikan akxni max natitaxtukan ktaʼakglhuwit. Kalakpuwanti pi tlawampat chu kaʼakxilha makgapitsi lakgkgawasan tiku xkulimakgo. Komo nalilakpuwana tuku max nala, nakatsiya la nalakkaxtlawaya uma.

2. KALAKPUWANTI

   Biblia wan: «Chuntiya xaʼakgstitum kakgalhitit mintalakapastaknikan» (1 Pedro 3:16, TNM).

   Kakgalhskinka: «¿La nakmakgkatsi komo naktlawa tuku tlawakgo amakgapitsin?». Xlikana pi tiku katapina kʼescuela tlan natalalinkgoyan, maski kaj tsinu kilhtamaku. Pero ¿la namakgkatsiya alistalh? ¿Makgatsankgaputuna tuku xlikana litalakgapasa kaj xlakata tlan natalalinkgoyan mincompañeros? (Éxodo 23:2).

3. KALAKSAKTI

   Biblia wan: «Tiku skgalala kuenta tlawa chu tamakgatlini tuku nitlan» (Proverbios 14:16).

   Nachan kilhtamaku akxni natalakaskin nalaksakaw tuku natlawayaw chu napatiyaw tuku nakitaxtu. Biblia kalichuwinan lakchixkuwin tiku laksakkgolh tuku tlan, la José, Job chu Jesús, pero na kalichuwinan tiku laksakkgolh tuku nitlan, la Caín, Esaú chu Judas. ¿Tuku natlawaya wix?

Biblia wan: «Katlawa tuku xaʼakgstitum» (Salmo 37:3). Komo lakpuwanita tuku max nakitaxtuniyan xlakata tuku natlawaya chu laksaknitata tuku natlawaya, nawana tuku lakapastaka tlakg ni tuwa nawan nixawa la lakpuwana. Nachuna, tlan nakitaxtu.

Ni kalilakgaputsa, ni talakaskin nakamaxkiya taʼakgchuwin. Kajwatiya lakatanks nakawaniya ni. Na tlan nakamaʼakgatekgsniya pi ni katilakgpali tuku lakpuwana chu nakawaniya:

• «Akit ni kmakgtanu».

• «Akit ni ktlawa uma».

• «Katsiyata tuku klakpuwan».

Talakaskin lakapala chu ni xatapekua nakgalhtinana. Komo chuna natlawaya, max kaks nalilakawana akxni mincompañeros nialh katimaʼakglhuwikgon.

Max mincompañeros nalikgalhkgamanankgoyan. Max nawanikgoyan: «¿Tuku akgspulayan? ¡Ni xapekua kawanti!». Wa uma tuku tlakg maklakaskinkgo akxni namatlawiputunkgoyan tuku xlakan lakaskinkgo. ¿Tuku tlan natlawaya? Pulaktiy tuku tlan natlawaya:

• Nakawaniya tuku kgaxmatputunkgo. Tlan nawana: «Xlikana, kpekuan». Alistalh nakawaniya tuku xlakata.

• Nakalakgpaliniya tuku nakalikgalhtiya. Kawanti tuku xlakata ni chuna tlawaya chu alistalh kawanti: «Chatum tiku skgalala chuna la wix ni kxkulilh».

Komo chuntiya namaʼakglhuwikgoyan, katapanu. Akxni tlakg namakgapalaya, tlakg namatlawiputunkana tuku ni tlawaputuna. Akxni natapanuya nalimasiyaya pi wix laksaka tuku natlawaya.

Xlikana: nila katitsalaniw xlakata ni nakinkamatlawiputunkanan tuku nitlan. Pero tlan nalaksaka tuku natlawaya, lakatanks nawana tuku lakpuwana chu ni namatlawikana tuku nitlan. Wix nalaksaka tuku natlawaya (Josué 24:15).