Muupuwele ela: Arlindo onnaaweha amiravo anli onisomana awe oxikola. Awo annimwaattamela nto owo onnipacerya woova. Esumana ela, ikwaha piili awo anvaha cigarro. Nto ela ekwaha ya neeraru animananihaya-tho.

Mmiravo oopacerya onilavula so:

Owo onninvara makhata Arlindo, nto onnikela mpoolosani khiyamukumiha cigarro wira onvahe Arlindo.

Arlindo onniweha mmiravo owo ompattihaka cigarro. Nto okathi owo Arlindo onnitepa woona oriirya mmirimani.

Vaakhanle wira nyuwo mwa Arlindo, mwaarowa opaka exeeni?

Niireke amiravo ale yaanisuwela tthiri ele yaapaka aya? Niireke yaahipakasa yoothanla aya? Nnaari. Woonasa wene, yaaroowokiwa ni akhwaaya nto anatakiha mweettelo aya. Tivonto, awo yeettihiwa ni apatthani aya.

Akhala wira onimoophwanyani muxankiho ntoko ola, munrowa opaka exeeni?

1. MWIILOKIHERYE VAHINATTHI

   Biibiliya onihimya so: “Mulipa-ànkhili onnona yowopiha, anahuluwa: mulolo onnikumana vohupuwela, khutakhaliwa”.—Miruku 22:3.

   Vanniweryaneya osyaka muxankiho owo vahinatthi. Mwa ntakiheryo, nkuupuwelani wira munaaweha anaxikola yeemele ene mphironi empahaka cigarro. Akhala wira munimwiilokiherya vahinatthi munoosyaka muxankiho owo.

2. MUUPUWELE SOOKHUMELELA

   Biibiliya onihimya so: ‘Mukhalaneke murima woloka’.—1 Pedru 3:16.

   Mwiikoheke so: ‘Kapaka vale ele enaasivela anamunceene, kinrowa okhala sai?’ Ekeekhai wira munoosyaka waanyoonyiha apatthani anyu. Masi murima anyu onirowa okhala sai? Niireke munimweemya oleva mweettelo anyu wooloka mphavelaka paahi waasiveliha apatthani anyu?—Okhuma 23:2.

3. MPAKE YOOTHANLA

   Biibiliya onihimya so: “Musuweli onnona sotakhala, khunahuluwa”.—Miruku 14:16.

   Vanapisaru, otheene nnoothanla opaka etthu ni ophwanya sookhumelela saya. Biibiliya onninleela wira Yosefe, Yobi ni Yesu yaahipaka soothanla sooloka. Nave-tho Kayini, Esawu ni Yuda yaahipaka soothanla soohiloka. Nto nyuwo munrowa opaka exeeni?

Biibiliya oni: “Mwireke sorera”. (Esalimo 37: 3) Akhala wira munimuupuwela sookhumelela saya, ni opaka yoothanla vahinatthi, munimoona okhweya osyaka opaka itthu soohiloka oxikola. Nto eyo enimoohakalalihani vanceene.

Muhoove, nyuwo khamuntthuneya olavula itthu sinceene. Nyuwo muhaana waakhula moolipa murima muriki: “NKINIPHAVELA”. Nyuwo pooti ohimya etthu enooniherya wira khamunrowa oturuka muupuwelo anyu, ntoko:

• “Muhikikontari!”

• “Mmwaavyeke oomwiirano!”

• “Khwa, nyu mookisuwela wira nkimpaka etthu eyo!”

Wira nwerye opaka eyo muhaana waakhula moohipisa ni moolipiherya. Akhala wira munoopaka eyo, waaniheryasa munooweha wira moohipisa ale aneettana anyu oxikola anoottharuwa woovahani cigarro!

Mpakeke exeeni akhala wira ale aneettana anyu oxikola animooveehani? Mwa ntakiheryo, akina pooti ohimya so: “Masi xeeni? Nyu mwa mulolo!” Muhixanke. Muupuweleke wira awo aniphavela wira mpake itthu soohiloka. Munrowa waakhula sai? Moone inamuna piili sinrowa wookhaliheryani.

• Nyuwo pooti weemya oveehiwa. (Mwa ntakiheryo, pooti waakhula so: “Aayo, kinimoova”. Nto mowaakuveya pooti ohimya ele enoova anyu.)

• Nyuwo pooti omuttikiherya. Mmuleele nthowa naya muhinrowa anyu weemya ele eniphavela awe naxikola owo. (Mwa ntakiheryo, pooti ohimya so: “Miyo kuupuwela wira nyuwo mwanwerya okiiriha ompaha cigarro”!)

Akhala wira anaxikola awo anoothipelela, muhaana okhuma opuro owo! Muhiliyale wira akhala wira munoopisa muri ene opuro owo, nave awo animoothipelelani. Okhuma opuro owo onimooniherya wira nyuwo khamuniphavela weettihiwa ni atthu akina.

Khivaniweryaneya otthyawa moomalela okhanyereriwa itthu soohiloka. Masi pooti othanla ele eniphavela anyu, mooniheryaka mweettelo anyu ni weettiha okumi anyu. Masi, nyuwo ti munrowa opaka yoothanla!—Yoxuwa 24:15.