CIWUSYO 6
Ana Mpaka Ŵambale Catuli Kujigalila Yitendo ya Acimjangu?
ANA WAWOJO MPAKA ATENDE YATULI?
Aganicisye ayi: Acimjakwe ŵaŵili ŵa Brian ŵakusukulu akwawula kwali Brian. Pakwawona acimjakwewo, akogopa. Jemanjaji, cijuma cinocino alinjile kaŵili kose kumkanganicisya kuti akwembe sona. Aka cikaŵe katatu.
Mjakwe jwandanda akuŵeceta kuti: “Mli jikasoni eti? Uli nampe kanekakwe?”
Jwalakwe akujigala cindu mumsaku wa kabudula kuti ampe Brian.
Brian akum’wona mjakwejo kuti ajigele sona. Yeleyi yikumtendekasya kuti akole woga mnope.
Brian akwanga kuti, “Namsalile kala kuti une yeleyi . . .”
Mjakwe jwaŵili jula akumkata maloŵe ni kumnyosya kuti, “Nambo aci kuloŵela!”
Mwakulilimbisya jwalakwe akwanga kuti, “Nganimba jwakuloŵela.”
Mwakumnyenjelela, mjakwejo akumsalila kuti, “Mgambe kupasya mmwe.”
Mjakwe jwandanda akulinga kumpa Brian sona jula ali mkuŵeceta mwapasipasi kuti, “Ngatuja kumsalila jwalijose. Pangali jutamanyilile yeleyi.”
Yikaŵe kuti wawojo ali Brian, ana akatesile yatuli?
AJIME NI AGANICISYE!
Ana mpaka tujile kuti acimjakwe ŵa Brian akumanyilila cenene yakutenda? Ana asagwile jika kuti atendeje yeleyi? Yakayikasya. Komboleka kuti akujigalila yakusatenda acimjawo. Jemanjaji akutenda yeleyi pakusaka kuti ŵane ŵanonyeleje.
Wawojo akasimane ni yakulandana ni yeleyi, ana akatesile cici kuti akajigalila yitendo ya acimjawoyo?
-
AMANYILILEJE MKANIPAŴE YAMPAKA YITENDEKWE
Baibulo jikusati, “Mundu jwakalamuka pati aciweni cindu cakogoya akusajuŵaga, nambo mundu jwakuloŵela akusagambaga kupelenganya ni kutanda kuligamba panyuma pakwe pati asimene ni yisawusyo.”—Miyambo 22:3.
Ndaŵi syejinji, yikusakomboleka kuyiwona yakusawusya mkanipaŵe. Mwambone, tuwanicisye kuti ŵaweni acimjawo ŵakusukulu ali mkwika pati m’yoyo, nambo ali mkukwemba. Kumanyilila mkanipaŵe yampaka yitendece mpaka kwakamucisye kumanyililasoni yampaka atende kuti acimjawowo akalagasya.
-
AGANICISYEJE
Baibulo jikusati, “Aŵeje ni cikumbumtima cambone.”—1 Petulo 3:16.
Aliwusye kuti, ‘Ana mpaka mbikane wuli mumtima ndili ndesile yakutenda acimjanguyi?’ Yili yisyene kuti ndaŵi sine mpaka atende yindu pakujigalila yitendo ya acimjawo. Nambo ana mpaka apikane wuli patesile yeleyo? Ana mpaka akunde kusakasya mbili jawo kuti ŵasangalasye acimjawo ŵakusukulu?—Eksodo 23:2.
-
ASAGULEJE YAKUTENDA
Baibulo jikusati, “Mundu jwalunda akusamanyilila yindu.”—Miyambo 14:16.
Wosopewe tukusosekwa kusagula yakutenda. Soni cilicose catusagwile kuti tutende cikusaŵa ni yakuyicisya yakwe. Baibulo jikusasala ya ŵandu mpela Yosefe, Yobu, soni Yesu ŵaŵasagwile mwalunda yakutenda. Jikusasalasoni ya ŵandu mpela Kaini, Esawu soni Yudasi ŵanganasagula mwalunda yakutenda. Ana wawojo cacisagula mwatuli yakutenda?
Baibulo jikusati, “M’ŵeje jwakulupicika.” (Salimo 37:3) Kuganicisya mkanipaŵe yakuyicisya yampaka yipagwe pasagwile kutenda yindu m’litala line lyakwe, ni kwasalila acimjawo yasagwileyo mpaka yiŵe yakamucisya.
Nambotu ngakusosekwa kwasalila yejinji acimjawowo. Cakusosekwa mnope cili kwasalila mwakata nambo mwakusimicisya kuti IYAYI. Kapena naga akusaka kuti apikanicisye mpaka ŵasalile kuti:
-
“Une yeleyo iyayi!”
-
“Une jwangatenda yindu yeleyo!”
-
“Come on, you know me better than that!”
Nambo akusosekwa kwasalila yeleyi ndaŵi jijojo soni mwakusimicisya. Naga akutenda yeleyi acimjawowo mpaka alece kwalagasyako mwacitema.
YAMPAKA ATENDE NAGA ŴANE AKWANYOSYA
Naga akusagamba kujigalila yitendo ya acimjawo, akusaŵa mpela cidole cawo
Tuwanicisye kuti acimjawo akwasalila kuti atende cine cakwe nambo wawojo akukana. Kaneko acimjawowo akwanyosya acitiji, “Cisawisye cici pele, ana mmwe mli jwakuloŵela eti?” Ana mpaka atende cici?
-
Kwiticisya. (“Elo, ngogopa!” Kaneko ni kusala magongo gakwe.)
-
Kwajanga mwamacili. Ŵasalile ligongo lyakwe akukana, kaneko ŵasalile yampaka yatendekasye ganicisya. (“Naganisyaga kuti mli mundu jwalunda, ni mkukwembasoni sona!”)
Naga akwendelecela kwanyosya mpaka atende cenene kwamba kutyoka pamalopo. Akaliŵalila kuti naga akutamilisya mnope pamalopo mpaka ŵanyosye mnope. Kutyokapo mpaka kulosye kuti ngakusaka kuti agambeje kujigalila yitendo ya acimjawowo.
Kusala yisyene, acimjawo nganaŵa alesile kwakanganicisya kuti atende yine yakwe. Nambo wawojo ni ŵakwete macili gakusala nganisyo syawo soni kusagula yakutenda.—Yoswa 24:15.
