Mafaufau ki te tulaga tenei: I te taimi e olo atu ei a tamaliki e tokolua mai te akoga, ne kamata o fai fakaa‵tea a Peniata. Ko oti ne taumafai fakalua lāua i te vaiaso tenei ke faka‵pusi tou tagata. Ko te tolu o taumafaiga tenei.

E fai atu te tamaliki tagata muamua:

E faka‵mafa atu ne ia te pati “taugasoa” mo tena mata e faka‵kivi atu i te taimi e puke aka ei ne ia se mea mai tena taga kae ‵kapa atu tena suā lima ki a Peniata.

E lavea ne Peniata a te sikaleti i te lima o te tamaliki tagata i va o ana matikaolima. Ko momea aka eiloa te fai fakaa‵tea o Peniata.

Moi fai koe ko Peniata, ne a au mea ka fai?

Kai mafaufau faka‵lei aka eiloa a taugasoa o Peniata ki lā mea e fai? Kai fai aka eiloa ne lāua lā fakaikuga? Ikai. A te ‵tonuga loa, ne faka‵logo fua lāua ki fakamalosiga a nisi tino. Ne ma‵nako fua ke taliagina lāua, telā ne fai fua ne nisi tino a lāua ke penā.

Kafai e fepaki koe mo se tulaga tai ‵pau, e mafai pefea o filifili aka ne koe se isi auala kae ‵teke atu ki taugasoa ma‵sei?

1. KE LAVEA ‵MAO

   E fai mai te Tusi Tapu: “A tino ‵poto e lavea ‵mao ne latou a fakalavelave, tela la, e faka‵mao keatea mai i ei, ka ko te tino sē mafaufau e fano tonu eiloa ki koga e ‵tupu ei fakalavelave, kae fakamuli ko salamo ei a ia.”—Faataoto 22:3.

   E mafai o lavea ‵mao atu faeloa ne koe a fakalavelave. E pelā mo te mea tenei, mafaufau me ko lavea ‵mao atu ne koe se potukau o tamaliki ‵pusi i tau akoga. Mai te lavea ‵mao atu ne koe o te fakalavelave, ka mafai ei o toka koe ke fakafesagai atu ki ei.

2. MAFAUFAU

   E fai mai te Tusi Tapu: “Fakatumau se loto lagona ‵lei.”—1 Petelu 3:16.

   Fesili ifo ki a koe eiloa, ‘Ka pefea oku lagonaga māfai ko tautali atu fua au i te tokoukega?’ E tonu, e mafai o fakaseke koe mō se vaitaimi ki te sē fia‵fia o ou taugasoa. Kae ka pefea ou lagonaga fakamuli? E mata, e loto fiafia koe ke fakaseaoga tou iloga ko te mea ke fakafiafia fua ne koe o ou kautama?—Esoto 23:2.

3. FILIFILI

   E fai mai te Tusi Tapu: “A tino ‵poto e fakaeteete.”—Faataoto 14:16.

   E se leva io me fakamuli ifo, e ‵tau o fai ne tatou se filifiliga kae e ola e ‵tusa mo ikuga mai i ei. E taku mai i te Tusi Tapu a tāgata pelā mo Iosefa, Iopu mo Iesu, kolā ne fai ne latou te filifiliga tonu. E taku mai i ei a Kaino, Esau mo Iuta, kolā ne fai ne latou a filifiliga ma‵sei. Ne a au mea ka fai?

E fai mai te Tusi Tapu: “Ke ola ‵lei [fakamaoni] koutou.” (Salamo 37:3) Kafai ko oti ne mafaufau koe ki ikuga kae fakaiku aka tou mafaufau, a te taku atu o tou tulaga e mafai o ofo koe i te faigofie—kae fakafiafia.

Sa saga ki ei—e se ‵tau o fai atu ne koe se lāuga ki ou taugasoa. E mafai eiloa o lava i te fai atu fua mo te mautinoa IKAI. Io me ke fakamatala faka‵lei atu tou tulaga ‵mautakitaki, kae fai atu:

• “Sa aofia au i ei!”

• “E se fai ne au se vaegā mea penā!”

• “Kiloke, e iloa ‵lei eiloa ne koe au!”

A te kī ko te tali fakavave atu ki ei mo te loto talitonu. Kafai e fai koe penā, e mafai o ofo koe i te fulitua vave atu o ou taugasoa ki a koe!

Kae e a māfai e fakatauemu atu ou taugasoa ki a koe? E a māfai e fai atu latou, “Koe la e a—koe mataku?” Ke lavea ‵lei ne koe a te vaegā fakamaseiga tenei—fakamalosiga matagā mai taugasoa. E mafai pefea o tali atu koe? E lua mea e mafai ne koe o fai.

• E mafai o fa‵ki koe i te fakamaseiga. (“Ao, e tonu koe, au e mataku!” Ko taku malie atu ei ne koe te pogai.)

• E mafai o tali atu koe. Ko fai atu ei ne koe te pogai mō tou ita fitifiti, kae tofotofo malie aka a mafaufau o ou taugasoa. (“Au ne mafaufau me e iloa ‵lei ne koe te masei o te ‵pusi!”)

Kafai e tumau eiloa i te fakaitaita atu o ou taugasoa, sasale atu fua keatea! Masaua, ko tou nofo leva, ko te momea aka o olotou fakamalosiga. Mai te fano keatea, e fakaasi atu ei ne koe a tou ita fitifiti ke ‵fuli ne latou koe.

A te ‵tonuga loa, e se mafai o ‵muni koe mai i taugasoa ma‵sei. Kae e mafai o filifili ne koe a te mea e manako koe ki ei, taku ‵tonu atu tou tulaga, kae pule atu koe ki a koe eiloa. I te fakaotiga, i a koe eiloa te filifiliga!—Iosua 24:15.