EKIKAGUZO 6
Nsemeriire Kukora Ki Kakuba Nsindikirizibwa Kukora Ekintu Ekitahikire?
WAKUKOZERE KI?
Teramu akasisani: Brian acweka enkizi obw’arora aboojo babiri abasoma n’abo nibaija nambere ali. Emirundi ebiri omu sabiiti enu yoonka, babaire nibalengaho kumuhambiriza kunywa etaaba. Hati gunu nigugenda kuba murundi gwakasatu.
Omu h’aboojo agamba:
“Nahati oli wenka? Leka nkwanjurre munywani wange.”
Aitira Brian eriiso hanyuma aiha omu nsaho ye ekintu, kandi akimuheereza.
Brian obw’arora omwojo akwasire etaaba, ahurra enda yamwesiba.
Brian agamba “boojo mundeke, nkabagambira ira nyowe tinywa etaaba . . .”
Omwojo ondi agamba: “Baitu habwaki oli mutiini?”
Brian abagarukamu “tindi mutiini!”
Omwojo amukwata ha ibega n’amugamba “naiwe nywaho!”
Omwojo akwasire etaaba agimwiriza haihi n’omunwa gwe amugamba: “Nywaho titurukwija kugambira omuntu weena kandi busaho arukwija kukimanya.”
Wakukozere ki kakuba niiwe Brian?
TEKEREZA HALI KINU!
N’otekereza aboojo banu babandize kutekereza kintu ekibarukukora? N’oteekereza nubo bayecweriiremu kutandika kunywa etaaba? Nangwa, nikizooka bakohebwa abandi ekibali nibakora. Bakagonza kusemeza bataahi b’abo nukwo kutandika kunywa etaaba nk’abo.
Kakuba oyesanga omu kizibu nka kinu, kiki ekiwakukozere kukyetantara?
-
BA N’OBUSOBOZI BW’OKURORA AKABI
Baibuli egamba ngu: “Omuntu omwekengi arora akabi ayesereka, baitu abatanyina magezi bahinguraho, baferwa.”—Enfumo 22:3.
Obwire oburukukira obwingi, osobora kumanya kara akabi katakabaireho. Nk’ekyokurorraho, osobora kuba n’orubata baitu omu maiso gaawe okalebayo abeegi bagenzi baawe nibanywa etaaba. Ekyo kisobora kukukonyera kumanya ngu nambere orukugenda osobora kutungayo ebizibu, okateekaniza kara eky’orakora.
-
CUMITIRIZA
Baibuli egamba: “Mwikale mwine omuntu w’omunda omurungi.”—1 Petero 3:16, NW.
Wekaguze, ‘Ndayehurra nteekaine hanyuma y’okuhondera abandi ebi barukora?’ Osobora kubasemeza habw’akasumi, baitu orayehurra ota hanyuma? Oyetegekere kukora ekitahikire habw’okugonza kusemeza abeegi bagenzi baawe?—Okuruga 23:2.
-
CWAMU
Baibuli egamba: “Omuntu owamagezi atiina kandi aruga omu bubi.”—Enfumo 14:16.
Twikale tukimanyire ngu, twine kwecweramu kandi tukagumira ebirarugamu. Baibuli ebaza ha bantu nka Yusufu, Yobu, na Yesu abacwiremu n’amagezi. Kandi ebaza na ha bantu nka Kaini, Esau, na Yuda abacwiremu kubi. Iwe noija kukora ki?
Baibuli egamba ngu: “Ohonderege okwesigwa.” (Zabuli 37:3) Obworaaba otekeriizeeho ebirukusobora kuruga omu kuhondera eky’abeegi bagenzi baawe barukugonza okole, kandi omazire ira n’okucwamu eky’orakora, noija kwanguhirwa kugambira beegi bagenzi baawe oky’orukusobora kukora n’eky’otarukwija kukora.
Oteralikirra—tikirukwetagisa kubanza ebintu bingi. Kubagarukamu ngu NANGWA nikimara rundi kubooleka ngu torukwija kuhindura omu encwamu yawe n’obagamba:
-
“Mutambarramu!”
-
“Ebyo timbikora!”
-
“Timumanyire?”
Ekikuru nukwo kubagarukamu aho n’aho kandi otarukutiina. Obw’orabagarukamu oti, nibaija kukurugaho!
OMULINGO OSOBORA KUGUMISIRIZA ABARUKUSEKEREZA
Obworamara gahondera buli kimu bagenzi baawe ekibarukukugamba, noija kuba nka roboti eyibaragira buragira eky’okukora
Oyehurra ota abandi obu bakusekereza? Kakuba bakugamba ngu, “Iwe okabaki—Kooli mutiini.” Obu barakugamba ebintu by’omulingo gunu, kimanye ngu nibalengaho kukwohya. Wakugarukiremu ota? N’osobora kugarukamu kimu ha bintu bibiri ebyolekerwe hansi.
-
N’osobora kubagamba: (“Mananu kwo eki mungambire nintiina kukikora!” Hanyuma bagambire ensonga habwaki torukwija kukikora.)
-
Naiwe osobora kubasonsoimya. Bambire ensonga habwaki torukwija kukora eki barukukugamba okole. (“Nainywe nimunywa etaaba? Kale mbaire ntarukubanihirramu kukora ekintu nk’ekyo!”)
Kakuba bagumizaamu kukusekereza bahigize ogende! Ijuka ngu kakuba otabahigiza nibaija kweyongera kukusekereza. Obwobahigiza oyoleka ngu toikiriize abantu abandi kukuhindura.
Amananu gali nti torukusobora kwetantara okwohebwa. Baitu n’osobora kucwamu eky’orukugonza kukora, okabagambira eky’ocwiremu ekirukwija kubooleka oli muntu ayecweramu.—Yosuha 24:15.
