FAN̈ONTANIAN̈A 6
Akory Hahavy Zaho Tsy ho Voataon̈o Haditry?
AKORY HATAONAO?
Miniminia hely baka ty: Navy tsaiky lekoly araiky amy Bryan aroe lahy, ke fa mitotoko fony Bryan. Efa indroe aby iro io nandrisiky Bryan hifima sigarety taminy herin̈iandra ty. Fan̈intelony ty zioty.
Mivolan̈a araiky amindro:
“Anao ty karaha tsisy naman̈a foeky! Alo mba hamian̈a naman̈a hely anao.”
Mipy maso ilany hely izy mivolan̈a “naman̈a” io sady mangala raha baka an̈aty posonany ao izy, baka io atondrony amy Bryan.
Efa sigarety edy e! Nahainitotoko fo fony Bryan.
Ho Bryan: “Azafady zalahy! Efa nivolan̈iko kony anaro fa zaho tsy ...”
Araiky faharoe nanapaka volan̈anany karaha ty: “Zahava, bitahotro e!”
Mirisiky mare Bryan mivolan̈a: “Zaho tsy bitahotro zen̈y!”
Ataony araiky faharoe amy soroko Bryan tan̈anany, baka io izy manambitamby: “Mba handramana hely baka!”
Ataony lay voanalohany in̈y fananjo vavany Bryan sigarety io, baka io izy mibisibisiky aminany: “Alo fa tsy volan̈inay aminolo foeky.”
Izikoa anao Bryan, akory hataonao?
MANDINIHA TSENDRIKY!
Izio ma tsaiky aby io mba nieritreritry edy talohany iro hifima sigarety? Ehe. Matetiky iro io voataon̈ony namandro fo. Tiho tiany kamaradindro iro ke man̈araka be fo raha tiany namandro.
Izikoa misy tsaiky mitaon̈o anao haditry, akory hataonao tsy han̈ano karaha iro?
-
DINIHA RAHA METY HATAONY
Baiboly mivolan̈a: ‘Olo mandiniky mahatsinjo antambo ke misitriky, fa olo tanora jery mbala man̈aton̈o fo ke avoa.’—Ohabolana 22:3.
Efa haihainao fo izio matetiky. Ohatra, handika amy tany misy tsaiky maromaro lekoly araiky aminao anao, sady iro hitanao mifima sigarety. Izikoa efa nidinihinao sandra raha mety hataony, ho hainao akory fomba hamalian̈a iro.
-
MANDINIHA TSARA
Baiboly mivolan̈a: “Ataova fo raha hanan̈anaro eritreritry madio.” —1 Petera 3:16.
Iritrireta ty: ‘Tsao hanen̈iny zaho ty koa man̈araka raha ataony namako fo e?’ Mety ho tiany namanao marin̈y anao amy fotoan̈a io. Kanefa, hilamin̈y edy eritreritrinao? Aia tianao, han̈ano raha mamparavoravo kamaradinao sa hanan̈a ny maha anao anao?—Eksodosy 23:2.
-
TAPAHA HEVITRY
Baiboly mivolan̈a: ‘Mahimahin̈y olo misy jery.’—Ohabolana 14:16.
Tsy niany tsy amaray, atsika tsy maintsy hanapakevitry ndreky hijinja vokany zen̈y. Baiboly mikoran̈a momba lelahy nahay nanapakevitry, karaha ataony Josefa, Joba, ndreky Jesosy, fa tsy karaha zen̈y ndraiky Kaina, Esao, ndreky Jodasy. Anao ke, han̈ano kararoky anao?
Baiboly mivolan̈a: ‘Irarian̈a anao ho atokisan̈a amy zay raha ataonao.’ (Salamo 37:3) Ke alohany anao han̈ano raha, diniha antsendriky vokany, zay anao vo manapakevitry. Tsy ho sarotro aminao amy zen̈y hivolan̈a hevitrinao. Sady efa zen̈y edy ny mahatsara anao.
Anao tsy voatery han̈azava be hevitrinao, fa anao mila hentitry. Volàn̈a fo EHE efa basy edy. Zen̈y koa mbala tsy jireny, ty volàn̈a:
-
“Zaho tsy miditry amy zen̈y!”
-
“Zaho tsy man̈ano raha karaha zen̈y!”
-
“Manafo o! Hainaro tsarabe fa zaho ts’ety han̈ano zen̈y!”
Aza misalasala mivolan̈a, aboaha tsara fa anao tsy misongetaka. Ho gaga anao fa hangin̈y direkity iro!
KOA FA MISY OLO MIKOTRAN̈A
Anao koa man̈eky taominy kamaradinao han̈ano zay raha tiany, ataony mira somanany in̈y fo anao
Akory ndraiky izikoa anao hankadalaindro? Akory iro koa mivolan̈a: “Ino ma raha mampavozo anao?” Mbala fomba hitaritany naman̈a haditry fo zen̈y. Ino raha mety hataonao? Misy sosokevitry aroe mety fidin̈a ty.
-
Zisty ikia fo fankadalandro. (Volàn̈a ty: “Ia, zaho mavozo!” Baka io hazavà saraiky antony.)
-
Ampiritrireta izy. Volàn̈a antony tsy han̈ikianao, baka io ataova raha hahavy izy handiniky. (Volàn̈a ty: “Anaro koa misain̈y tsy hifima sigarety zalahy!”)
Koa mbala tsy voly fo izy, aza mijanon̈o io! Tsarova fa hahay ho sarotro aminao tsy han̈eky raha ataondro izikoa anao mbala mijanon̈o io fo. Fialanao amindro io ahitan̈a fa anao tsy man̈eky hankadalainolo han̈ano zay raha tiany fo.
Tsy maintsy mbala hitaon̈o anao fo ry namanao, fa anjaranao mifidy na anao han̈eky na tsy han̈eky. (Josoa 24:15) Ke ambarà iro hevitrinao, baka io man̈anova raha mifan̈araka amy zen̈y.
